Wo přichodnym wužiwanju rumnosćow noweho Lawskeho areala a Serbskeho domu rěčeli a namjety zběrali
Serbske institucije w Budyšinje koncentrować abo tola na wsy přeměstnić? To bě jenož jedne z prašenjow, kotrež načachu wobdźělnicy njedawneje 1. idejoweje dźěłarnički Załožby za serbski lud na žurli Budyskeho Serbskeho domu. Načachu, dokelž bě direktor załožby Jan Budar na hinašu temu přeprosył, mjenujcy rozjimać, što měli do noweho serbskeho centruma na Budyskich Lawskich hrjebjach, tak mjenowaneho Lawskeho areala, přewzać. „Přeju sej wobšěrnu diskusiju, wšitko je móžne a ničo njeje wuzamknjene“, namołwješe direktor Budar do diskusije.