Budyšin (SN). Koronapandemije dla dyrbješe Serbski ludowy ansambl loni planowane 12. wubědźowanje talentow pod hesłom „Młoda serbska hudźba“ wotprajić. Nětko chce kóžde druhe lěto wotměwace so zarjadowanje nachwatać.

„Młoda serbska hudźba“ wobdarjenym dźěćom a młodostnym w starobje šěsć do 23 lět zmóžnja, serbske spěwne kaž tež instrumentalne přinoški jako solisća abo w skupinje profesionalnej jury předstajić. K njej słušeja intendantka SLA Judith Kubicec, nawoda Zhorjelskeje hudźbneje šule „Johann Adam Hiller“ Thomas Stapel a wjelelětna hudźbna pedagogowka konserwatorija w Choćebuzu Lubina Žurec-Pukačowa. Tam wotměje so wubědźowanje 2. meje, w Budyšinje 8. meje. Dobyćerjo prezentuja swój přinošk potom na mytowanskim koncerće 13. junija w Budyšinje.

Hač do 31. měrca móža so zajimcy hišće přizjewić, wotpowědny formular namakaja na internetnej stronje Serbskeho ludoweho ansambla www.ansambl.de. Kontaktna wosoba za přizjewjenje a podpěru we wobłuku notoweho materiala je Christina Knoblochowa z SLA.

Wirtuelne formaty su tele dny nimale jenička móžnosć, kulturne poskitki zwoprawdźić a wužiwać. Tež hdyž bě a je často rěč wo w najlěpšim padźe druhorjadnym narunanju woprawdźiteho wopyta kina, dźiwadła, koncerta abo přednoška, digitalne wotpowědniki tu a tam někotružkuli lěpšinu wujewjeja. Münsterski filmowy rjad „Mjeńšiny“ na přikład njeby jako zarjadowanje na městnje najskerje dawno telko kedźbnosće tež zwonka westfalskeho města zbudźił a by „jenož“ typiske lokalne klientstwo přiwabił. Nawopak drje njeby so hósć podijoweje diskusije dla mi a tebi ničo na něhdźe 600kilometersku jězbu nastajił, kaž Hanka Rjelcyna přizna. Rozmołwa po filmje pokaza, zo je zajim na Serbach za mjezami Łužicy dosć wulki. Podobne hodźało so zawěsće tež wo tamnych kulturach a ludach rjec, kotrychž we wobłuku rjadu předstajichu. Münsterscy akterojo su forum wuměny wutworili a tak tuchwilu často citowanu „šansu w krizy“ wužiwali. Bosćan Nawka

Münster (SN/bn). „Mjeńšiny“ rěka filmowy rjad Münsterskeje ludoweje uniwersity, Towaršnosće za wohrožene ludy a Münsterskeho foruma „Jedyn swět“, w kotrehož wobłuku wotsrjedź februara hač do kónca měrca mjezynarodne produkcije wo stawiznach a wosudźe wohroženych kulturow a rěčow w Europje a Aziskej pokazachu resp. pokazuja. Ćežišćo zarjadowanja minjeny štwórtk běchu Serbja. Po prezentaciji paska telewizije RBB „Wjelike casowe drogowanje“, kotryž wšědny dźeń, nałožki a problemy delnjołužiskich Serbow dokumentarisce portretuje, wuwi so mjez něhdźe 30 přihladowarjemi čiła dwuhodźinska rozmołwa. Jako wosebiteho hosća, kiž je kmany na prašenja z takrjec prěnjeje ruki wotmołwić, běštaj sej organizatoraj a moderatoraj rjadu Brigitte Thomas a Georg Schaaf dźiwadźelnicu a społnomócnjenu za serbske naležnosće wokrjesa Hornje Błóta-Łužica Hanku Rjelcynu přeprosyłoj. Wona přitomnym mjez druhim rozłoži, zo je kajkosć serbskeje kulinariki „předewšěm wjele jěsć a wjace pić“.

Budyšin (SN). Pettersson a Findus staj w Šwedskej a přez jeje mjezy woblubowanej figurje z pjera Svena Nordqvista. Jeho prěnja kniha w serbskej rěči „Findus a hara z honačom“ je nětko w druhim nakładźe wušła, runje tak „Wohnjostroj za lišku“. Wobě knize je Diana Šołćina do serbšćiny přełožiła. Pjeracham w starobje wot štyrjoch lět runje to prawe do jutrowneho hněžka abo jako spodobny dar k zelenemu štwórtkej! Pjatk, 26. měrca, w 17 hodź. budźe wirtuelna knižna premjera. Zajimcy njech přizjewja so přez na stronje www.domowina-verlag.de wozjewjeny link.