Serbscy studenća chcyli schadźowanku zaso w Budyskej „Krónje“ swjećić. Njeje-li to móžno, měła Załožba za serbski lud nimo NSLDź tež Chróšćansku „Jednotu“ jako swjedźenišćo pruwować.
Chrósćicy (SN/JaW). Serbscy studenća wuprajeja so přećiwo tomu, zo wutworja w Budyšinje wulke kubłanske zarjadnišća. Wo tym informowaše zastupnik Zwjazka serbskich studowacych (ZSS) župy „Jan Skala“ Damian Dyrlich čłonow Zwjazkoweho předsydstwa Domowiny na jich posedźenju dźens tydźenja w Chrósćicach. „Studenća měnja, zo měło wšitko tak wostać, kaž je. Tež přeměstnjenje sorabistiki z Lipska do Drježdźan my studenća wotpokazujemy“, zwurazni Dyrlich. Po jeho a měnjenju studentow dyrbja młodźi Serbja Łužicu a tak serbski sydlenski rum tež raz wopušćić a swój horicont rozšěrić. „Tež němčina jako wuwučowanska rěč njeměła problem być. Serbski duch wšak dyrbjał skrućeny dosć być, zo serbscy młodostni na swoje korjenje a swoju maćeršćinu njezabudu“, argumentowaše Dyrlich.