Budyšin (SN/bn). Njedźelu skónči so z poslednim předstajenjom inscenacije „Olsenowa cwólba wotzběhnje“ na Budyskim hrodźe aktualna hrajna doba Němsko-Serbskeho ludoweho dźiwadła. Wjelelětny čłon jewišćoweho ansambla Rainer Gruß rozžohnuje so potom w róli Kjelda z publikumom, znajmjeńša, štož skutkowanje jako powołanski hrajer nastupa. Serbskim přihladowarjam drje njeje přečasto swoje kmanosće pokazał, lětsa pak bě profilowany dźiwadźelnik hišće raz jedyn z garantow za wuspěch produkcije „Paradiz w dobrej stwě“. Kruch z pjera šwicarskeho awtora Markusa Köbelija, kotruž je wyši hrajny nawoda NSLDź Stefan Wolfram w přełožku Křesćana Barta na hłownym jewišću inscenował, wobhlada sej dohromady 1 061 wopytowarjow. Mjenowana ličba njeje jenož najlěpša zašłych třoch lět, ale zdobom wjetša hač 1997, jako bě hru něhdźe 750 ludźi pod titulom „Holcerec peepshow“ w Budyšinje dožiwiło.