Iniciatiwa za wobmjezowanje wjelkow tójšto podpismow nazběrała
Drježdźany (SN/MkWj). Łužiske wjelki zaběraja nětko tež Sakski krajny sejm. Wobydlerska iniciatiwa za wobmjezowanje wobstatka wjelkow je wčera w Drježdźanach lisćiny z cyłkownje 18 590 podpismami přepodała. Rěčnik iniciatiwy, Jurij Lebza z Koslowa, předpołoži peticiju prezidentej Sakskeho krajneho sejma Matthiasej Rößlerej. Podpisma su čłonojo inciatiwy minjene měsacy w kónčinje zběrali, hdźež běchu wjelki hižo sta wowcow zakusali. Iniciatorojo so nadźijeja, zo krajne knježerstwo nětko swoje nastajenje změni. Wjelki su dotal kruće škitane. Lebza napřećo medijam na to skedźbni, zo je jich w regionje dźeń a wjace. Přirodne dźerženje wužitneho skotu kaž wowcow na pastwach tohodla dale woteběra. Łužica je mjeztym kónčina z najwjace wjelkami po wšej Europje. Peticija žada sej jasne pomjeńšenje jich wobstatka, kaž to w krajach kaž Šwedskej abo Norwegskej hižo praktikuja. „Štož bě pola kormoranow móžno, je tež pola wjelkow nuznje trěbne.“