Načolnistwo skrućili

póndźela, 04. decembera 2017
artikl hódnoćić
(0 )

Z jasnym dobyćom přećiwo TTC Wojerecam III z 11:4 je prěnje blidotenisowe mustwo DJK Konjecy swoje načolnistwo w 1. wokrjesnej lize skrućiło. Wšitke dwójki swoje duele dobychu. W prěnim kole jednotliwcow dypkowachu Alojs Čóška, Michał Elstner a Pětr Bejma, tak zo delanscy blidotenisća ze 6:3 wućeknychu. W druhim kole běchu Rafał Šěrak, Maćij Kokla, Dierk Šewc a znowa Čóška a Elstner wuspěšni, a jasne dobyće bě perfektne.

W 1. wokrjesnej klasy wočakowaše Konječanske druhe mustwo suwereneho načolnika TuS Gersdorf III. A bjezmała by načolnika poskubał. Pola dwójkow dobyštaj Dietmar Hrjehor a Stefen Woko swoju hru. Tak mějachu Konječenjo po prěnich hrach zastatk 1:2. W prěnim kole jednotliwcow dypkowachu za Konjecy Rudolf Wittig, Rainer Roßmy a Stefen Woko, tak zo startowachu hosćo z 5:4 do druheho koła. Tam přesadźichu so Dietmar Hrjehor, Julian Hrjehor a znowa Woko. Při stawje 8:7 dyrbješe štwórta dwójka hru rozsudźić. Tu pak staj Hrjehor/Woko z 2:3 cyle njezbožownje podležałoj. W pjatej sadźbje běštaj wonaj dołho nawjedowałoj, doniž ze 17:19 njepřěhraštaj.

wozjewjene w: Sport
Prošu přizjewće so, chceće-li komentar podać

Serbska debata

nowostki LND