Magdeburg (dpa/SN). Dobre dźewjeć měsacow po antisemitiskim atentaće w Halle su dźensa sudniski proces přećiwo wobskorženemu Stephanej B. zahajili. Statne rěčnistwo wumjetuje 28lětnemu 13 njeskutkow, mjez druhim mordarstwo a pospytane mordarstwo. Na spočatku procesa, kotryž je rumnostnych přičin dla na žurli Magdeburgskeho krajneho sudnistwa, předčitachu skóržbu a pokazachu wideja atentata.

Skućićel bě loni 9. oktobra, na najwjetšim židowskim swjedźenju jom kipur, ćežko wobrónjeny spytał so do synagogi w Halle zadobyć. Po přeswědčenju statneho rěčnistwa chcyše wón po móžnosći wjele z cyłkownje 52 wopytowarjow synagogi morić. Při durjach twarjenja pak zwrěšći. Na to zatřěli wón žonu, kotraž bě připadnje před synagogu, a muža w dejnerowym wobchodźe. Na ćěkańcy zrani wjacorych ludźi, doniž njemóžeše jeho policija pola Zeitza zajeć.

Za proces planuja 18 dnjow hač do oktobra. Mjez wopytowarjemi su tež wukrajni žurnalisća, mjez druhim z Israela.

1,8 bilionow eurow za etat EU a přećiwo sćěham koronapandemije

Brüssel (dpa/SN). W boju přećiwo hospodarskej krizy koronawirusa dla su so staty Europskeje unije na najwjetši etatowy a financny paket w swojich stawiznach dojednali. Kompromis su po dlěje hač štyri dny trajacych jednanjach dźensa rano na wurjadnym wjeršku 27 čłonskich statow w Brüsselu schwalili. Paket wobsahuje cyłkownje 1,8 bilionow eurow. Z toho je 1 074 miliardow za přichodny sydomlětny etat EU a 750 miliardow za konjunkturny a inwesticiski program přećiwo sćěham pandemije.

Z financnym paketom chce so Europska unija historiskej hospodarskej krizy koronapandemije dla wobarać a europske wiki zachować. Runočasnje chce do digital­nišeho a klimje přichilenišeho hospo­darstwa inwestować. Za to so prěni króć w dotal njeznatej měrje zadołži a pje­njezy rozdźěli. Přichodne lětdźesatki ­budu staty EU dołh zhromadnje wotpłaćeć.

Njewěm, hač je sej Brüsselske dojednanje wo pomocnym pakeće přećiwo koronawirusej atribut „historiske“ woprawdźe zasłužiło. W mojimaj wočomaj je historiske, zo su so scyła dojednali a zo njeje wjerškowe zetkanje zwrěšćiło. To by fatalny signal wšemu swětej było, čehož běchu sej statni a knježerstwowi šefojo w Brüsselu wědomi. A dokelž dyrbjachu wšitke dojednanja jednohłósnje schwalić, móžeše kóždy statnik hrozyć, zo swój weto zapołoži. Nětko mamy wuslědk, kotryž móže kóždy interpretować, kaž ma to za prawe. W prašenju prawostatnosće, na kotrež měješe wupłaćenje pjenjez poprawom kruće wjazane być, je to wočiwidne. Kraje kaž Madźarska a Pólska, kotrež maja w tym prašenju hižo wulke problemy w Brüsselu, su na kóncu přihłosowali, dokelž je tónle dypk faktisce šmórnjeny. Bjez dźiwa tuž, zo swjeća madźarske medije minister­skeho prezidenta Orbána jako wulkeho dobyćerja wjerška. Marko Wjeńka

Njewšědnje wulki swětły pos je na awtodróze w Moersu njedaloko Duisburga wjele kedźbnosće zbudźił. Jako „tak wulke kaž pony“ wopisane zwěrjo bě so zabłudźiło a běhaše na kromje awtodróhi, doniž zmužity šofer turkowskeho pastyrskeho psa rasy kangal njezadźerža. Při akciji so nichtó njezrani. Policisća wučerpaneho psa zastarachu, po tym zo běchu z nim na policajsku stražu doběželi. Wšako bě tón za transport w policajskim awće přehoberski. Krótko na to so wobsedźer přizjewi. Kangal móže hač do nimale 90 centimetrow wulki narosć.

Zo by sej po swój zabyty mobilny telefon přišoł, je so zadobywar we Warendorfje pola Münstera k městnu njeskutka wróćił. Tam bě jeho wobydler bydlenja při kradnjenju překwapił. Jako so wobaj znowa zetkaštaj, so paduch pola muža zamołwi a so na to zminy.