Radźićeljo wuradźuja
Róžant. Popłatki staršich za zawodowe wudawki Ralbičanskeje pěstowarnje budu jedna z temow přichodneho posedźenja gmejnskeje rady Ralbic-Róžanta jutře, štwórtk, we 18.30 hodź. w sydarni Róžeńčanskeho gmejnskeho zarjadnistwa. Dale zaběraja so radźićeljo z wustawkami wo zarunanju čestnohamtskeje dźěławosće a z wustawkami wo wotškódnjenju wohnjowych wobornikow. Nimo toho póńdźe wo plan potrjeby wohnjoweje wobory.
Campus na dwórnišću
Radwor. Staršiska iniciatiwa Radwor přewjedźe w druhim tydźenju nazymskich prózdnin na bywšim Radworskim dwórnišću nazymski campus. Mysleny je wón za šulerjow wot 1. lětnika. Wot 9. hač do 13. oktobra chcedźa so tam wšědnje wot 9 do 15 hodź. pod serbskim fachowym nawodom z přirodu a zwěrjatami w nazymje zaběrać, slědźić, eksperimentować, paslić, warić, pjec a wjele wjace. Přinošk płaći dźesać eurow na dźeń za zastaranje a material. Zajimcy njech přizjewja so pola Diany Mejnoweje pod telefonowym čisłom 035935/ 219 862 abo e-mailnje pod . Pjatk, 14. oktobra, přewjedu dźěłarničku za wudźenje. Městna pak su hižo wšitke wobsadźene.
Zahaja nowy sinfoniski rjad
Zhromadnje zmije pušćeć
Smječkecy. Wjesny klub Smječkecy přeproša wšitke swójby zbliska a daloka na tradicionelne pušćenje zmije do Smječkec, a to njedźelu, 1. oktobra, na łuku za Bjeńšec twarskej firmu. Po zwučenym wašnju spřihotuja tež lětsa zaso wjesne žony wot 15 hodź. butřankowe plincy. Organizatorojo wjesela so na bohate wobdźělenje
Oratorij trójce zaklinči
Zahaja Krabatowy tydźeń
Wojerecy. Składnostnje zahajenja Krabatoweho tydźenja jutře, 29. septembra, před radnicu w starym měsće Wojerec dźěći z Němčanskeje pěstowarnje w 14.30 hodź. serbski program předstaja. W 16.30 hodź. móža wopytowarjo dźěćacu rejwansku skupinu Brětnja dožiwić. Tomu so w 17.30 hodź. Serbska ludowa rejwanska skupina Ćisk přizamknje, kiž tradicionelne młóćenje z cypami pokaza. Tež „připołdnica“ steji na programje – w kamishibai-dźiwadle. Při jewišću je stejnišćo župy „Handrij Zejler“. Rěčnaj motiwatoraj Marija Šołćić a Lucian Kaulfürst budźetaj z keramiku resp. dudami přitomnaj. Oficielne zahajenje přewjedźe wyši měšćanosta Torsten Ruban-Zeh (SPD) w 14 hodź. Krabatowy tydźeń budźe hač do 8. oktobra trać. Dalše informacije: .
Kupjel zawrjena
Kamjenc. W Kamjenskej halowej kupjeli dyrbja w nazymskich prózdninach nuznje trěbne reparatury přewjesć. Tohodla wostanje kupjel wot póndźele, 2. oktobra, hač do njedźele, 15. oktobra za zjawne płuwanje zawrjena. Sawna hodźi so w tym času we wobmjezowanej měrje wužiwać, a to wot póndźele do pjatka stajnje wot 12 do 22 hodź. 3. oktobra wostanje sawna zawrjena.
Pólsce a jendźelsce po muzeju
Budyšin. Serbski muzej w Budyšinje je zetkawanišćo za ludźi z regiona a z cyłeho swěta. Tu nadeńdźeš rěčnu mnohotnosć. Pjatk, 29. septembra, přeprošuje Serbski muzej w ramiku mjezykulturnych tydźenjow w Budyšinje hosći w 15 hodź. na wjedźenje w pólskej a w 16 hodź. w jendźelskej rěči. Stawizny Serbow a wosebita wustajeńca „Čej’ da sy?“ so při tym předstajeja. Zajimcy njech přizjewja so pod .
Knižna premjera na hrodźe
Lichań. W Ludowym nakładnistwje Domowina je w septembrje wobrazowy zwjazk Jürgena Maćija „Ducy domoj – Unterwegs nach Hause“ wušoł. Nakładnistwo a Domizniske towarstwo Lichań přeprošujetej wšitkich zajimcow na knižnu premjeru, kotraž budźe wutoru, 3. oktobra, we 18 hodź., na hrodźe w Lichanju.
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so štwórtk, 28. septembra, w 19 hodź. w tamnišim gmejnskim a kulturnym centrumje. Mjez druhim póńdźe wo wysokosć staršiskeho popłatka za hladanje dźěći w Chróšćanskej pěstowarni. Dale na dnjowym porjedźe steja wustawki wo wudawkach za zasadźenje wohnjoweje wobory a změna wobtwarjenskeho plana „Při pastyrni“ w Chrósćicach. Zjawnemu posedźenju přizamknje so njezjawny dźěl. Zajimcy su wutrobnje přeprošeni.
Wjelk dwě wowcy torhnył
Hórki. W nocy na minjenu sobotu je w Hórkach na kromje wsy do směra na Chrósćicy wjelk dwě wowcy morił. Jeju wobsedźer, kotryž měješe dohromady štyri wowcy na pastwje, je škodu hnydom přisłušnemu městnu přizjewił. Fachowc je hišće sobotu dopołdnja přijěł a po obdukciji wobkrućił, zo běše to wjelk. Tamnej wowcy móžeštej so wuchować a najprjedy raz ćeknyć. Jej su w běhu dnja zaso namakali.
Wo studentskim žiwjenju
Choćebuz. Přichodne Serbske blido w Choćebuskim Serbskim muzeju wotměje so srjedu, 27. septembra, we 18 hodź. Tónraz steji aktualne serbske studentske žiwjenje w Lipsku w srjedźišću rozmołwy. Z hosćom budźetej Mila Kochojc a Paula Hirtojc, kotrejž w Lipsku serbšćinu studujetej. Wobě rozprawjatej wo swojich nazhonjenjach a dožiwjenjach na studiju a w studentskim žiwjenju. Dalši studenća a absolwenća su na Serbske blido tohorunja wutrobnje přeprošeni.
Ze sakskim premierom rěčeć
Rakecy. Na wobydlersku rozmołwu ze sakskim ministerskim prezidentom Michaelom Kretschmerom su zajimcy srjedu, 27. septembra, w 19 hodź. do awle Rakečanskeje ewangelskeje wyšeje šule přeprošeni. Přitomnaj budźetaj tohorunja krajny rada Udo Wićaz a wjesnjanosta Swen Nowotny (wšitcy CDU). Wopytowarjo změja składnosć, swoje prašenja wotbyć a wo aktualnych temach z politikarjemi diskutować.
Krótše wotewrjenske časy
Tomaš Žur koncertuje
Pančicy-Kukow. Bywši organist Berlinskeje katedrale swjateje Jadwigi Tomaš Žur wuhotuje jutře, sobotu, 23. septembra, w 15 hodź. w klóštrje Marijinej hwězdźe w Pančicach-Kukowje zhromadnje ze swojej mandźelskej Roswithu beneficny koncert na dobro 775 lět wobstejaceho cistercienskeho klóštra. Tema koncerta z rozmyslowacymi a lóštnymi basnjemi je „Rěka žiwjenja“. Organizatorojo nadźijeja so bohateho wopyta.
Seniorojo škotuja
Lejno. Přichodny škotowy turněr serbskich seniorow wotměje so wutoru, 26. septembra, w Lejnjanskim hosćencu. Započatk budźe w 14 hodź. Kaž organizator Měrćin Nowak zdźěli, su nowačcy stajnje rady witani. Dalše kartyplacanje budźe 31. oktobra, reformaciski dźeń, w Radworskej „Zelenej hałžce“.
Městna hišće swobodne
Budyšin. Za kubłansku jězbu župy „Jan Arnošt Smoler“, kotraž budźe sobotu, 30. septembra, su hišće městna swobodne. Serbja z Budyšina a Budyskeje wokoliny su wutrobnje přeprošeni sobu jěć. Štóž ma zajim, njech so prošu pola regionalneje rěčnicy Katje Liznarjec pod telefonowym čisłom 03591 550211 přizjewi. Wotjězd je w 9 hodź. wot Lawskich hrjebjow. Lětsa podadźa so na kołopuć Šěracha w Budyšinku. Po wobjedźe w Njeswačidle budu pola Šołćic w pčólnicy „Regina“ w Konjecach na wopyće. Jězba płaći na wosobu 30 eurow.
Předstaji stawizny wsy
Radwor. Stawizny Chelna steja w srjedźišću přednoška Pětra Wałdy jutře, pjatk, w 19.45 hodź. w Radworskim Słodeńku. Na to chór Meja wšitkich zajimcow wutrobnje přeprošuje.
Radźićeljo wuradźuja
Konjecy. We wobłuku komunow zarjadniskeho zwjazka Při Klóšterskej wodźe so jutře hnydom tři gmejnske rady zetkaja. Posedźenje radźićelow Ralbic-Róžanta započnje so we 18 hodź. w Konječanskej Burskej stwě. Tam zaběraja so znowa z móžnej fotowoltaikowej připrawu, kotruž chce Mišnjanska firma w Delanach twarić. Dale porěča wo zwyšenju staršiskeho popłatka za Ralbičansku pěstowarnju.
Worklecy. Wot 19 hodź. wuradźuja Worklečanscy radźićeljo w tamnišej šuli. Tež na jich dnjowym porjedźe steja staršiske popłatki za hladanje dźěći w pěstowarni. Nimo toho chcedźa wohnjowoborny plan za swoju gmejnu kaž tež přidatne wudawki za nowy traktor wobzamknyć.
Njebjelčicy. Tohorunja w 19 hodź. zetkaja so Njebjelčanscy radźićeljo w gmejnskej sydarni. Mjez druhim póńdźe wo twarske wustawki w Serbskich Pazlicach a wo twarski plan w Pěskecach. Skónčnje póńdźe wo stejišćo k přirodoškitnym kompensaciskim naprawam. Wobydlerjo su na zjawne posedźenja wutrobnje přeprošeni.
Tomaš Žur koncertuje
