Krute jednanja

štwórtk, 20. februara 2020 spisane wot:
Brüssel (dpa/SN). Statni a knježerstwowi šefojo Europskeje unije započachu dźensa wo hoberskim etaće EU w Brüsselu wuradźować. Zwoprědka bě wotwidźeć, zo njebudu jednanja jednore, dokelž su předstawy zwjazkoweje kanclerki Angele Merkel (CDU) a jeje kolegow jara rozdźělne. Merkel wěšćeše „jara krute a wobćežne jednanja“. Konkretnje dźe wo financny ramik za lěta 2021 do 2027. Tam hladajo na cyłkowny wobjim budgeta a na nowe politiske ćežišća z tym liča, zo budu w Brüsselu zasadnje nowe wuhibki stajene. Wustupa Wulkeje Britaniskeje z EU dla pobrachuje w nowym etaće hač do 75 miliardow eurow. Cyłkowny etat Europskeje unije wučinja dobry bilion eurow.

Röttgen chcył wurjadny zjězd CDU

štwórtk, 20. februara 2020 spisane wot:

Berlin (dpa/SN). W debaće wo nowe na­wod­nistwo CDU wočakuje požadar Norbert Röttgen spěšne rozrisanje. „Bych­my dyrbjeli wurjadny stronski zjězd hišće do lětnjeje přestawki zwołać, najpozdźišo w juniju, radšo w meji“, rjekny wonkowny politikar a bywši zwjazkowy minister za wobswět nowinarjam. Zdobom wospjetowaše wón swoje žadanje, zo měli so čłonojo CDU woprašeć. „Sym stajnje za woprašowanje čłonow był a sym to tež dźensa. To je móžno, bjeztoho zo so naležnosć do dołhosće ćehnje.“ Röttgen w tym zwisku potwjerdźi, zo měł předsyda CDU zdobom kanclerski kandidat strony być.

Woprašowanje čłonow nastupajo předsydstwo CDU móhło k napjatosćam w stronje wjesć. Wodźacy čłonojo chcyli rozrisanje prašenja „w mustwje“. Röttgen widźi to skeptisce, ćim bóle, dokelž njeje jasne, kak měło tajke teamowe rozrisanje wupadać. Jenož Norbert Röttgen je swoju kandidaturu oficialnje připo­wě­dźił. Friedrich Merz, Armin Laschet a Jens Spahn njejsu so dotal jasnje wuprajili.

Projekt za sylnjenje regionow

štwórtk, 20. februara 2020 spisane wot:

Braniborske knježerstwo chce koordinatorow zasadźić

Podstupim (dpa/SN). Braniborske knježerstwo chce z pjeć koordinatorami a dalšimi sobudźěłaćerjemi na městnje regiony w kraju sylnić. Wažne projekty w městach a gmejnach chcedźa sej woni wuzwolić a partnerow mjez sobu zwjazać, praji nawodnica statneje kenclije Kathrin Schneider w Podstupimje. Schneider je krajnemu knježerstwu wotpowědny koncept předstajiła. Mjez druhim dźe wo projekty we wobłukach mobility, bydlenja, socialneje in­fra­struktu­ry a škita klimy. Tež strukturnu změnu we Łužicy w zwisku ze skónčenjom zmilinjenja brunicy chcedźa aktiwnje pod­pěrać a pohonjeć.

Za to pjeć tak mjenowanych pla­nowanskich zjednoćenstwow Habolski kraj-Fläming, Łužica-Błóta, Kraj nad Wó­dru­-Sprjewja, Prignitz-Hornja Habola a Uckermark-Barnim zarjaduja. „Wone sahaja kaž kuski torty wot krajneje mjezy­ k Berlinej po wšěm kraju hač k wonkownym mjezam Braniborskeje“, Kathrin Schneider rozłožuje. Tak maja wšu Bra­niborsku na wobzoru za „strukturnu politiku z jedneje ruki“.

To a tamne (20.02.20)

štwórtk, 20. februara 2020 spisane wot:

Listowu wobalku pjenjez stej Šwicarce namakałoj, po tym zo běštej zawkaj za za­hrodowe stólcy kupiłoj. Kuwert z 19 000 eurami tčeše mjez zawkomaj, do folije zapakowanymaj. Žonje zdźěli­štej namakanku policiji, a ta zwěsći, zo pochadźeja pjenjezy ze zawostajenstwa zemrěteje. Jeje potomnicy běchu zawkaj po wurumowanju chěže socialnej słužbje přewostajili. Dźowka zemrěteje přewostaji žonomaj nimale 3 000 eurow.

Na wšě dźesać bilionow eurow je dźěłowy zarjad šuli w Frechenje pola Kölna přepokazać chcył, zwjazkowy dźěłowy zarjad pak přepokazanku zadźerža. Poprawom měješe šula sto eurow dóstać, kotrež běchu jako pomoc na dobro šulerja za rjadownisku jězbu myslene. W tym zwisku bě drje k misnjenju dóšło. Kak je ze­ 100 na kóncu 10 000 000 000 000 nastać­ móhło, to nětko pruwuja.

Zakładnu rentu schwalili

srjeda, 19. februara 2020 spisane wot:

Berlin (dpa/SN). Po měsacy trajacej zwadźe­ zmóžnja zwjazkowe knježerstwo nětko planowanu zakładnu rentu za mało zasłužacych. Zwjazkowy kabinet je dźensa wotpowědny naćisk ministra za dźě­ło Hubertusa Heila (SPD) schwalił. Něhdźe 1,3 miliony ludźi ze snadnej rentu maja wot klětušeho připłatk k renće dóstać, hdyž su znajmjeńša 33 lět přinoški płaćili. Do toho chcedźa pruwować, hač su ludźo woprawdźe potrěbni.

Wukrajna misija podlěšena

Berlin (dpa/SN). Zasadźenje němskich wojakow w Afghanistanje podlěša wo dalše lěto, ličba wojakow pak wostanje na najwjace 1 300 wobmjezowana. Zwjazkowe knježerstwo je dźensa wotpowěd­ny naćisk schwaliło a podlěšenju misije hač do 31. měrca 2021 přihłosowało. Zwjazkowa wobora wobdźěla so w Afghanistanje na wukubłanskej misiji NATO „Resolute Support“. Zwjazkowy sejm ma dokumentej hišće přihłosować.

Rusku Chinjanam zawrěli

Po dwěmaj tydźenjomaj karanteny smědźachu tući ruscy pacienća w juhosibirskim Tjumenje dźensa izolacisku staciju chorownje wopušćić. 62 ludźi bě 5. februara z chinskeho Wuhana – hdźež bě corona-wirus jako prěni wudyrił, domoj přijěło. Po prěnim přepytowanju z negatiwnym wuslědkom na wirus dyrbjachu wšitcy na 14 dnjow do karanteny. Foto: dpa/Maksim Sluzkij

Lieberknecht njeje hižo k dispoziciji

srjeda, 19. februara 2020 spisane wot:

Erfurt (dpa/SN). Bywša ministerska prezidentka Durinskeje Christine Lieber­knecht (CDU) njebudźe přechodne krajne knježerstwo nawjedować. Přičina su jara rozdźělne předstawy wo terminje nowowólbow. Nowinarjam w Erfurće wona rjekny, zo ma koaliciju Lěwicy a CDU­ za jeničku alternatiwu. Hewak su nowowólby njewobeńdźomne. Durinska CDU dyrbjała „spušćomne parlamentariske dojednanje z Lěwicu“ wotzamknyć. To je po jeje słowach jenički puć, stabilne politiske poměry w Durinskej wutworić.

Lěwica, SPD a Zeleni pytaja tuchwilu zhromadnje z CDU wupuć z politiskeje krizy w Durinskej. Wšitke štyri strony su za nowowólby – maja pak rozdźělne předstawy wo terminje. Dźensa bě přichodne zetkanje štyrjoch stron planowane, tónkróć w mjeńšich skupinach.

Bywši ministerski prezident Bodo Ramelow (Lěwica) bě namjetował, politikarku CDU Christinu Lieberknecht na čoło „techniskeho knježerstwa“ z třomi ministrami wolić. Tež projekt mjeńšinoweho knježerstwa Lěwicy, SPD a Zelenych njeje hišće z blida, kotrež by so wo nowowólby postarało. CDU chcyła porno tomu přechodne knježerstwo.

Röttgen přećiwo ćichim komorkam

srjeda, 19. februara 2020 spisane wot:

Berlin (dpa/SN). Wonkowny politikar CDU Norbert Röttgen je sej znowa spěšne­ rozrisanje nastupajo přichodne nawodnistwo strony žadał. „Dyrbimy jasnosć­ wutworić, wšako smy we wose­bitych časach“, rjekny wón do rozmołwy z rozžohnowacej so předsydku CDU Anne­gret Kramp-Karrenbauer dźensa w Berlinje. „CDU je wodźaca strona w Němskej. Tohodla měli hišće do lět­njeje přestawki rozsudźić.“

Za tym prašany, hač podpěruje tak mjenowane „teamowe rozrisanje“, bywši wobswětowy minister wotmołwi: „Sym za team, dokelž móžeš CDU jenož w tajkim nawjedować.“ A Röttgen doda: „Sym pak přećiwo wosebitemu zrozumjenju za teamowe rozrisanje, kotrež je so mjeztym ze synonymom za ćichu komorku stało. Sym za wubědźowanje a transparencu, nic pak za ćiche komorki.“ Předsydka CDU Annegret Kramp-Karrenbauer chcyše so dźensa tež z Arminom Laschetom a Jensom Spahnom zetkać. Wonaj staj tohorunja zwólniwosć přizjewiłoj, CDU nawjedować chcyć.

To a tamne (19.02.20)

srjeda, 19. februara 2020 spisane wot:

Přewidny to manewer: Mlóčnoškleńčane durje kamora přeradźichu w Mecklenburgsko-Předpomorskej muža, za kotrymž policija pytaše. 29lětny bě sej do kamora wućeknył, jako zastojnicy by­dle­nje přepytachu. Woni kontury podhladneho za škleńcu widźachu a jeho zajachu. Sudnistwo bě muža k tysac euram pokuty zasudźiło, kotrež pak njeje zapłaćił. Chował bě so wón pola znateje w Parchimje. Nětko w jastwje sedźi.

Žonam wospjet skradźu włosy wot­třihał je dotal njeznaty w tramwajkach čěskeje stolicy Prahi. Dotal su policiji pjeć tajkich padow přizjewili. Zastojnicy z toho wuchadźeja, zo je dalšich padow a proša žony so přizjewić. Jedna z nich rozprawješe, zo bě w tramwajce po puću, jako naraz pytny, zo so něchtó jeje włosow­ dótka. Na to wona zwěsći, zo jej plećena wopuška pobrachuje.

Tesla ma spěšnje twarić

wutora, 18. februara 2020 spisane wot:

Berlin (dpa/SN). Zwjazkowy minister za hospodarstwo Peter Altmaier (CDU) wupraja so za spěšny natwar noweje twornje awtotwarca Tesla pola Berlina. Zawod je wažny za škit klimy a je zdobom jedne z najwažnišich industrijnych zasydlenjow minje­nych lět w nowych zwjazkowych krajach, rjekny Altmaier nowinarjam. Dźěła su nachwilnje přetorhnyli, po tym zo bě Berlinsko-braniborske wyše zarjadniske sudnistwo zakazało dalše štomy na twarnišću pušćeć.

Epidemija dale traje

Peking (dpa/SN). Epidemija noweje chorosće płucow w Chinje budźe so po posudku wodźacych fachowcow kraja hakle kónc apryla stabilizować. Hač do kónca februara so wirus hišće po cyłej Chinje rozpřestrěje, štož budźe zdobom wjeršk mrětwy, su sej woni wěsći. Mjeztym je ličba na wirus schorjenych ludźi na wjace hač 72 000 rozrostła. Cyłkownje 1 868 pacientow je mjeztym wumrěło.

London za njewotwisnosć

Serbska debata

nowostki LND