Radworski koparski dorost najwuspěšniši

štwórtk, 13. decembera 2018
artikl hódnoćić
(0 )
Sportowe towarstwo Budissa Budyšin je minjeny kónc tydźenja prěnje koparske halowe turněry přewjedło. Jedyn z nich doby Radworski dorost.  Foto: Sylwija Wjeselina Sportowe towarstwo Budissa Budyšin je minjeny kónc tydźenja prěnje koparske halowe turněry přewjedło. Jedyn z nich doby Radworski dorost. Foto: Sylwija Wjeselina

Byrnjež runje zymska přestawka była a žane dypkowe koparske hry njebyli, to dawno hišće njerěka, zo nihdźe nichtó­ za bulom njehoni. Tójšto sportowych towarstwow přewjeduje tučasnje halowe koparske turněry. Tak tež minjenu sobotu, jako přeprosy sej FSV Budis­sa Budyšin na wjacore halowe turněry dorostowe mustwa.

Hižo dopołdnja wubědźowachu so cyłki młodźiny F, popołdnju regionalne a nadregionalne mustwa młodźiny E. W tym kole bě jich sydom: FSV Budissa Budyšin, Turbina Drježdźany, SZ Blankenburg, ST 1922 Radwor, ST Horni kraj Sprjewja, Jednota Kamjenc a ST Porchow. Wone hrajachu přeco dźesać mjeńšin, kóždy přećiwo kóždemu.

Wot wšeho spočatka je za Radworskich koparjow jara­ derje běža­ło. Woni dominowachu w nimale kóždej partiji a dobychu někotre samo z tójšto wrotami rozdźěla. Jeničce přećiwo Budissy z Budyšina hrajachu njerozsudnje 1:1. Přiwšěm to dosahaše turněr dobyć.

Młodźi Radworčenjo wjeselachu so nad pokalom, medalju a słódkosćemi. Nimo toho wuznamjenichu Cajusa­ Wi­ćaza jako najlěpšeho třělca wrotow a Johanu Wjeselic jako najlěpšu hrajerku.

wozjewjene w: Sport
Prošu přizjewće so, chceće-li komentar podać

Serbska debata

nowostki LND