Štó chce na seminar?

Donnerstag, 24. Oktober 2019 geschrieben von:
Budyšin (SN). Domowina pyta młodostneho/młodostnu, kotryž/kotraž zajimuje so za europsku mjeńšinowu politiku a chcył/a sej wot 14. do 17. nowembra do Korutanskeje (Kärnten) na seminar sło­wjanskich mjeńšin Federalistiskeje unije europskich narodnych mjeńšin (FUEN) dojěć. Přizjewić móžeće so w zarjedźe Domowiny pola Clemensa Škody pod tel. 0173 / 3 51 54 40 abo e-mailnje pod . Tam dóstanjeće tež nadrobniše informacije.

Chcedźa wo wosadnym dźěle přichoda rozmyslować

Dienstag, 22. Oktober 2019 geschrieben von:

Budyšin (SN/at). Wobsteja zwučene formy ewangelskeho serbskeho wosadneho skutkowanja runje tak hišće w přichodźe? Předsyda Serbskeho ewangelskeho towarstwa (SET) a městopředsyda Serbskeho ewangelskeho zwjazka Mato Krygaŕ měni, zo tči w prašenju wužadanje, wo kotrymž maja tež w zwisku z klětušim přechodom w zastojnstwje serbskeho superintendenta rozmyslować.

W Lipsku su studenća Sorabije wčera z kermušku nowy semester witali. Józef Donat (nalěwo) a wšitcy dalši Sorabičenjo při­wza­chu dźewjeć nowačkow do rjadow Lipšćanskich studentow. Něhdźe 80 přećelow towarstwa, mjez druhim z Drježdźan a Halle­ kaž tež z Łužicy, je sej do studentskeje korčmy „Centrifuga“ dojěło. Tuchwilu hotuja so Sorabičenjo na 145. Schadźowanku w nowembrje, na kotrejž chcedźa znowa programowy dypk wuhotować, a na swoje póstnicy w februaru. Foto: Jakub Wowčer

Wjesne stawizny ju putaja

Donnerstag, 17. Oktober 2019 geschrieben von:

W redakciji Serbskich Nowin znajemy Alenku Hagerowu jako swěrnu wjesnu dopisowarku. Wona rozprawja wo tym, što so w Komorowje pola Rakec stawa a wo aktiwitach Domowinskeje skupiny Komorow-Rakecy-Trupin. Jako čłonka skupinskeho předsydstwa pak so wona jeničce na dopisowanje njekoncentruje, hdyž dźe wo wobraz Domowinskeje skupiny w zjawnosći. Tohodla je skupinsku internetnu stronu zapołožiła a so spušćomnje wo nju stara.

Skupinska předsydka Borbora Felberowa móhła nablaku dalše přičiny mjenować, čehodla je Zwjazkowe předsydstwo Domowiny Alenku Hagerowu spočatk oktobra z Čestnym znamješkom Do­mo­winy wuznamjeniło. Jeje sobudźěło na nowych serbskich wustawkach, kotrež je Ra­kečanska gmejnska rada loni nalěto wobzamknyła, ani wjesnjanosta ani w skupinskim předsydstwje něchtó paro­wać nochcył. „Alenka Hagerowa je so na wšěch tych rozmołwach z konstruktiwnymi namjetami wobdźělała“, rěkaše w lawdaciji. Tajke připóznaće na mytowanskim zarjadowanju w Serbskim domje přijimać, je Komorowčanku jara hnuło.

Kóždy hłós w interneće liči

Dienstag, 15. Oktober 2019 geschrieben von:

Njebjelčicy (SN/at). Krabatowe towarstwo je za publikumowe myto Němskeho myta za angažement nominowane, a to hnydom we wjacorych kategorijach (SN informowachu). Rozsud padnje po puću online-wothłosowanja, kotrež traje hišće hač do 24. oktobra – potajkim hač do štwórtka za tydźeń – w interneće pod https://www.deutscher-engagamentpreis­.de/publikumspreis. Nětko bychu so čłonojo Krabatoweho towarstwa wězo wjeselili, bychu-li wosebje w dwurěčnej Łužicy prawje wjele podpěraćelow měli.

Wšako je publikumowe myto lukratiwne, z mytowanskim pjenjezom 10 000 eurow zwjazane wuznamjenjenje. Loni bě Krabatowe towarstwo hižo Sakske woby­dlerske myto w kategoriji towaršnostno-socialny angažement dobyło. W padźe wuspěcha chcyło towarstwo po sło­wach předsydy Reinera Deutsch­manna dobyćerske pjenjezy za to wužiwać, zo bychu swójske skutkowanja w syći w dwurěčnej Łužicy rozšěrili.

Němske myto za angažement je třěšne myto za wobydlerski angažement. Nimo­ publikumoweho myta spožči jury dalše w pjeć kategorijach.

Wunošna rozmołwa we Wulkej Dubrawje

Freitag, 11. Oktober 2019 geschrieben von:

Kak móža so informacije wo našim ludźe­ do němskeje zjawnosće dóstać? Tele prašenje jimaše mnohich wob­dźělnikow Serbskeho wječorka wčera we Wulkodubrawskim Šnajdrec kuchinskim domje.

Wulka Dubrawa (SN/at). Župa „Jan Arnošt Smoler“ je na swoje mjeztym třeće dia­logowe zarjadowanje přeprosyła, zo bychu so Serbja, kotřiž bydla abo dźěłaja we Wul­kodubrawskej gmejnje, ze zastupjerjemi Domowiny, Rady za serbske naležnosće a rady Załožby za serbski lud rozmołwjeli. Tam zwuraznjene mysle měrjachu so na njespokojnosće, njezamjelčachu pak tež pozitiwne wuwića. Wo tajkim rozprawješe na přikład Maria Bušina. Kubłarka w žłobiku „Dźěćaca kupa“ z někotrymi dźěćimi serbsce rěči; starši to chcedźa a nawodnica prócowanje tohorunja podpěruje. „W tym nastupanju je so w našim zarjadnišću něšto na dobre polěpšiło“, zwěsći wčera wjelelětna kubłarka. Tež domizniske towarstwo w Lichanju so zaměrnišo serbskim temam přiwobroća, kaž Marja Michałkowa wuzběhny.

Dźak a připóznaće za narodne dźěło

Donnerstag, 10. Oktober 2019 geschrieben von:

Za wysoke počesćenje, Myto Domowiny, namjetowany być, to budźi rozdźělne začuća. „Ja njejsym so při tym cyle derje čuła“, přizna Lubina Dučmanowa wčera tydźenja na mytowanskim zarjadowanju narodneje organizacije w Budyskim Serbskim domje. Wona bě nadawk přewzała, so w mjenje wšitkich z Mytom Domowiny, z Mytom Domowiny za dorost a z Čestnym znamješkom Domowiny wuznamjenjenych dźakować. Za kóždym počesćenjom steja njeličene hodźiny čestnohamtskeho angažementa. Chwile sej brać a sej wuwědomić, što je jednotliwc/jednotliwča za swoju Domowinsku skupinu, za župu abo towarstwo wukonjał/a, za to je tradicionalna swjatočnosć dźeń do załoženskeje róčnicy Domowiny prawy wokomik.

Angažement jednotliwca

Čěski Liberec přihódny cil był

Dienstag, 08. Oktober 2019 geschrieben von:

Liberec (kl/SN). Zahajenje Serbskeho kultur­neho lěta w Liberecu bě zdobom Domowinjanam Budyskeje župy „Jan Ar­nošt­ Smoler“ a Wojerowskeje župy „Handrij Zejler“ minjeny pjatk přihódny cil zhromadneje kubłanskeje jězby. 44 ludźi je připołdnju w sewjeročěskim měsće dojěło. Prěnja stacija bě w radnicy, hdźež je wyši měšćanosta Libereca Jaroslav Zámečník serbsku delegaciju z Łužicy přijał. Kaž hosćo w zhromadnej rozmołwje zhonichu, znaje wón naš lud wot časa, zo w euroregionje Nysa skutkuje.

Dalši programowy dypk bě jednej skupinje wopyt bliskeje noweje synagogi. Natwarili běchu ju w lětach 1995 do 2000 na městnje stareho, 1938 wot nacionalsocialistow zničeneho židowskeho Božeho domu. Dalša skupina wotkry sej město we wobłuku wodźenja.

Wjeršk kubłanskeje jězby pak bě, zo dožiwichu wšitcy jeje wobdźělnicy swjatočne zahajenje Serbskeho kulturneho lěta w awli Liberecskeje Techniskeje uniwer­sity, hdźež móžachu tež dalšich Serbow witać. Wječor pobychu Budyscy a Wojerowscy Domowinjenjo na předstajenju noweho oratorija „Hrodźišćo“.

Młoda kapała wobsteji dźesać lět

Dienstag, 08. Oktober 2019 geschrieben von:

Minjeny kónc tydźenja bě ze zarjadowanjemi najwšelakorišeho razu kopaty napjelnjeny. Jedne z ryzy serbskich je tójšto ludźi do Chrósćic přiwabiło.

Chrósćicy (KJu/SN). Wjace hač 300 wopytowarjow dožiwi minjenu sobotu wječor prěnje nazymske reje za wšitke generacije župy „Michał Hórnik“ w Chróšćanskej wjacezaměroweje hali „Jednota“. Z po­dawkom woswjećichu zdobom dźesaćlětne wobstaće młodeje serbskeje kapały Con-takt. Skupinje přisłuša pjeć młodych serbskich hudźbnikow Bosćij Pawlik (basgitara a spěw), Michał Kokla (gitara a spěw), Syman Hejduška (bijadła a spěw), Jan Brězan (piano a spěw) kaž tež Józef ­Brězan (gitara a spěw). Con-takt piska mjeztym dźesać lět na serbskich zarjadowanjach a kwasach serbsku, ale tež mjezynarodnu rejwansku zabawnu hudźbu.

Myto zdobom namołwa

Freitag, 04. Oktober 2019 geschrieben von:
Je dobra tradicija, zo starši Malešanskich Witaj-dźěći swojich najmjeńšich na programy we wsy abo w gmejnje přewodźeja. Srjedu bě to cyle wosebity termin, wuznamjenjenje z Mytom Domowiny za dorost 2019 w Budyskim Serbskim domje. Starši njewidźachu jenož poradźene spěwy a rejku, kotrež tam dźěći w pyšnej drasće ewangelskich Serbow Budyskeho kraja předstajichu. Runje tak móžachu nazhonić dźak a wulke připóznaće za swój rozsud, zo dadźa swoje dźěći we Witaj-pěstowarni dwurěčnje kubłać. Předsyda Domowiny Dawid Statnik je wuraznje na to skedźbnił. Myto Domowiny za dorost předšulskej skupinje Malešanskeje Witaj-pěstowarnje česći zdobom njesebičnu prócu kubłarkow pod nawodom Borbory Kraloweje. Mam pak wuznamjenjenje tež za namołwu šulskimaj nošerjomaj a gmejnje, serbskorěčne kubłanje po Witaj-pěstowarni w zakładnej a w přichodnej nowej wyšej šuli w Barće zaručić. Axel Arlt

Serbska debata

Neuheiten LND