Kermušne reje z 250 wopytowarjemi
Hdyž po alkoholu heja brunči
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (56).
Mnozy z nas popřewaja sej na kermušu rady raz škleńčku wina, piwa abo palenca. Tón abo tamny tež dwě, tři abo hišće wjace. Hdyž nazajtra z brunčatej heju wotućiš, potom wěš, zo bě to dźeń do toho přewjele alkohola. Tajku konstelaciju mjenujemy kocora, hižo dołho znaty fenomen. Wón wopřijima wšelake symptomy: na přikład hłowybolenje, mjakliwosć, lačnotu, mylenja koncentracije, bolosće w žołdku a w myškach, poćenje, depresiwnu naladu a powšitkownu chorowatosć. Hdys a hdys přez zahorjenje slinokóžki žołdka tež k bluwanju dóńdźe. Kocor wukonliwosć čłowjeka masiwnje wobmjezuje.
Krótkopowěsće (22.10.24)
Mjenje zwyšenja wotedawkow
Budyšin. Krajnoradny zarjad Budyšin je naćisk za etat 2025/26 změnił: Tak namjetuja wokrjesnemu sejmikej zwyšenje wotedawkow gmejnow na 34,5 proc. a nic kaž planowane na 35 proc. (2025) resp. 35,5 (2026). Dotalna sadźba je 33,5 proc. To staj krajny rada Udo Witschas a jeho zastupjer a zamołwity za financy Jörg Szewczyk zdźěliłoj. Přičina je wjac dochodow z dawkow hač su wočakowali.
Krosnowanje wuznamjenjene
Drježdźan. Sakske krosnowanje wuznamjenja so jako imaterielne kulturne herbstwo Unesco, zo bychu swoju tradiciju a specielne prawidła wobchowali a pěstowali. Oficialne wopismo přepodadźa wutoru we Wiesbadenje, po tym zo bu titul w měrcu wobzamknjeny. Tuta družina krosnowanja, bazuje na principje wólneho krosnowanja bjez kumštnych pomocnych srědkow, zo by so mjechki pěskowc Sakskeje Šwicy škitał.
Worklečanska šula nominowana
Policija (22.10.24)
Wopačni policisća seniora zjebali
Slepo. Njeznaći skućićeljo su sobotu wječor w Slepom 90lětneho muža zjebali. Jako policisća so wudawajo běchu škodowaneho w běhu dnja wospjet zawołali a jemu zdźělili, zo přepytuja pad wobšudnistwa w jeho susodstwje a zo dyrbja w tutym zwisku tež jeho bydlenje přepytować. To sta so bórze po tym, jako přińdźe jedyn ze skućićelow jako zastojnik kriminalneje policije předrasćeny mužej „na wopyt“, zo by přepytowanje přewjedł a mjez druhim zwěsćił kelko hotowych pjenjez ma w bydlenju „składowanych“. Wobšudnik nadeńdźe dohromady něhdźe 20 000 do 30 000 eurow, kotrež w njewobkedźbowanym wokomiku pokradny a spěšnje bydlenje wopušći. Nětko je „prawa“ kriminalna policija přepytowanja zahajiła. Policija zjawnosć na to skedźbnja, zo nihdy přepytowanje nastupajo w bydlenju składowane zamóženstwa njepřewjeduje.
Z přirodu swoje mocy měrić
Sprjewje. Na wosebite dožiwjenje za cyłu swójbu přeprošuje přirodoškitna stacija wuchodna Hornja Łužica do hrodu w Sprjewjach a to njedźelu, 27. oktobra, wot 10 do 14 hodź. Pod hesłom „Přiroda je sylna – sy ty sylniši?“ chce mjez dźěćimi a młodźinu zahoritosć za přirodu budźić. Mjez druhim nawuknu, kak sej z přirodnych materialijow přirodny dešćowy škit natwarja, sami woheń zapala abo so bjeze šmóratka w lěsu orientuja. Dalše informacije dóstanjeće pod tel. čo. 035893 508571 abo z mejlku na .
Gmejnska rada we Worklecach
Worklecy. Wjesnjanosta gmejny Worklecy Clemens Poldrack přeprošuje wutrobnje na zhromadźiznu gmejnskeje rady, kotraž wotměje so jutře, 23. oktobra, w rjadowni čo. 10 šule „Michał Hórnik“ we Worklecach. Započatk zjawneho dźěla posedźenja je we 18.30 hodź.
Koncert w awli gymnazija
Ewent za wšitke generacije
Chróšćanski młodźinski klub lětsa druhi raz „Aurora Nights“ zarjadował
Chrósćicy (SN/lmc). Pod hesłom „Aurora Nights“ su minjeny kónc tydźenja zajimcy wšitkich generacijow do Chróšćanskeje „Jednoty“ na zhromadne rejowanje a hejsowanje přeprošeni byli. Lětsa druhi raz je tamniši młodźinski klub zarjadowanje organizował, kotrehož lětne Ü30-partyje wšak dawno hižo legendarne su. Hižo wot wutory sem přeměnichu młodostni wjacezaměrowu halu w Chrósćicach do pisaneje městnosće za kónctydźenski spektakl. Hač hudźbny wuběrk abo wosebite kreacije napojow – poskitk organizatorow běše wulki a je zawěsće přeće kóždeho jednotliwca spjelnił. Tež hladajo na dekoraciju běchu młodostni wjele prócy nałožowali. Z tójšto elementami w jaskrawych neonowych barbach su „Jednotu“ wudebili. Tak mjenowana čorna swěca stwori w rumje atmosferu polarneje nocy
Wječor wo lubosći we wšelakich dobach
Budyšin (CS/SN). Hudźbno-literarnemu wječorkej z titulom „Lubosć nade wšitkim“ bych wjace publikuma popřała. Jenož něhdźe 30 hosći běše sobotu do Budyskeho młodźinskeho zetkawanišća TiK přišło. Wuměłsce wuhotowała je zarjadowanje skupina LAAWA. Njewšědne mjeno su čłonojo hudźbneho cyłka z prěnjeho pismika swojich předmjenow stworili: spěwarka Luise Wizisla, pianistka Anja Konjen, basist Alban Konjen, bubnowar Wenzel Konjen a basnik Andreas Hennig ze swojimi lyriskimi kaž tež z tekstami prozy. A na swojej hubnej harmonice je wón někotrejžkuli pěsni přidatnu hudźbnu fasetu spožčił. Bratraj Wenzel a Alban Konjen staj synaj pianistki Anje Konjen. Ze swojim hudźbnym talentom staj wobaj hižo jako chowancaj Budyskeje wokrjesneje hudźbneje šule na so skedźbnjałoj, hdźež jeju mać tež hraće na klawěrje wuwučuje.
Z elanom wutrobu hosći zdobyli
Na nazymskim koncerće Domowiny wčera popołdnju w Ćiskowskim „Zelenym wěncu“ su sej młodźi rejowarjo Serbskeho folklorneho ansambla Wudwor ze swojimi rejemi połnych wjesołeho elana spěšnje wutroby publikuma zdobyli. Wo rjanu wotměnu w programje su so spěwarjo Přezpólnych ze swojimi serbskimi ludowymi pěsnjemi, mjez nimi někotre ze zběrki spěwow Jana Arnošta Smolerja z lěta 1841, postarali. Čłon hudźbneho ćělesa Fabian Kaulfürst je tež z tej abo tamnej lóštnej anekdotu wopytowarjow w nimale połnym hosćencu zawjeselił.
Foto: Johann Tesche
Krótkopowěsće (21.10.24)
Fyziska karta RCW wušła
Budyšin. Rěčny centrum WITAJ (RCW) je w kooperaciji z koordinatorkami serbskich zakładnych šulow Chrósćicy, Ralbicy, Worklecy a Pančicy-Kukow nowu serbsko-němsku fyzisku kartu wokrjesa Budyšina wudał – hłownje za předmjet wěcna wěda 3. a 4. lětnika. A3-kartu móže kóžda šula darmotnje skazać. Šulerjo móža sej ju do mapy zaspinkować, wučerjam steji tež download k dispoziciji.
Škit klimy w Zhorjelcu
Zhorjelc. Wot oktobra staj Florian Reß a Robert Knothe nowaj klimowaj manageraj za wokrjes. Zaměr je wuwiće integrowaneho klimoškitneho koncepta, kotryž słuži jako strategiski zakład za wšitke klimoškitne aktiwity we wokrjesu. Přez wobšěrne naprawy maja so negatiwne wuskutki na klimu pomjeńšić a dołhodobne zalutowanja kóštow docpěć.
Zmjerzki tež lěsam škodźeli
Gmejnska rada w Chrósćicach
Chrósćicy. Radźićeljo Chróšćanskeje gmejny schadźuja so štwórtk, 24. oktobra, w 19 hodź. w sydarni „Łužica“ w Chróšćanskim gmejnskim a kulturnym centrumje. Na zjawny dźěl na spočatku posedźenja su wšitcy wobydlerjo gmejny wutrobnje přeprošeni.
Na Serbski dźeń w Bukecach
Bukecy. Na lětuši Serbski dźeń w Bukecach přeprošujetej Bukečanska Bjesada a Serbske ewangelske towarstwo wšitkich zajimowanych zbliska a zdaloka a to sobotu, 26. oktobra. Dźeń zahaji so z dźěłarničku Bjesadow w ewangelskej šuli w Bukecach, na Šulskej dróze 7. w 14 hodź. z witanjom a nutrnosću. Po rěčnych zwučowanjach a konwersaciji kaž tež předstajenjom rěčnych motiwatorow projekta ZARI je zhromadna swačina. W 16 hodź. wočakuje pěstowarske a šulske dźěći kaž tež serbsce wuknjacych dorosćenych dwurěčne dźiwadło „Čmjeła Hana wočakuje wopyt“ na wosadnej žurli při farje. Zastup je darmotny. Wot 17.30 hodź. zaspěwa žónski ansambl Jarobinka, kotryž je mnohim ze swojimi pěsnjemi w filmje „Pola nas rěka wona Hanka“ znaty.
