Zwjazkowe předsydstwo je minjeny pjatk jara jasnje dopokazało, zo njeje Domowina sprawna maklerka nutřkoserbskeje demokratije. Wólby čłonow rady Załožby za serbski lud a jich zastupjerjow stachu so z farsu. Domowina drje mjenuje so zastupnica zajimow Serbow a chce wot politikarjow jako tajka připó­znata być. Wot politiskeje runiny dowěrjeny nadawk, zjawno-prawniske wólby do załožboweje rady přewjesć, pak je wona za swójske towarstwowe pozicije znjewužiwała. Demokratija po słodźe serbskeho třěšneho zwjazka rěka, wšitcy maja so jemu podrjadować. Pjatk wječor je nazornje zwobraznił, zo njeje demokratiske wobdźělenje wšěch prudow w Serbach móžny, dokelž Domowina tomu zadźěwa. Ze wšěmi ­trikami, kotrež znajemy předewšěm z politiki. A cyle připódla je zwjazkowe předsydstwo prosće na to zabyło, před kotrym wužadanjom nowa załožbowa rada steji. Wojowanje w hrjebjach zda so wažniše być hač wobsahowe dźěło. Axel Arlt

We wobłuku wurjadneho posedźenja woli Zwjazkowe předsydstwo Domowiny jutře serbskich čłonow ze Sakskeje do rady Załožby za serbski lud. Z palacej temu, hač smědźa nawodni woleni zastupjerjo w třěšnym zwjazku zdobom stronski mandat wukonjeć, pak zaběraja so hakle na jednym z přichodneju rjadneju posedźenjow.

Budyšin (SN/at). Wólby serbskich čłonow ze Sakskeje do rady Załožby za serbski lud su po namjeće za dnjowy porjad hłowny dypk jutřišeho wurjadneho posedźenja Zwjazkoweho předsydstwa Domowiny w Budyšinje. Kak pak wupada z palacej politiskej naležnosću, hač datej so zastojnstwo předsydy narodneje organizacije a mandat za politisku stronu w samsnej wosobje zjednoćić? Prezidij Domowiny bě so loni do hód z tym zaběrał a naležnosć k dalšemu wobjednanju zwjazkowemu předsydstwu namjetował. Wuchadźišćo bě tójšto kritiki wubudźace wothłosowanje Dawida Statnika jako wokrjesneho radźićela CDU za namjet AfD. Z tym je wosoba Statnik zastojnstwo předsydy Domowiny wobškodźiła, za čož je so wón zjawnje zamołwił.

Čěscy přećeljo Serbow su tež lětsa zaso přikładni mostytwarcy mjez Čechami a serbskej Łužicu – to wuchadźa z jich plana terminow a předewzaćow, kiž je wuraz zwjazanosće z našim ludom.

Praha/Budyšin (SN/mb). Hłowny nadawk towarstwa „Společnost přátel Lužice“ (SPL) w Praze budźe lětsa wobnowjenje časopisa „Česko-lužiský věstník“, praješe předsyda Lukáš Novosad Serbskim Nowinam. Mjez abonentami a awtorami „Věstníka“ su tež Serbja. So wě, zo je protyka SPL po kóncu pandemije zaso derje pjelnjena. Tam namakaš nimo swójskich zarjadowanjow klasiske serbske wjerški kaž ptači kwas abo schadźowanku, na kotrychž čěscy přećeljo Serbow rady podźěl bjeru. Wězo planuja zaso za jutry wulět z wulkej skupinu do Łužicy.

„Štyri knihi dyrbimy dokónčić“, připowědźi Lukáš Novosad naročny program: „čitanku modernych poćahow mjez Serbami a Čechami, monografiju Ladislava Futtery wo mjez- a powójnskich čěskich manifestacijach za podpěru Serbow, zběrku Herty Wićazec a nowu zběrku basnjow z pjera Milana Hrabala, kotraž so tuchwilu ćišći.“

Malešecy (SN/at). W Malešanskej Domowinskej skupinje njeje klětuši dźěłowy plan jeno schwaleny, prěnje terminy su samo hižo dojednane. To rozprawja Maritta Schneiderowa z tamnišeho skupinskeho předsydstwa. „14. meje budźe znowa koncert w Malešanskej cyrkwi. Wustupić měł tam chór. Kotry to budźe, hišće njewěmy. Bychmy sej pak chór 1. serbskeje kulturneje brigady přeli“, wona wuzběhny. Budźe to druhi wot Domowiny organizowany koncert w tamnišim Božim domje. W Malešanskej wosadźe běchu najprjedy skeptiscy nastupajo tajki koncert w cyrkwi a nochcychu jemu přizwolić. Po lětušim wuspěchu pak je so samo fararka Maria Ramsch za dalše tajke kulturne dožiwjenje wuprajiła. Dwě wosobje z wosady přihoty sobu podpěrujetej, wjeseli so Maritta Schneiderowa.

W januarje wjesela so skupinarjo hižo na ptačokwasny program, kotryž předstaja dźěći Witaj-pěstowarnje „K wódnemu mužej“ w bywšim hosćencu ze samsnym mjenom. Hromadźe z Domowinskej skupinu Komorow pola Klukša přeproša nazymu na swětłowobrazowy přednošk.