Połny program

Donnerstag, 05. September 2019 geschrieben von:

Budyšin/Choćebuz (SN/JaW). Čłonojo Zwjazkoweho předsydstwa Domowiny wěnuja so jutře w Choćebuzu hnydom wjacorym wažnym temam. Tak předstaji předsydka Rady za serbske naležnosće Sakskeje Marja Michałkowa bilancu dźěławosće minjeneje wólbneje doby. Zdobom maja čłonojo gremija wobzamknyć wólbny porjad, zo móhli nominować štyrjoch kandidatow za wólby noweje serbskeje rady Sakskeje. „Kandidaća so jutře žani njepředstaja, za to bě doba přeprošenja překrótka“, wujasni předsyda Domowiny Dawid Statnik. „Jich předstajimy na wurjadnym zarjadowanju.“

Wěnować chcedźa so jutře w Choćebuzu mjez druhim tež tomu, kak zwoprawdźeja wobzamknjenja k wuslědkam ewaluacije wučby serbšćiny na braniborskich šulach. W srjedźišću ma stać prašenje, kak w naležnosći nětko po wólbach dale postupować. Zdobom maja w tym zwisku tež swójske stejišćo zdźěłać.

Na slědach Pücklera, Fabriciusa a Kosyka

Donnerstag, 05. September 2019 geschrieben von:

Seniorojo SŠT Delnju Łužicu wopytali

Po tym zo pobychmy my seniorojo Serbskeho šulskeho towarstwa (SŠT) spočatk meje hižo na wjacednjowskej kubłanskej wuprawje w Hannoverskim Wendlandźe, wjedźeše nas dnjowa busowa jězba kónc awgusta do Delnjeje Łužicy. Prěnja stacija bě město Choćebuz, kotryž bě w NDRskim času stolica wobwoda a nimo toho energijowy centrum. Dźensa je to moderna uniwersitna metropola z něhdźe 120 000 woby­dlerjemi.

Statnik chce so tež z AfD rozmołwjeć

Mittwoch, 04. September 2019 geschrieben von:

Kak z nowym Sakskim krajnym sejmom hromadźe dźěłać? Měli serbskeho zapósłanca zwonka politiskich stron do krajneho parlamenta wolić móc? Prašeni to po minjenej wólbnej njedźeli.

Budyšin (SN/at). W nowym Sakskim krajnym sejmje zastupjene strony chcedźa nastupajo serbske naležnosće z Domowinu hromadźe dźěłać. To bě na serbskim wólbnym forumje słyšeć a w zwisku z wólbnymi prašenjemi třěšneho zwjazka pytnyć, kaž předsyda Domowiny Dawid Statnik našemu wječornikej rjekny. „To je najebać změny dobry zakład za dalše­ dźěło a serbske temy.“

Statnik wjeseli so nad wólbnym wuspěchom Alojsa Mikławška a Marka Šimana,­ wobžaruje pak, zo njeje kandidat Lěwicy, Domowinjan Hajko Kozel, dale zapósłanc. Harald Baumann-Hasske a Thomas­ Baum (wobaj SPD) staj narodnu organizaciju tohorunja podpěrałoj a nimataj hižo žadyn mandat.

Sydom kandidatow za serbsku radu

Donnerstag, 29. August 2019 geschrieben von:

Prezidij Zwjazkoweho předsydstwa Do­mowiny­ je wčera we Wojerecach prě­nje­ wuradźowanje gremija po lětnjej přestawce přihotował, kotrež wotměje so 6. septembra w Choćebuzu.

Wojerecy (SN/JaW). W srjedźišću wčerawšeho posedźenja prezidija Zwjazkoweho předsydstwa Domowiny stejachu wólby noweje Rady za serbske naležnosće Sakskeje za dobu wot lěta 2019 do 2024.

Wojerecy (SN/JaW). W přitomnosći předsydki Rady za naležnosće Serbow w Sakskej Marje Michałkoweje, wjesnjanostow z Rakec, Njeswačidła a Chrósćic, Swena Nowotneho, Gerda Schustera a Marka Klimana (wšitcy třo CDU), społnomócnjenych za serbske naležnosće města Wojerec, wokrjesa Budyšin a Sakskeje Gabrie­le Linakoweje, Reginy Krawcoweje a Stanisława Brězana, zastupnikow wo­krjesow Budyšin a Zhorjelc kaž tež wja­corych kandidatow za wólby Sakskeho krajneho sejma staj wčera statny sekretar sakskeho nutřkowneho ministerstwa prof. dr. Günther Schneider a předsyda Domowiny Dawid Statnik we Wojerecach serwisowy běrow za serbsku rěč wotewrěłoj. Běrow je w nošerstwje Domowiny a změje we Wojerowskim Domowinskim domje dwě rumnosći k dispoziciji. Zhromadnje z Elenu Seidel z Ćiska a Linell Kandziora z Wojerec – wobě bě­štej swjedźensku drastu Wojerowskich ewangelskich Serbowkow woblečenej – su při zachodźe Domowinskeho domu dwurěčnu tafličku za běrow wotkryli.

Zwyša prestiž serbšćiny

Dienstag, 27. August 2019 geschrieben von:
Wojerecy maja serbsku „instituciju“ wjac. Wčera su tam tak mjenowany serwisowy běrow za serbsku rěč wotewrěli. Mam zarjadowanje tajkeho běrowa za dobru kročel na dobro serbšćiny w zjawnosći. Dale mam rozsud za dobry, běrow we Wojerecach, potajkim zwonka centruma serbskich institucijow Budyšina, zarjadować. Tak zwyša nošerjo běrowa, w tym padźe Domowina, štož tón abo tamny za tak spomóžne nima, prestiž našeje maćeršćiny we Wojerowskej kónčinje, štož je prima a wo čož Wojerowski župan Marcel Brauman tež wojuje. Dale je derje, zo maja wjesnjanosća a měšćanosća ze sobudźěłaćerjomaj, studowanej sorabistku Francisku Grajcarekec a nazhonitym maćernorěčnym Serbom Janom Kralom, kiž je tež jako redaktor w Serbskich Nowinach skutkował, wěcywustojneju pomocnikow a poradźowarjow nastupajo dwurěčnosć w gmejnach, předewšěm w prašenjach dwurěčneho popisanja tafličkow. Janek Wowčer

Smjerdźečenjo w Skopju rejwali

Dienstag, 27. August 2019 geschrieben von:
34 čłonkow a čłonow Serbskeje rejwanskeje skupiny Smjerdźaca wobdźělichu so wot 22. do 25. awgusta na 40. mjezynarodnym šulerskim festiwalu folklory Sewjernej Makedonskej. Přewodźeli su jich wjacori hudźbnicy z Łužicy. W stolicy kraja, w Skopju, předstajichu woni na štyrjoch wustupach a w swjedźenskim ćahu wurězki ze swojich programow serbskich rejow. Nimo Smjer­dźečanow wobdźěli so na festiwalu 12 dalšich cyłkow, přewažnje z balkanskich krajow­. Wčera wječor su so lajscy wuměłcy pod nawodom zamołwiteho za organizatoriske naležnosće cyłka Gabrie­la Krawca nawróćili. Foto: Pětr Dźisławk

Swójbne popołdnjo so radźiło

Montag, 26. August 2019 geschrieben von:

Pančicy-Kukow (SN/MWj). Rjane serbske zetkanje dožiwichu wopytowarjo swójbneho popołdnja wčera na Kukowskim hrodźišću, na kotrež bě Domowinska skupina Pančicy-Kukow hromadźe z někotrymi młodymi swójbami přeprosyła. Bě to prěnje tajke zarjadowanje, kotrež je skupina přihotowała, kaž jeje předsyda Pětr Korjeńk rjekny. Na kóncu běchu sej wšitcy přezjedni, zo bě so pospyt přewšo derje poradźił.

Na swój 40lětny jubilej přichodnu sobotu a njedźelu so Chróšćanscy muzikanća jenož hudźbnje njepřihotuja, kaž tule na wčerawšim zwučowanju. Wjele organizatoriskich nadawkow dyrbja zmištrować, zo by so kónctydźenski swjedźeń poradźił. Mjez druhim su sej čěsku kapału Boršičanku přeprosyli. Nětko nadźijeja so prawje wjele wopytowarjow. Foto: SN/Hanka Šěnec

Po krótkim puću so wuměnjeć

Montag, 19. August 2019 geschrieben von:

Budyšin (SN). Wotmołwy na wotewrjene prašenja lońšeho naprašowanja wšěch serbskich towarstwow a zwjazkow su z pomocu zarjada Domowiny přehla­dane a prěnje konkluzije jasne. To zwěsćichu čłonojo rozšěrjeneho wuběrka za zjaw­nostne a lobbyjowe dźěło Zwjazkoweho předsydstwa Domowiny na swojim njedawnym posedźenju w Budyšinje. „Dźěło tak dawno hišće wotzamknjene njeje, ale smy prěnje nadawki z wuslědkow naprašowanja wotwodźeli“, praji předsydka wuběrka Marka Cyžowa.

Wuběrk w swojej analyzy zwěsća, zo přeje sej wjetšina wobdźělnikow naprašowanja wjace kontakta, zwiskow a trans­parency Domowiny. Zwjazkowe předsydstwo wotměwa něhdźe po měsacomaj posedźenje, a to stajnje na teritoriju druheje župy. Jemu wuběrk namjetuje, zo sej předsydow Domowinskich skupin a towarstwow, kiž we wotpowědnej župje skutkuja, wosobinsce na posedźenja přeproša. „Tak by so časćiši, prawidłowny a njeposrědni kontakt poskićił. Informacije, mysle a nazhonjenja, ale tež wjesela a starosće, hodźa so tak po krótkim puću wuměnjeć“, měni Marka Cyžowa.

Serbska debata

Neuheiten LND