Swjedźeń „Serbja-lěćo-słónco“ w Bad Gandersheimje swjećili
Bad Gandersheim/Northeim (CoR/SN). Z koncertom serbskeho punka Pawoła „Geigerzähler“ Nagela je so swjedźeń „Serbja-lěćo-słónco“ njedźelu wječor na Delnjosakskej krajnej zahrodniskej přehladce (LAGA) w Bad Gandersheimje zakónčił. Hižo do toho stej w běhu minjeneho kónca tydźenja Serbska rejowanska skupina Ćisk dohromady štyri króć a skupina Serbska reja dwójce publikumej žiwy zaćišć wo našej hudźbno-rejwanskej kulturje kaž tež drastowej tradiciji Wojerowskich Serbow na tamnym jězorowym jewišću posrědkowałoj. Zo so tónle zaćišć njezhubi, wo to stara so přichodnje lipa, kotruž je Gabriela Linakowa z rejwanskeho ćělesa jednaćelce LAGA Ursula Hobbie přepodała. „Za nas je to wulka česć, zo tu serbsku kulturu předstajiće. Chcemy serbsku lipu hač do nazymy pilnje krjepić a potom z našej měšćanostku prawe městno za nju namakać a ju sadźeć“, dźakowaše so wona wuměłcam z Łužicy a organizatoram.
