Podstupim (dpa/SN). Braniborski ministerski prezident Dietmar Woidke (SPD) z toho wuchadźa, zo změja ludźo bjez šćěpjenja pře koronu přichodnje wjace zadźěwkow přewinyć hač šćěpjeni. „Žiwjenje nješćěpjenych je dźensa hižo njepřijomne“, rjekny wón nowinarjam. „A tele njepřijomnosće budu přichodnje dale přiběrać.“ Woidke poćahowaše so předewšěm na trěbnosć koronatestow.
Ministerscy prezidenća zwjazkowych krajow chcychu dźensa ze zwjazkowej kanclerku Angelu Merkel (CDU) wo dalšim postupowanju w zwisku ze šćěpjenjemi a testami wuradźować. Dalša tema bě pomoc woporam zapławjenja.
Braniborski ministerski prezident bě hižo spočatk awgusta na to skedźbnił, zo maja šćěpjeni hižo nětko wjace swobodow hač nješćěpjeni. „Štóž nima trjeba so šćěpić dać, ma wjace njepřijomnosćow, dokelž trjeba test, chce-li do hosćenca, kina abo dźiwadła“, wón podšmórny. Dietmar Woidke z toho wuchadźa, zo njebudu spěšnotesty srjedźodobnje wjace darmotne.
Berlin (dpa/SN). Němska zwjazkowa ministerka za wobswět Svenja Schulze namołwja po najnowšej rozprawje swětoweje klimoweje rady, so spěšnje wot wuhla, wolija a płuna wotwobroćić a město toho solarne připrawy a wětrniki dale wutwarjeć. „Smy hižo dosć alarmowacych powěsćow a apelow słyšeli“, rjekny politikarka SPD wčera w Berlinje. „Dźensa předstajena rozprawa gremija nam znowa wuwědomja, zo čas za wuchowanje planeta, kaž jón znajemy, wotběži.“
Samsny problem w mnohich nawigaciskich nastrojach wosobowych awtow zbudźa w Bayerskej zadźiwanje policije: Tež wčera běchu „nawije“ šoferow na awtodróze A 9 do směra na Mnichow w hornjobayerskim Allershausenje njetrjebawši z awtodróhi na wobjězdku wjedli, dokelž bě wobchad pječa haćeny. Tomu pak scyła tak njebě. Minjene dny běchu so tam tajke pady kopili.
Swojeho jědnaćelětneho syna na awtodróhowym parkowanišću zabył je 44lětny na awtodróze A 2 pola Bielefelda. Na přestawce bě pachoł awto skradźu wopušćił. Hakle po wjacorych kilometrach nan pytny, zo hólc w awće njesedźi, po tym zo bě so toho bratr za nim prašał. Mjeztym pak steješe nan sam w haćenym wobchadźe. Policisća „sćerpnje čakaceho“ na parkowanišću namakachu a jeho na policajskej straži nanej přepodachu.
Budyšin (CS/SN). Łužiska kandidatka SPD w zwjazkowym sejmje Kathrin Michel z Kamjenca bě zwjazkoweho ministra za dźěło Hubertusa Heila (SPD) na forum do Budyskeho Serbskeho domu přeprosyła. Rozmołwa k dźěłowym wikam a strukturnej změnje wotmě so minjenu sobotu před něhdźe 20 čłonami SPD a sympatizantami z Budyšina a wokoliny.
Vatikan (B/SN). Po tym zo bě emeritowany bamž Benedikt XVII. kritiski přinošk w knize kardinala Roberta Saryh k měšnistwu wozjewił, dóńdźe k njeměrej a tukanju, zo je pječa prefekt a priwatny sekretar Benedikta Georg Gänswein na nastaću přinoška wobdźěleny był. Bamž Franciskus jeho na to z nadawkow prefekta wuwjaza a wobmjezowaše dźěło Gänsweina na to, so jenož hišće wo 94lětneho Benedikta XVI. we Vatikanskim klóštrje starać. Promowowany arcybiskop Gänswein bě so prawidłownje k cyrkwinskim prašenjam tež zjawnje słowa jimał, při čimž so jeho měnjenje z tym Vatikana přeco njekryješe. Žurnalistej powěsćernje KNA wón rjekny, zo „je a wostanje Franciskus jemu hódančko“.
Winfriedowy dom přeproša
Genf (dpa/SN). Swětowa klimowa rada je sćěhi wot čłowjeka zawinowaneho woćoplenja zemje znowa posudźowała a přińdźe k drastiskim wuslědkam: „Je jara prawdźepodobne, zo so zliwki w najwjace kónčinach z dalšim woćoplenjom klimy zesylnja a zo wone přiběraja“, rěka w dźensa wozjewjenej rozprawje. Slědźerjo maja za dopokazane, „zo je čłowjeski wliw atmosferu, morja a kraj woćoplił“. Wustork wuhlikoweho dioksida měli tuž drastisce pomjeńšić.
Kónc z darmotnymi testami?
Berlin (dpa/SN). Ministerskaj prezidentaj Delnjosakskeje a Badensko-Württembergskeje Stefan Weil (SPD) a Winfried Kretschmann (Zeleni) staj za to, koronatesty přichodnje wjace darmotnje njeposkićeć. „Mam wuraznje za prawe, zo dyrbja nješćěpjeni testy wot nazymy sami płaćić. Wšako ma kóždy hač do toho składnosć, so darmotnje šćěpić dać“, rjekny Weil Berlinskim nowinarjam. Kretschmann skedźbnja w tym zwisku na fairne rozdźělenje kóštow.
Połoženje dźeń a špatniše
Drježdźany (dpa/SN). Sakski ministerski prezident Michael Kretschmer (CDU) so za to wupraja pře koronawirusej šćěpjenym wjace prawow přizwolić. Na jutřišim zetkanju ministerskich prezidentow zwjazkowych krajow z kanclerku Angelu Merkel (CDU) chce Swobodny stat Sakska stejišćo zastupować, „zo smědźa při přiběracych ličbach infekcijow a dźeń a wjetšim wućeženju chorownjow jeničce šćěpjeni a wustrowjeni wjetše sportowe a kulturne zarjadowanja wopytać“. Tak rjekny to Kretschmer minjeny pjatk w Drježdźanach.
Jutře chcedźa ministerscy prezidenća ze zwjazkowej kanclerku wo dalšim postupowanju w koronakrizy wuradźować. „Nowemu wulkemu lockdownej dyrbimy zadźěwać“, Kretschmer potwjerdźi. „Mamy nětko dosć šćěpiwa, ale hišće žanu dosahacu kwotu šćěpjenja, zo bychmy so wudyrjenju noweje žołmy infekcijow wuspěšnje wobarali.“