Konsekwency za započatkarja
Budyšin. Na wjeršku póstniskeho časa je policija wot štwórtka zašłeho tydźenja hač do minjeneje wutory w zesylnjenej měrje šoferow wosobowych awtow na jich kmanosć jězdźenja kontrolowała. W Budyskim a Zhorjelskim wokrjesu lepichu dohromady 24 wodźerjow. Wosmjo z nich běchu drogi brali, šěsnaćo stejachu pod wliwom alkohola. Mjez nimi bě 20lětny, kotrehož su njedźelu wječor w Korzymju zadźerželi. Jako započatkar dyrbjał wón dospołnje strózby być, alkomat pak pokaza 0,46 promilow. Za to dóstanje młody muž dypk w centralnym registrje w Flensburgu a změje 250 eurow pokuty płaćić. Nimo toho podlěši so jeho probowy čas na štyri lěta. A skónčnje dyrbi so wón na tak mjenowanym natwarnym seminarje wobdźělić, kotryž je po informacijach policije z tójšto wudawkami zwjazany.
Bjez žony dale jěł
Budyšin. Při jězbje po awtodróze A 4 je minjenu sobotu wječor k rozestajenju mjez mandźelskimaj dóšło. Jako bě žona na parkowanišću na nuzniku, muž roznjemdrjeny ze swojim Citroenom prosće wotjědźe. Z wupožčenym handyjom zazwoni žona policiju, kotraž ju sobu na Budyski rewěr wza. Hakle po wjacorych hodźinach so tam tež muž zjewi a swoju žonu wotewza. Wo čim staj wonaj na to w awće rěčałoj, bohužel znate njeje.
Małe njezbožo w kuchni
Běła Woda. Dokelž je pječa k rozpachnjenju dóšło, wołaše w rańšich hodźinach wčerawšeje njedźele wobydler Běłeje Wody wohnjowu woboru do zahrodnišća na Heinowej. Jako běchu kameradojo a policisća na městnje, woni spěšnje zwěsćichu, zo scyła tak zlě njebě. Paliło so tam mjenujcy njeje. 34lětna žona chcyše sej jeničce něšto k jědźi spřihotować a zwohrěwa sej začinjenu konserwu. Jako ju wočini, jej horca jědź mjezwoči pryskny a ju snadnje zrani. Žonu dowjezechu do chorownje.
Znowa so awto paliło
Budyšin. Na parkowanišću Budyskeho mebloweho domu Roller je so dźensa w nocy wosobowe awto wupaliło. Jako wobornicy přijědźechu, njemóžachu woni Seat Arosa hižo wuchować. Tež žiwy płót w susodstwje hižo w płomjenjach steješe. Wobornicy drje móžachu je spěšnje podusyć, awto pak je dospołnje skóncowane. Hakle minjenu njedźelu bě so cyle w bliskosći VW Polo palił.
Z brónju do kocora třělili
Brěmjo. Najskerje 8. abo 9. februara su njeznaći w Brěmjenju (Brehmen) pola Wulkeje Dubrawy do kocora třělili. Skućićel wužiwaše za to dotal njeznatu bróń. Kaž skótny lěkar wobkrući, je lědma móžno, zo bě so kocor sam zranił. Medicinar móžeše ranu zastarać a štyrinohačej pomhać. Přiwšěm wobsteji podhlad, zo je so skućićel přećiwo zakonjej wo škiće zwěrjatow přešoł. Tohodla proša nětko wobydlerjow wo pomoc. Štóž móže pokiwy wo njeskutku abo skućićelu podać, njech to policiji přizjewi.
Ćěriwo kradnyli
Zabrod. Něhdźe 350 litrow diesela su njeznaći minjeny kónc tydźenja z twarnišća w Zabrodźe pokradnyli. Kaž dyrbjachu tam póndźelu rano zwěsćić, běchu skućićeljo tankowe wěko wotstajeneju twarskeju mašinow namócnje wočinili a z njeju ćěriwo wotklumpali. Hódnotu diesela trochuja na 500 eurow, nimo toho nasta 100 eurow wěcneje škody.
Paduši w bydlenju
Wóslink. Njedźelu dopołdnja dyrbjachu mějićeljo jednoswójbneho domu we Wóslinku zwěsćić, zo běchu so njeznaći do njeho zadobyli, jako wobydlerjo w nocy do toho doma njeběchu. Paduši běchu wšitke stwy a kamory za hódnotnymi wěcami přepytali a su wšelake debjenki a pjenjezy sobu wzali. Cyłkowna rubizna měješe hódnotu wjacorych stow eurow.
Stare awto so wupaliło
Budyšin. K hašenju wosoboweho awta wołachu wohnjowych wobornikow wčera rano na kromu Bórka pola Budyšina. Jězdźidło steješe při awtodróhowym mosće. Kameradojo płomjenja spěšnje podusychu, tak zo k žanym dalšim škodam njedóńdźe. Kaž policija zdźěli, jednaše so wo dospołnje wusłuženy a skóncowany čěski VW Polo, kiž tam hižo wjacore tydźenje steješe. Tójšto dźělow z njeho bě hižo wutwarjenych, čehoždla tukaja na zapalerstwo a nic na techniski defekt jako přičinu wohenja.
Ze spara wutorhnjeny
Wojerecy. Do pódlanskeho twarjenja jednoswójbneho domu we Wojerecach su so w nocy na srjedu njeznaći zadobyli a sej twarske mašiny za wottransport přihotowali. Jako spytachu tež chěžne durje wočinić a so w bydlenskim domje rozhladować, pak činjachu haru, tak zo wobsedźer wotući a za prawym pohladny. Na to zadobywarjo ćeknychu. Sobu wzali drje ničo njejsu, přiwšěm načinichu něhdźe tysac eurow wěcneje škody.