Zwukowu instalaciju dožiwić

Mittwoch, 21. Februar 2024 geschrieben von:
Rakecy. Nowu spirituelnu zwukowu instalaciju k temje „Lubowany“ móža wopytowarjo w Rakečanskej ewangelskej cyrkwi dožiwić. Wuwił a zwoprawdźił je ju znowa komponist Norbert Binder z podpěru tamnišeho Pawołskeho chóra. Zdobom su solisća a dźěćacy chór 6. lětnika Pawołskeje šule sobu zapřijeći. Wot Heika Hahnelta programěrowane swětłowe efekty hudźbu z 21 wótřerěčakow wizuelnje podkładu. Instalacija je hač dosrjedź měrca wšědnje wot 9 do 20 hodź. přistupna. Zastup je darmotny.

Prewencija sobu najwažniša

Mittwoch, 21. Februar 2024 geschrieben von:

We Wojerecach prócuje so policija wo dowěrliwe dźěło z wobydlerjemi

Wojerecy (AK/SN). Wuske zhromadne dźěło města Wojerecy z tamnišim policajskim rewěrom wotbłyšćowaše so na minjenym posedźenju tamnišeje měšćanskeje rady. Nawoda rewěra, policajski hłowny komisar Tobias Hilbert, po­rěča wo tuchwilnym dźěle policije a wo někotrych statistiskich ličbach. Nimo přepytowanjow aktualnych padow ma prewencija prioritu. 2021 su we Wojerecach komunalnu radu za prewenciju załožili a naprašowanje wobydlerjow přewjedli. Wuslědk bě, zo je 70 procentow ludźi z dźěłom policije spokojom.

Namołwjeja zaso wotpadki zběrać

Mittwoch, 21. Februar 2024 geschrieben von:

Wšudźe při hłownych a pódlanskich pućach wuhladaš stajnje zaso najwšelakoriše wotpadki. Jich paleta saha wot prózdnych cigaretowych tyzow hač k piwowym a palencowym blešam. ­Tohodla wotměja so w měrcu zaso dny hromadźenja wotpadkow.

Budyšin (SN/MWj). Wot 4. do 24. měrca namołwjeja Njeswačanska přirodoškitna stacija, přirodoškitny centrum Hornjo­łužiski hórski kraj a wotpadkowy zarjad Budyskeho krajnoradneho zarjada k dnjam hromadźenja wotpadkow. Mjeztym třeći raz wuhornu sej ludźo w Budyskim wokrjesu stajnje w tydźenjach do jutrow rukawy a zhromadnje wotpadki hromadźa. Wuhotowani z rukajcami, měchami a zdźěla z přimadłami ćahnu woni po krajinje a wotpadki zběraja – wotpadki, kotrež druzy bjez přemyslowanja z awta ćisnu abo w najhóršim padźe samo w lěsu wotkładuja. Na te wašnje móžachu w minjenymaj lětomaj hižo wjacore kontejnery połne wotpadkow nazběrać a je tak fachowje wotstronić. Při tym njejednaše so jenož wo zbytki cigaretow, kofejowe nopaški abo bleše, ale ­samo wo awtowe wobruče a šrót.

Swój projekt BOOKii-kluba staj rěčnaj motiwatoraj Marija Šołćic (2. wotlěwa) a Lucian Kaulfürst wčera we Wojerowskim domje ­Domowiny dale wjedłoj. Za dopołdniši termin bě samo wjace zajimcow hač městnow. Popołdnju so dalši wobdźělnicy z techniskimi ­móžnosćemi nawuknjenja serbskeje rěče zeznajomichu. Předewšěm so wobdźělnicy za to zajimowachu, kak móža z pomocu BOOKii-pisaka zwuki a sady natočić a na přikład w fotowym albumje za pozdźiše generacije składować. Foto: SN/Bojan Benić

Njewěstosć wysokodoma dla

Mittwoch, 21. Februar 2024 geschrieben von:
Wjeselo na jednym a njewěstosć na druhim boku wuprudźa tuchwilu tak mjenowany módry wysokodom na Lipšćanskej dróze w Choćebuzu. Twarske róšty su wot­twarjene. Nětko błyšći so fasada ponowjeneho 13poschodoweho domu w nowych barbach. Tež w domje twarske dźěła pokročuja: Nastać maja bjezbarierne bydlenja wosebje za staršich a zbrašenych ludźi. Starosće zbudźa pak njewěsty přichod: Dotal předwidźany hłowny podružnik, hladanske předewzaće z braniborskeho Nauena, je w insolwency. Mnozy přistajeni su njewěsteho přichoda dla wupowědźili. Nětko ­pytaja z wotmachom za nowym wobhospodarjom. Foto: Michael Helbig

Krótkopowěsće (21.02.24)

Mittwoch, 21. Februar 2024 geschrieben von:

Wotewru Astrocentrum Łužica

Zhorjelc. Zwjazkowa ministerka za slědźenje Bettina Stark-Watzinger (FDP) a sakski ministerski prezident Michael Kretschmer (CDU) wotewrětaj jutře w Zhorjelcu na Póstowym naměsće interimne stejišćo Astrocentruma Łužica. Na to wotměwaja so podijowa diskusija a přednošk kaž tež wjedźenje po tuchwilu přistupnych rumnosćach.

Kandiduja za wólby sejmika

Budyšin. K wólbam Budyskeho wo­krjesneho sejmika 9. junija je tudyši wo­krjesny zwjazk Zwjazka 90/Zelenych 37 wosobow nominował. Mjez nimi su Serbaj a Serbowka. Pětš Jahn-Brězan z Debšec kandiduje we wólbnym wokrjesu (wk) 2, Marija Untchowa z Bóšic we wk 5 a Julian Nyča z Prěčec we wk 7. W Bóšicach, Rakecach a Budestecach Zeleni k wólbam gmejnskich a wjesnych radow nastupja.

Hrajerjo małych rólow pytani

Jězba pčołarjomaj wěnowana

Dienstag, 20. Februar 2024 geschrieben von:
Budyšin. Budyska, Kamjenska a Wojerowska župa přewjedu sobotu, 16. měrca, zhromadnu kubłansku jězbu do Berlina. Wona je wěnowana pčołarjomaj Hadamej Bohuchwałej Šěrachej a Słowjencej Antonej Janči. Na programje steja wopyt wustajeńcy wo pčołkach a ludźoch, wobjed, zetkanje ze zastupjerjom mjeńšinoweho sekretariata a wodźenje po wopomnišću Berlinskeje murje. Nimo toho je dosć swobodneho časa. Bus wotjědźe w 7.30 hodź. w Chrósćicach na busowym zastanišću wosrjedź wsy. Přistupić móža wobdźělnicy dale w 7.50 hodź. w Kulowje (na wikach) a w 8 hodź. Němcach (blisko „Netto“). Wotjězd domoj budźe w 17.30 hodź. Přizjewjenja přijimuja hač do 1. měrca w regionalnych běrowach Domowiny. Wobdźělenje na wosobu płaći 30 eurow. Zastaranje płaći kóždy sam.

Šansa a nadawk za přichod

Dienstag, 20. Februar 2024 geschrieben von:

Hamor (AK/SN). Za Hamorsku gmejnu z jeje 18 wjesnymi dźělemi ma integrowany gmejnski wuwićowy koncept nastać. Kaž gmejnscy radźićeljo na swojim zašłym posedźenju wobzamknychu, ma planowanski běrow z Radeberga nadawk we wobjimje 49 000 eurow dóstać.

„Koncept je nadawk a zdobom šansa. Z nim móže so naša gmejna jako cyłk ­dale wuwić“, wuzběhny zastupowacy wjesnjanosta Claudius Urban (Hamorske wolerske zjednoćenstwo). „Wažne nětko je, wobydlerjow a wjesne rady při zdźě­łanju koncepta sobu zapřijeć. Dyrbimy sej přezjedni być, kotre wobsahi móhli zapřijeć.“ Zaměr koncepta je, strategiski zakład za přichodne wjesne wuwiće Hamorskeje gmejny stworić. Koncept ma sylnosće a słabosće wopisać, zaměry formulować a wuwićowe strategije kaž tež konkretne naprawy mjenować.

Čłonojo towarstwa rady pućuja

Dienstag, 20. Februar 2024 geschrieben von:
Swoje mjeztym hižo šeste pućowanje w tymle lěće je sobotu Wojerowske Łužiske pućowanske towarstwo wokoło Narća w gmejnje Halštrowska Hola přewjedło. ­Nimo sportoweje zaběry stejitej w srjedźišću towarstwoweho žiwjenja wožiwjenje turizma a sposrědkowanje regionalnych wosebitosćow. Tak stejachu na programje hižo pućowanja po Krabatowej šćežce a k Zelderec hatam blisko Kulowa. Tónraz podachu so čłonojo towarstwa ze swojim předsydu Güntherom Voigtom z Wojerec do směra na Kosakec hrjebju a bywši młyn Wassenburg do Narća. Po wobjedźe zaso domoj nóžkowachu. Foto: Silke Richter

Policija (20.02.24)

Dienstag, 20. Februar 2024 geschrieben von:

Wroble alarm zawinili

Wojerecy. Awtomatiski alarm je wčera rano we Wojerecach zasadźenje policije wuskutkował. Sobudźěłaćerjo wěstotneje słužby zdźělichu, zo su alarm w nakupowanišću při Kamjenskim kole registrowali. Na městnje policisća „skućićelow“ spěšnje wuslědźichu. Jednaše so wo wjacore wroble, kotrež běchu w nakupowanišću zamknjene, w nim tam a sem lětachu a na te wašnje alarm zawinichu. Z tym bě za zastojnikow zasadźenje wotzamknjene. W běhu wčerawšeho dnja móžachu ptački zaso do swobody lećeć.

Serbska debata

Neuheiten LND