Konječanscy blidotenisća po horcym boju wuspěšni

póndźela, 13. nowembera 2017
artikl hódnoćić
(0 )

Na Konječanskej wjesnej žurli zetkaštej so k blidotenisowej dypkowej hrě w prěnjej wokrjesnej lize cyłkaj DJK Konjecy a ST Rakecy. Hosćo dyrbjachu z Renejom Unruhom sylneho hrajerja narunać, štož bě za domjacych mały plus. Po tym zo Konječenjo přez dobyći dwójkow Matijas Kokla/Alojs Čóška a Michał Elstner/Andre Čórlich pola dwójkow z 2:1 nawjedowachu, njeběžeše w prěnim kole jednotliwcow cyle po jich přeću. Jeničce Dierk Šewc a Michał Elstner swojej hrě doby­štaj. Tak startowachu Rakečenjo z 5:4 do druheho koła. W prěnimaj duelomaj doby Kokla swoju hru a Šewc snadnje podleža, tak zo hosćo ze 6:5 nawjedowachu. Žadyn Konječan drje wjace z tym njeličeše, zo móža partiju hišće zwjertnyć. Tola w poslednich hrach mějachu domjacy wjace hač koče zbožo. Čóška, Čórlich a Elstner swoje partije snadnje z 3:2 dobychu, a poslednju hru dnja doby Pětr Bejma, z čimž bě wuspěch 9:6 perfektny.

wozjewjene w: Sport
Prošu přizjewće so, chceće-li komentar podać

Serbska debata

nowostki LND