Kino w biosferowym rezerwaće

Malešecy. Němska tragikomedija „Wochenendrebellen“ režisera Marca Rothenmunda je prěni film lětušeho rjadu „Lětnje kino w biosferowym rezerwaće“. Wot dźensnišeho pokazaja hač do kónca awgusta stajnje pjatk w 20 hodź. paski w Stróžanskej Starej wowčerni. Dźensa za tydźeń předstaja dokumentaciju „Magie der Moore“ a za dwě njedźeli trikowy film „Raus aus dem Teich“. Rjad zakónči so z komediju „Enkel für Fortgeschrittene“. Zastup płaći stajnje 7 resp. potuńšeny 5 eurow.

Pućujcy serbske wokable wuknyć

Běła Woda. Juliana Kaulfürstowa a Hync Rychtaŕ přeprošataj předewšěm serbsce wuknjacych zajimcow jutře, sobotu, na „Serbske pućowanje do Krušwicy“. W 10 hodź. startuja na parkowanišću Běłowodźanskeje pjekarnje w róžku Mužakowska – Dróha měra. Ducy přez kuzłorjany Zwěrjenc do Krušwicy-Kija maja wobdźělnicy składnosć, „serbske wokable sej přiswojić a wospjetować“. Tura zakónči so ze zhromadnym wobjedom a „jězbu z linijowym busom wróćo do Běłeje Wody“. Jědź, napoje a jězbu zapłaća wobdźělnicy sami, pućowanje same je bjezpłatne.