Žadaja sej katastrofu wujasnić
Brüssel/Gaza (dpa/SN). Społnomócnjeny EU za wonkowne naležnosće Josep Borrell je dospołnje poraženy na powěsće wo smjertnej katastrofje při pomocnym konwoju w Gazaskim pasmje reagował. „Sym zludany hladajo na přeliwanje kreje mjez ciwilnej ludnosću, kotraž čakaše zadwělowana na humanitarnu pomoc“, piše Borrell w interneće. Smjerć ludźi je „dospołnje njeakceptabelna“.
Wot islamistiskeje Hamas kontrolowane strowotniske zarjadnistwo w Gazaskim pasmje rěči wo wjace hač sto morjenych palestinskich ciwilistach. Ludźo běchu na pomocny transport čakali, jako israelscy wojacy zaměrnje do nich třělachu. Israelske wójsko tole wotpokazuje. Po informacijach jeje rěčnika bě wokoło nakładnych awtow k tołkańcy dóšło. Při tym so wjacori smjertnje zranichu.
Generalny sekretar UNO António Guterres žada sej hnydomne wujasnjenje smjertneje katastrofy. Rěčnik Stéphane Dujarric je sej toho wědomy, zo kóžda strona podawki hinak rysuje. „Tuchwilu hišće wšitke fakty njeznajemy.“
Hižo wjele docpěli
Lětadło zešrotuja
To a tamne (01.03.24)
Twochnjenje mjedwjedźa su w Stuttgartskim zwěrjencu a botaniskej zahrodźe Wilhelma zwučowali. Za to bě so sobudźěłaćer wčera jako mjedwjedź předrasćił. Testowali su při tym alarmowe a nuzowe plany, w zdźělence rěka. Tež warnowansku app za sobudźěłaćerjow z wotpowědnymi pokiwami zadźerženja su zasadźili. Krizowy stab hladarjow a skótnych lěkarjow je so zešoł. Předrasćeneho kolegu su spěšnje zaso popadnyli.
Aktiwisća w swojich budkach we wjerškach štomow njedaloko twornje awtotwarca Tesla smědźa tam najprjedy raz hač do 15. měrca wostać. Tole zdźěla policija po dorěči z tamnišej gmejnu. Demonstrantam pak je zakazane, na kolije stupić, kotrež do zawoda wjedu. Škitarjo wobswětoweje skupinu „Teslu zadźeržeć“ protestuja přećiwo planowanemu rozšěrjenju zawoda a z tym zwjazanemu ničenju wulkich lěsnych płoninow.
Scholz w Drježdźanach
Drježdźany (dpa/SN). Dobre poł lěta do wólbow Sakskeho krajneho sejma wočakowachu zwjazkoweho kanclera Olafa Scholza (SPD) dźensa w Drježdźanach. Dopołdnja steješe wopyt w tworni lětadłow na dnjowym porjedźe. Popołdnju chcychu twarca mechaniskich časnikow Nomos w Glashütte zeznać. Wječor planowachu forum Scholza z wobydlerjemi wo aktualnych politiskich prašenjach.
Putin zapad warnował
Moskwa (dpa/SN). Ruski prezident Wladimir Putin je dźensa w swojej narěči k połoženju naroda zapad před skutkownosću ruskich brónjow warnował. Zapad njesměł při swojim hroženju na to zabyć, zo ma tež Ruska wotpowědne brónje, rjekny Putin dźensa w Moskwje před wjace hač tysac zastupnikami politiki, hospodarstwa, kultury a nabožinow. 71lětny kraje NATO chutnje warnowaše, wojerske jednotki do Ukrainy pósłać.
Sudniski wuspěch Trumpa
Wonkowna ministerka Annalena Baerbock (Zeleni, srjedźa) je so wčera ...
Twarstwodale woteběrace
Scholz: Njesćelemy wojakow
Berlin (dpa/SN). Zwjazkowy kancler Olaf Scholz (SPD) je zwjazkowej woborje a wobydlerjam Němskeje přilubił, zo je jeho „ně“ nastupajo zasadźenje němskich pozemskich wojakow w Ukrainje jasna mjeza, wo kotrejž hižo njediskutuje. „Zo bych to hišće raz jasnje rjekł: Jako zwjazkowy kancler Němskeje njebudu žanych wojakow zwjazkoweje wobory do Ukrainy słać“, rjekny wón wčera we widejowym poselstwje. „To płaći. Na to móža so wojacy a wojakowki spušćeć. A na to móžeće so Wy spušćeć“, wón přilubi
NATO njestanje so z wójnskej stronu, Scholz doda. „Tomu tež tak wostanje.“ Němska je sej ze swojimi zwjazkarjemi přezjedna: „Nochcemy, zo wuwiwa so wójna mjez Ruskej a Ukrainu na wójnu mjez Ruskej a NATO.“
Minjenu póndźelu njebě francoski prezident Emmanuel Macron na zetkanju 20 statnych a knježerstwowych šefow w Parisu zasadźenje wojakow w Ukrainje hižo wuzamknył. Scholz bě tole hižo dźeń po tym wotpokazał. Hižo na spočatku wójny bě němski kancler potwjerdźił, zo njepřińdźe zasadźenje němskich wojakow w tutej wójnje za njeho do prašenja. Němska pak Ukrainu dale z brónjemi a municiju podpěruje.
Bamž znowa w chorowni był
Rom (dpa/SN). Bamž Franciskus je so wčera nachwilnje do chorownje podał. 87lětneho su po tydźenskej generalnej awdiency dopołdnja w chorowni přepytowali. Kaž italska powěsćernja Ansa rozprawja, móžeše so nawoda wjace hač 1,4 miliardy katolikow krótko po tym zaso do Vatikana nawróćić. Franciskus je po informacijach Vatikana před něšto dnjemi na „lochku gripu“ schorjeł. Tohodla je hižo wjacore zjawne wustupy wotprajić dał. Do wopyta chorownje Gemelli w Romje rjekny wón na generalnej awdiency: „Sym hišće tróšku nazymnjeny.“ Sobotu chce pontifeks prěni króć zwjazkoweho kanclera Olafa Scholza (SPD) na priwatnu awdiencu witać.
Strowota wobradźa bamžej, kiž je wot lěta 2013 w zastojnstwje, hižo něšto čas přiběrajcy problemy. Minjene měsacy měješe hižo wospjet problemy ze zahorjenjom pućow dychanja. Loni dyrbjachu jeho dwójce w jednej z Romskich chorownjow lěkować. Problema w kolenje dla sedźi bamž při zjawnych terminach mjeztym w kolesatym stole. Rodźeny Argentinjan budźe 13. měrca jědnaće lět w zastojnstwje.
To a tamne (29.02.24)
Něhdźe 80 aktiwistow skupiny „Teslu zadźeržeć“ je lěs njedaloko twornje awtotwarca w Grünheide wobsadźiło, zo bychu přećiwo planowanemu rozšěrjenju zawoda protestowali. W běhu krótkeho časa natwarichu wjace hač dźesać budkow we wjerškach štomow. Demonstranća chcedźa po tutym puću wotum wobydlerjow podpěrować, kotřiž běchu so při wothłosowanju přećiwo rozšěrjenju zawoda wuprajili. Aktiwisća njewěrja, zo so Tesla na rozsud wobydlerjow dźerži.
Drastiske naprawy přećiwo ekstremnym smalerjam nałožuja wot jutřišeho w Awstriskej: Štóž w sydlišćach 80 km/h spěšnišo jědźe hač dowolene a zwonka nich 90 km/h, njezhubi jenož jězbnu dowolnosć, ale tež awto. Minjeny čas běchu stajnje zaso smalerjow lepili. Fachowcy dwěluja na prawniskim zakładźe sćazanja.
