Mjezynarodny dźeń žonow mnohim přičina kritiskeho zhladowanja
Berlin/Budyšin (SN). Po cyłym swěće swjeća dźensa Mjezynarodny dźeń žonow. Tón je mnohim składnosć, pokazać na wobstejace njedostatki nastupajo runoprawosć muži a žonow.
Generalna sekretarka sakskeje SPD Daniela Kolbe ma 8. měrc za wažny politiski dźeń milionow žonow po wšěm swěće. Wona na to skedźbnja, zo ma dźeń žonow lětsa wosebity wuznam: Runje před sto lětami běchu sej žony wólbne prawo wuwojowali. „Nimale lětstotk pozdźišo dyrbimy zwěsćić, zo njeje runoprawosć muži a žonow w lěće 2018 přeco hišće zwoprawdźena. Dźeń žonow njeje tuž žana folklora, ale wažne napominanje, so za runoprawosć zasadźeć a swoj hłós pozběhnyć“, rěka w nowinskej zdźělence. Socialdemokratka Kolbe zhladuje w tym zwisku na nowowuzwoleny zwjazkowy sejm, kotryž wobsteji dotal z najwjace muži: Runje hišće 31 procentow zapósłancow je žónskeho splaha. Zo CSU do noweho knježerstwa jenož muži sćele, je po jeje słowach wopačny signal. Daniela Kolbe na to pokazuje, zo je SPD wažne ćežišća na dobro žonow w koaliciskim zrěčenju z uniju zakótwiła.