Camprowanje Noweje Wjeski

Freitag, 09. Februar 2024 geschrieben von:
Štož ći mali w Němcach pokazuja, to tež starši camprowarjo druhdźe zamóža, kaž na přikład tele dny w Nowej Wjesce. Na tradiciji camprowanja, kotraž so tež w Horjanach pěstuje, je so lětsa zaso horstka zahoritych wjesnjanow wobdźěliła. Nalada a wjedro běštej rjanej a tuž so zhromadne spěwanje radźeše. Tu a tam wabjachu camprowarjo tež do rejki, tež hdyž žortnje woblečeni hižo tradicionalne kostimy njewužiwaja, kajkež běchu něhdy stari Serbja zhotowani byli. Foto: Franzisko Wenk

Nowy hladanski direktor

Freitag, 09. Februar 2024 geschrieben von:

Kamjenc (SN/MiR). Wot spočatka tohole lěta skutkuje w chorowni swj. Jana w Kamjencu nowy hladanski direktor. Zdobom je Michael Rasche za 210 sobudźěłaćerjow ze wšelakich wobłukow zamołwity. To su mjez druhim hladanska stacija, socialna słužba kaž tež fyzioterapija.

45lětny Zebničan ma wobšěrne praktiske nazhonjenja ze swojeho dotalneho skutkowanja w Bad Tölzu a w Arnsdorfje kaž tež w nadregionalnej hladanskej słužbje. „Sym w swojich dotalnych powołanskich lětach fachowje tójšto nawuknył a so dalekubłał“, praji Michael Rasche. Po wukubłanju na hladarja chorych je wón dwulětne fachowe wukubłanje jako intensiwny hladar w Drježdźanach-Friedrichstadtće nastupił. Pozdźišo běše wón mjez prěnimi sobudźěłaćerjemi w Arnsdorfskej chorowni, jako bu tam neurologiska intensiwna stacija natwarjena.

Policija (09.02.24)

Freitag, 09. Februar 2024 geschrieben von:

Kozoł, byk a konje ćeknyli

Němcy/Rakecy. W Němcach je sej wčera, krótko po połnocy, kozoł swobodu popřał. Njedaloko njeho wuhladachu policisća tři swobodnje běhace byki. Mějićel ležeše hišće we łožu, jako policisća klinkachu. Tři hodźiny pozdźišo běhachu wjacore konje po Rakecach. Policisća su wobsedźerjow wuslědźili. We woběmaj padomaj su zastojnicy a mějićeljo zwěrjata popadnyli a wróćo do hródźow dowjezli.

Twar pěstowarnje postupuje

Freitag, 09. Februar 2024 geschrieben von:

Gmejna Slepo chce pěstowarnju „Milenka“ lětsa hišće dotwarić

Slepo (AK/SN). Nowotwar Witaj-pěstowarnje „Milenka“ Rowno, kotraž je w nošerstwje gmejny Slepo, pokročuje. Tole podšmórny Steffen Seidlich, nawoda zarjada za planowanje, twarstwo a hórnistwo w zarjadniskim zwjazku Slepo, wutoru na posedźenju gmejnskeje rady. Ta je tomu přihłosowała, zo ma firma Sebastiana Krügera z Brězowki pola Slepoho třěchu kryć. Suma wučinja 146 000 eurow. „Wot kónc januara mulerske dźěła pokročuja“, Seidlich wuswětleše, „wjedra dla pak dyrbješe firma dźěła nachwilnje zastajić. Mjeztym su poskitki předewzaćow za dalše twarske nadawki kaž za elektrotechniku, tepjenje a sanitarne připrawy, za přewětrjenje a klimowu připrawu kaž tež za zatwar wěstotneje techniki dóšli. „Poskitki“, tak nawoda twarskeho zarjada, „ma nětko planowanski běrow Karstena Lehmanna w Běłej Wodźe wuhódnoćić. Wuradźowanja wotměwaja so w přichodnym techniskim wuběrku. A wobzamknjenja slěduja na gmejnskej radźe w měrcu.“ Zaměr wšeho je pěstowarnju hišće lětsa dotwarić.

W skromnej mapje schowane

Freitag, 09. Februar 2024 geschrieben von:

Na mapje steješe napis „Pismowe proby“. Nichtó njebě sej myslił, zo chowa so w njej woprawdźity pokład. W Budyskim měšćanskim archiwje měješe měšćanski archiwar Rico Heyl zbožo, zo je w runje wonej mapje kedźbnosć zbudźacu namakanku našoł.

Budyšin (CS/SN). W mapje ležeše štyri strony wopřijacy, we łaćonšćinje spisany noticny zešiwk, z časa wokoło lěta 1400. Pozdaću dźe wo zapiski čitanja, w kotrymž běchu so přitomni z wobličenjom časa a kalendra zaběrali.

W delanskich kónčinach hač do Kulowa pěstuja wobydlerjo wsow hižo do póstnic stary nałožk camprowanja. Tak je to tež w Němcach z wašnjom. Tele dny su so tam dźěći, starši a kubłarjo Witaj-pěstowarnje „Pumpot“ na puć nastajili, zo bychu ­wobydlerjam zaspěwali a pjenježne dary zběrali. W pisanych kostimach, z instrumentami a mócnymi hłosami su po wsy ćahajo na so skedźbnili a wjesnjanow zawjeselili. Wutrobnje dźakuja so mnohim darićelam. Foto: Jana Mejglowa

Krótkopowěsće (09.02.24)

Freitag, 09. Februar 2024 geschrieben von:

Popjelnu srjedu w Budyšinje

Budyšin. Na 30. politisku popjelnu srjedu přeproša Budyski zapósłanc CDU w krajnym sejmje Marko Šiman do hale „Króny“. Rěčnik je něhdyši prezident zwjazkoweho sejma Norbert Lammert. Wot 18 hodź. móžeš do hale, spočatk je w 19 hodź. Lěwica wotměje w Röhrscheidtowej bašće wječork (17.30/18 hodź), mjez rěčnikami je Walter Baier, awstriski prezident europskeje Lěwicy.

Nory přeprošuja na přećahi

Kinspork/Kulow/Mužakow/Šěrachow. Kónc tydźenja hotuja so nory we Łužicy na póstniske přećahi. Tak přeprošuja sobotu w dwěmaj do Kinsporka, Kulowa a Mužakowa na ćah norow. Njedźelu móža sebi zajimcy do Šěrachowa dojěć. Start je tam tohorunja w dwěmaj. Róžowu póndźelu přeprošuje Kulowske póstniske towarstwo potom na tradicionalny wulki přećah po měsće, kotryž započina so w 13.30 hodź.

Zymica dale zachadźa

Rewitalizuja karpowy hat

Donnerstag, 08. Februar 2024 geschrieben von:

Hižo wot spočatka lěta při Łučinskim haće (Litzenteich) blisko Radworja dźěłaja. Z wulkimi mašinami wubagruja tam błóto wot dnja hata. Što so za dźěłami chowa, wě Madlena Mičkec.

Mičkec je přistajena Přirodoškitneje stacije Njeswačidło z.t. a za projekt zamołwita. Wot spočatka lěta 2021 maja tam projekt pod mjenom „MoSaikTeiL – bahna, pěsk, chójny a haty – nowe přistupy k naslědnemu wuwiću Hornjołužiskeje hole a hatow (Hotspot 20)“.

Za chětro wobšěrnym projektnym titulom chowa so poměrnje jednory nadawk, kaž pisaja projektowi zamołwići na swojej internetowej stronje (kotraž je wot januara 2024 tež hornjoserbsce přistupna): Koordinaciscy partnerojo, ke kotrymž słuša nimo Přirodoškitneje stacije Njeswačidło z.t. tež Přirodospytna towaršnosć Hornjeje Łužicy z.t. a Senckenbergowy muzej za přirodopis Zhorjelc, wuwiwaja a přewjeduja w Hornjołužiskej krajinje hole a hatow we wobłuku projekta přirodoškitne naprawy, kotrež so přez wědomostny monitoring přewodźuja, a chcedźa kubłanske poskitki rozšěrjeć.

Dróhu wutwarić

Donnerstag, 08. Februar 2024 geschrieben von:
Bóšicy (SN/MiR). Bóšičanska gmejna dyrbi dróhu mjez Wětrowom a Nowymi Bóšicami wutwarić. To je w prěnim rjedźe njepřewidnosće w lěsu dla trěbne, hdźež je jězdźenje wosebje za nakładne awta wobćežne. Po tutej čarje kóžde druhe lěto jězdźidła we wobłuku wubědźowanju „Bóšičanski třiróžk“ jědu. Wutwar dróhi ma šoferam oldtimerow prezentaciju swojich wukonow wolóžić. Bóšičanska gmejnska rada je tuž wutoru wječor, na swojim prěnim zeńdźenju w tymle lěće wobzamknyła, zo ma wjesnjanosta Stanij Ryćer (rjemjesło Bóšicy) trěbne jednanja z mějićelemi tamnišich ležownosćow wjesć. Wobsedźerjej płoninow, jedyn z Wětrowa a dalši z Bóšic, chcetaj něhdźe pjeć metrow šěroku kromu swojich polow předać. Ryćer zdobom připowědźi, zo so „Bóšičanski třiróžk“ lětsa w nalěću zaso wotměje.

Policija (08.02.24)

Donnerstag, 08. Februar 2024 geschrieben von:

Zarjadowanju zadźěwali

Wojerecy. W kompleksu twarjenjow na dróze E we Wojerecach chcychu prawicarjo minjenu sobotu party wotměć. Zhorjelska policajska direkcija pak je planowanemu ilegalnemu zarjadowanju zadźěwała. Te bě jako narodninski swjedźeń z live-hudźbu z praweje sceny deklarowane. Zastojnicy z Wojerowskeho rewěra, jednotki z policajskeju direkcijow Zhorjelc a Kamjenicy, kaž tež hotowostna policija běchu na městnje. Při kontroli před ležownosću zarjadowanja su zastojnicy hač do rańšich hodźin něhdźe 250 wosobow kontrolowali. Při tym sćazachu wšelake zynkonošaki, kotrež nětko chłostanskoprawnisce přepruwuja. Zdobom zastojnicy wothrawanju live-hudźby zadźěwachu. Mjeztym pruwuja tež prawniske konsekwency za zarjadowarjow.

Serbska debata

Neuheiten LND