„Zymski čas“ rěka scenisko-koncertantny program Serbskeho ludoweho ansambla w dohodownym času. Pjatk wječor bu na žurli na Wonkownej Lawskej w Budyšinje w druhim dźělu programa twórba znowa předstajena.
Budyšin (CRM/SN). Hudźbu spisaštaj za swój čas Jan Bulank a Detlef Kobjela na tekst Kita Lorenca. Třidźělna twórba zdawa so z dźensnišeje perspektiwy jara awtentiska być. Štó z nas drje hišće wě, zo wotměwaše so 30. nazymnika, na dnju swjateho Handrija, woprašowanje lubosćinskeho orakla? Skerje je znate, kotre nałožki haja so na wopominanje swjateju Borbory a Mikławša. Nimo Kornela Kolembusa měješe tohorunja Jan Domaška režiju. Wón dźě znaje materiju ze swojich młódšich lět. Do scenow je rjad ludowych spěwow zapřijatych, kotrež njejsu hižo znate. Z pěsnjemi kaž „Spěwajće dźens wjesele ...“ so prawe serbske hody něhdy zakónčichu.