Policija (03.01.23)

Dienstag, 03. Januar 2023 geschrieben von:

Prěni dźeń lěta so rozestajiłoj

Nowa Łuka. Wšo druhe hač dobre přeća do noweho lěta wuměništaj sej předwčerawšim popołdnju mužej w starobje 21 a 40 lět w Nowej Łuce w gmejnje Halštrowska Hola. Njeznateje přičiny dla so wonaj najprjedy werbalnje rozestajištaj, pozdźišo so tež ćělnje do so daštaj. Při tym bu młódši z njeju zranjeny, tak zo dyrbješe so lěkarsce zastarać dać. Nimo toho bu jeho awto trochu wobškodźene, jako 40lětny z wotmachom do prawych prědnich duri kopny.

Policija (02.01.23)

Montag, 02. Januar 2023 geschrieben von:

Kólnja so paliła

Mučow. K hašenju wołachu wobornikow silwester wječor do Mučowa. Tam bě so najskerje praskotaka dla žiwy płót zapalił. Sylneho wětřika dla wupřestrěchu so płomjenja na kólnju. W njej běchu moped, traktor k syčenju trawnika, koleso, awtowe wobruče a dalši grat. Po informacijach policije nasta 15 000 eurow škody. Zranił so na zbožo nichtó njeje. Wobornicy zadźěłachu, zo płomjenja na dalše twarjenja přeskočichu.

Policija (30.12.22)

Freitag, 30. Dezember 2022 geschrieben von:

Zakazane praskotaki namakali

Załom. W zwisku z kónclětnym praskotanjom a z nim zwisowacymi strachami při wužiwanju njedowoleneje pyrotechniki je policija předwčerawšim kontrole w namjeznej kónčinje z Čěskej přewjedła. Tak zastojnicy na štyrjoch městnach w Załomju a na dalšim w Šěrachowje pola sydom wosobow njedowolenu pyrotechniku, tak mjenowane pólske praskotaki kategorije F3 a F4, namakachu. Žony a mužojo w starobje 18 do 27 lět změja so přeńdźenja přećiwo zakonjej wo rozbuchadłach dla zamołwić.

Policija (29.12.22)

Donnerstag, 29. Dezember 2022 geschrieben von:

Z alkoholom nimale do hata zajěła

Jaseńca. Zbožo w njezbožu drje měješe w rańšich hodźinach wčerawšeje srjedy 58lětna wodźerka Forda w Jaseńcy. Žona bě z Wětrowa přijěła a w nahłej prawej křiwicy přejara na lěwy bok jězdnje za­jěła. Tam přejědźe chódnik, zrazy do wobchadneho znamješka a skónčnje do wobhrodźenja wjesneho hata. Jězdźidło wisaše potom křiwje na skłoninje a hrožeše so do hata sunyć. Na zbožo móžeše so žona sama a njezranjena z wosobo­weho awta wuswobodźić. Přiwołani dobrowólni wohnjowi wobornicy so wo to starachu, zo njeby so awto dale do wody sunyło. Z pomocu specialneho jězdźidła Ford z jeho njezbožowneje situacije ­wućahnychu. Do toho běchu na haće ­zadźěwk připrawili, zo njeby so wolij wupřestrěć móhł. Při wobdźěłanju njezboža so wukopa, zo měješe žona 1,92 promilow alkohola w kreji. Po informacijach policije nasta na awće něhdźe 25 000 ­eurow wěcneje škody.

Policija (28.12.22)

Mittwoch, 28. Dezember 2022 geschrieben von:

Rentnarjej móšnju pokradnyli

Wojerecy. Žadyn měrny druhi hodowny swjaty dźeń njeměješe rentnar we Wojerecach. 89lětny bě předwčerawšim z kolesom na Becherowej po puću, jako jemu njeznaći móšnju z kolesoweho korbika pokradnychu. W móšni běchu wupokazy a pjenjezy. Škoda wučinja něhdźe 500 eurow.

Paduši w bydlenju

Budyšin. Hodowny kónc tydźenja su so njeznaći w Budyšinje do bydlenja zadobyli. W času wot pjatka dopołdnja hač do póndźele dopołdnja łamachu so woni do wjacebydlenskeho domu na Listowej. Paduši wzachu črije, kameru a sterejowu připrawu w cyłkownje hódnoće něhdźe 1 500 eurow sobu.

Policija (27.12.22)

Dienstag, 27. Dezember 2022 geschrieben von:

Rozestajenje po njezbožu

Njeswačidło. Mało hodowneho měra začuwachu wobdźělnicy wobchadneho njezboža patoržicu dopołdnja na B 96 pola Njeswačidła při wotbóčce do Holešowskeje Dubrawki. Tam běštej VW a BMW do so zrazyłoj, zranił pak so nichtó njeje. 35lětna wodźerka BMWja a jeje 32lětny sobujěducy kaž tež 19lětny wodźer VWja sej mjez sobu winu na zražce přisuwachu. Jedyn druhemu wudma nadawaše a jemu hrožeše. Policija pyta nětko swědkow.

Policija (23.12.22)

Freitag, 23. Dezember 2022 geschrieben von:

Nuznik skóncowali

Budyšin. Zawěrno njewšědny objekt su sej minjenu wutoru wječor njeznaći wupytali, zo bychu swoje mocy wopokazali. W času wot 18.15 do 18.45 hodź. woni na Bozančanskej dróze mobilny nuznik dospołnje rozbichu. Tak mjenowany Toi Toi steješe blisko bydlenskeho domu čisło 35. Po informacijach Zhorjelskeje policajskeje direkcije nasta něhdźe 530 eurow škody. Policija pad přepytuje a pyta w tym zwisku swědkow, kotřiž su něšto wobkedźbowali. Pokiwy přijimuja pod telefonowym čisłom 03591/ 35 60.

Policija (22.12.22)

Donnerstag, 22. Dezember 2022 geschrieben von:

Bjez dowolnosće, ale z alkoholom

Delnja Hórka. Nadróžny wobchad strašnje wohrozył je 35lětny wodźer Passata wčera krótko po połnocy na zwjazkowej dróze B 156. Wón bě z Budyšina do směra na Delnju Hórku po puću, jako w křiwicy nalěwo kontrolu nad awtom zhubi, na prawym boku wobhrodźenje a dźiwinowy płót přełama a so po skłoninje suny. Při tym so VW zwróći. Na jězdźidle nasta něhdźe 18 000 eurow škody. Jězdźić z nim hižo njemóžeš. Na wobhrodźenju a płoće nasta 3 000 eurow škody. Na zbožo so 35lětny jeno snadnje zrani. Při wobdźěłanju njezboža policisća zwěsćichu, zo muž scyła žanu jězbnu dowolnosć njewobsedźi. Nimo toho so wukopa, zo bě pod wliwom alkohola awto wodźił. Pola njeho naměrichu mjenujcy 1,68 promilow. Za to změje so před sudnistwom zamołwić. Policija pad nětko dale přepytuje.

Policija (21.12.22)

Mittwoch, 21. Dezember 2022 geschrieben von:

Bjez zymskich wobručow jěła

Wojerecy. Poprawom najpozdźišo w jězbnej šuli wuknješ, zo maš při zymskich poměrach na puću swoje awto ze zymskimi wobručemi wuhotować. Fachowcy stajnje zaso zasadu poručeja, zymske wobruče najlěpje wot oktobra hač do jutrow na kolesach měć. 26lětnej žonje we Wojerecach bě to předwčerawšim dopołdnja po wšěm zdaću wšojedne. Na Heinowej bě wona ze swojim Toyota do směra na Brětnju po puću, jako so na hładkej dróze suwać započa a do płotu ležownosće zrazy. Žona so na zbožo ­nje­zrani. Na awće a na płoće nasta dohromady 2 500 eurow škody. Policisća zwěsćichu, zo bě Toyota z lěćnymi wob­ručemi po puću.

Policija (20.12.22)

Dienstag, 20. Dezember 2022 geschrieben von:

Škody dźěry dla

Budyšin. Włóžnoty a zmjerzka dla je so předwčerawšim popołdnju awtodróha A 4 mjez wotbóčkomaj Wóspork a Budyšin wuchod roztorhnyła. Kaž Zhorjelska policajska direkcija zdźěli, je so znajmjeńša dwanaće jězdźidłow wobškodźiło, jako přez dźěru zajědźechu. Při tym nasta dohromady něhdźe 12 000 eurow škody.

Šmóratce a telefon fuk

Krušwica. Do jednoswójbneho domu w Krušwicy su so njeznaći předwčerawšim rano zadobyli. Jako wobydlerjo to pytnychu, so skućićeljo zminychu. Sobu wzali su šmóratce a móšnju. Škoda wučinja něhdźe 800 eurow.

Serbska debata

Neuheiten LND