Policija (19.02.24)
W domje kable kradnyli
Miłoraz. W nocy na sobotu su so njeznaći do jednoswójbneho domu na Wochožanskim puću w Miłorazu w Trjebinskej gmejnje zadobyli. W domje wotstronichu namócnje wjacore koporowe kable kaž tež wšelake nastroje a wzachu je sobu. Rubiznu trochuje policija na něhdźe 3 000 eurow, wěcna škoda wučinja něhdźe 5 000 eurow. Hač jedna so wo twarjenje, z kotrehož su wobydlerjo přesydlenja wsy dla wućahnyli, z policajskeje rozprawy njewuchadźa.
Policija (16.02.24)
Paducha lepili
Wojerecy. Z pomocu sobudźěłaćerja nakupowanišća móžeše policija we Wojerecach srjedu paducha lepić. Njeznaty muž bě sej w kupnicy na Lipeckim naměsće wjacore twory wzał a chcyše z nimi nimo kasy hić. Jako jeho sobudźěłaćer kupnicy na to narěča, so muž wutorhny a ćekny. Sobudźěłaćer za nim do bydlenskeje štwórće spěchaše. Při jednym z bydlenskich domow muž sobudźěłaćerjej durje před nosom zaprasny, při čimž jeho snadnje zrani. Škodowany na to policiju informowaše. Zastojnicy zwěsćichu w bydlenskim domje 47lětneho muža. Wobydler swój njeskutk přizna a spakosćene twory w hódnoće 30 eurow wróći. Wón změje so nětko podhlada rubježneho padustwa dla zamołwić. Kriminalna słužba Wojerowskeho policajskeho rewěra pad dale přepytuje.
Policija (15.02.24)
W bydlenjach so posłužowali
Kamjenc. Po wšěm zdaću wjacore měsacy dołho su njeznaći w prózdnych wjaceswójbnych domach na Kamjenskej Fichtowej kradnyli. Kaž policija wutoru zhoni, wutwarichu z třoch bydlenskich blokow wšelki inwentar, mjez druhim milinowody, tepjenske roły a armatury. Po prěnim trochowanju nasta škoda we wobjimje šěsćcyfroweje sumy.
Policija (14.02.24)
Kolesy so zesamostatniłoj
Narć. K nic runjewon wšědnemu wobchadnemu njezbožu su póndźelu popołdnju policiju na zwjazkowej dróze B 96 wołali. 53lětny wodźer transportera typa Mercedes Sprinter bě do směra na Wojerecy po puću. Z dotal njeznateje přičiny pušćištej so wobě kolesy na lěwym boku zadnjeje wóski a zrazyštej do napřećo jěduceho wosoboweho awta. Škoda wučinja něhdźe 5 000 eurow.
Policija (13.02.24)
Rozestajenje na póstnicach
Kulow. Na póstniskim swjedźenju na Wojerowskej dróze w Kulowje je w nocy na póndźelu k namócnemu rozestajenju dóšło. 20lětny bě tam 25lětnemu z pjasću mjezwoči dyrił, tak zo dyrbješe so starši lěkarsce zastarać dać. Skućićel změje so nětko podhlada zranjenja ćěła dla zamołwić. Kriminalna słužba policije pad dale přepytuje.
Drogi brał a z awtom jěł
Němcy. 19lětneho wodźerja transportera su policisća njedźelu dopołdnja w Němcach zadźerželi. Drogowy test reagowaše pola njeho pozitiwnje na konop, amfetaminy a kokain. Młody muž dyrbješe na to krej wotedać.
Policija (09.02.24)
Kozoł, byk a konje ćeknyli
Němcy/Rakecy. W Němcach je sej wčera, krótko po połnocy, kozoł swobodu popřał. Njedaloko njeho wuhladachu policisća tři swobodnje běhace byki. Mějićel ležeše hišće we łožu, jako policisća klinkachu. Tři hodźiny pozdźišo běhachu wjacore konje po Rakecach. Policisća su wobsedźerjow wuslědźili. We woběmaj padomaj su zastojnicy a mějićeljo zwěrjata popadnyli a wróćo do hródźow dowjezli.
Policija (08.02.24)
Zarjadowanju zadźěwali
Wojerecy. W kompleksu twarjenjow na dróze E we Wojerecach chcychu prawicarjo minjenu sobotu party wotměć. Zhorjelska policajska direkcija pak je planowanemu ilegalnemu zarjadowanju zadźěwała. Te bě jako narodninski swjedźeń z live-hudźbu z praweje sceny deklarowane. Zastojnicy z Wojerowskeho rewěra, jednotki z policajskeju direkcijow Zhorjelc a Kamjenicy, kaž tež hotowostna policija běchu na městnje. Při kontroli před ležownosću zarjadowanja su zastojnicy hač do rańšich hodźin něhdźe 250 wosobow kontrolowali. Při tym sćazachu wšelake zynkonošaki, kotrež nětko chłostanskoprawnisce přepruwuja. Zdobom zastojnicy wothrawanju live-hudźby zadźěwachu. Mjeztym pruwuja tež prawniske konsekwency za zarjadowarjow.
Policija (05.02.24)
Ford pokradnyli
Chwaćicy. Dotal njeznaći su w nocy wot pjatka na sobotu na Wulkodubrawskej dróze w Chwaćicach pjeć lět stary šěry Ford Galaxy w hódnoće něhdźe 24 500 eurow pokradnyli. Dale pobrachujetej wobsedźerjej tafličce ze značkami druheho jězdźidła. Dalše awto marki Ford su z namocu wotewrěli a z njeho grat w hódnoće 70 eurow pokradnyli. Při tym nasta wěcna škoda we wysokosći něhdźe 150 eurow. Policija mjezynarodnje za Fordom Galaxy slědźi.
Přehłuboko do škleńcy pohladnył
Malešecy. Policisća policajskeho rewěra Budyšin su pjatk w nocy w Hućinje na dróze Při hatach wobchadnu kontrolu přewjedli. Tam su 29lětneho němskeho wodźerja awta marki Ford zadźerželi a kontrolowali. Test alkohola pokaza 0,70 promile. Šofera wočakuje wysoka pokuta.
Policija (02.02.24)
Prawy pokiw dał
Budyšin. Po pokiwje wobydlerja je policija srjedu dopołdnja na zwjazkowej dróze B 6 mjez Budyšinom a Lubijom šofera lepiła, kiž pod wliwom drogow steješe. Wón bě napadnył, dokelž razantnje jězdźeše a riskantnje přesćahowaše. Alarměrowana wobsadka policajskeho awta móžeše 40lětneho čěskeho šofera skónčnje zadźeržeć. Při kontroli so wukopa, zo bě wón konop brał. Nimo toho zastojnicy wotpowědnu substancu w awće namakachu. Dale jěć muž njesmědźeše.
Policija (01.02.24)
Awto koleso zhubiło
Kamjenc. Wobchadne njezbožo je so wutoru na statnej dróze S 94 pola Kamjenca stało. 60lětny wodźer wosoboweho awta bě do směra na Porchow po puću. Při wotbóčce na S 97 přijědźe jemu nakładne awto napřećo – a nimo toho jednotliwe koleso, kotrež bě so wot připowěšaka pušćiło. Wone prasny do Dacije a načini 6 000 eurow škody. 50lětny wodźer Lkw-ja to ani pytnył njeje a dale jědźeše. Policija jeho pozdźišo wuslědźi.
