Žiwidłam wjetše hódnoćenje

srjeda, 25. meje 2016 spisane wot:

Kak zhladuje předsyda wobswětoweho a ratarskeho wuběrka Sakskeho krajneho sejma na mlokowu krizu? Axel Arlt je so ze zapósłancom Sebastianom Fischerom­ (CDU) rozmołwjał.

Mamy w Sakskej přewjele mloko produkowacych zawodow?

S. Fischer: Po wšej Němskej je něhdźe 78 000 zawodow, kotrež mloko produkuja, nimale 800 z nich w Sakskej. To je dobry poměr. Statistika tež pokazuje, zo je ličba wulkoskótnych jednotkow po hektarje ratarskeje wužiwanskeje pře­strjenje w swobodnym staće pod přerězkom Zwjazka. Dyrbju pak rjec, zo lětny wukon dejkow wobstajnje přiběra a zo je na swětowych wikach poskićowane mnóstwo mloka přewulke.

Komisija EU je loni mlokowu kwotu zbě­hnyła. Bě to zmylk?

S. Fischer: Ně, tež ratarjo su sej to žadali. Hižo za čas kwoty běchu problemy, za mloko fairnu płaćiznu docpěć. Zo so kwota wróći, nježada sej po jeje cofnjenju ani Zwjazk plahowarjow dejkow.

Žiwidłowe rjećazy a discountery pak postajeja płaćiznu mloka na njelěpšinu producentow. Je to hišće wične hospodarstwo?

Ze stejnišćom ajewišćom

wutora, 24. meje 2016 spisane wot:

Z centralnym zarjadowanjom „Hlejće, tamle je čłowjek“ zahaja jutře na Lipšćanskim hłownym torhošću stoty zjězd katolikow. Tež Serbja budu tam zastupjeni, kaž je Janek Wowčer wot předsydy TCM Jurja Špitanka zhonił.

Štó Serbow w Lipsku hłownje zastupuje?

J. Špitank: Serbscy měšnicy su Towarstwu Cyrila a Metoda nadawk dali, so wo serbski podźěl starać. Tole rady přewzachmy a móžachmy dalše towarstwa zdobyć.

Što maće konkretnje planowane?

J. Špitank: Změjemy swoje stejnišćo a jewišćo na cyrkwinskej mili na Grimmaskej pod hesłom „Katolscy Serbja“. Tam poskićimy jutře po zahajenju zjězda program z chórom Meja, z młodźinskej band Con-takt, ze Serbskej rejwanskej skupinu Smjerdźaca kaž tež ze saksofonistom Danielom Matku. Moderaciju změjetaj Diana Fryčec-Grimmigowa a Roman Nuk. Smjerdźečenjo předstaja so tež na jewišću Drježdźansko-Mišnjanskeho biskopstwa na hłownym torhošću.

Što poskićiće hišće na stejnišću?

Wěc organizacije

štwórtk, 12. meje 2016 spisane wot:

Studentske towarstwo Sorabija Lipsk chce so ze zapisanym towarstwom stać. Wo tym a dalšich předewzaćach cyłka je so Janek Wowčer z nowej předsydku Francisku Grajcarekec rozmołwjał.

Kotrych lěpšin so ze zapisanja nadźijeće?

F. Grajcarekec: Na prěnim městnje steji zhromadnosć. Je pak tež cyle běrokratiskich lěpšin, kaž zawěsćenje. Dale, a to drje bě rozsudny dypk, wolóžamy sej projektne dźěło, přehlad financow a scyła dohlad do dźěławosće Sorabije z rozprawu na hłownej zhromadźiznje.

Kelko čłonow maće a z kotrych studijnych směrow woni pochadźeja?

F. Grajcarekec: Smy něhdźe třicećo. Nimo­ studentow wučerstwa a sora­bistiki su to tež studowacy slawistiki, rěčewědy, mediciny, skótneho lěkarstwa, twarstwa, inženjerstwa, žurnalizma, prawa, chemije a informatiki.

Štó Was w předsydstwje podpěruje?

F. Grajcarekec: Městopředsyda je Damian Dyrlich z Noweje Wjeski, kiž je nas dotal w Zwjazku serbskich studowacych zastupował. Pokładnik je Radworčan Jakub Hantuš.

Što su wjerški lětušeje dźěławosće?

Wšitke dźiwadłowe jewišća Sakskeje njepředstaja wot 18. do 22. meje w Budyskim NSLDź jeno swoje aktualne inscenacije, ale chcedźa so z přihladowarjemi tež rozmołwjeć. Cordula Ratajczakowa je so z koordinatorku 9. zetkanja sakskich dźiwadłow Karolinu Wernicke rozmołwjała.

Šěsnaće hłownych předstajenjow, sydom přewodźacych zarjadowanjow a k tomu hišće kóždy wječor pózdni program – kajki je dotalny wothłós na poskitk?

Olympiada wužadaca była

wutora, 10. meje 2016 spisane wot:

Božena Hojerec z Jaseńcy chce so stać z wučerku za zakładnu šulu a studuje na Instituće za sorabistiku Lipšćanskeje uniwersity. Milenka Rječcyna je so z njej rozmołwjała.

Na lětušej 50. olympiadźe serbskeje rěče sće so nimo dalšich wosom studentow wo wobdźělnikow starała. Sće to prěni króć činiła?

B. Hojerec: Ně, sym hižo loni skupinu přewodźała. Mějach wšitko, wosebje pak temu, z kotrejž su so wobdźělnicy zaběrali, za jara zajimawe. Loni dźěše wo to, w teamje so z pčołkami zaběrać.

Lětsa bě wšitko trochu hinak. Kak sće to dožiwiła?

B. Hojerec: Haj, lětsa běše cyła struktura hinaša. Tež dožiwjenja šulerjow so lońšim njerunachu. Lětsa bě jednotliwc wjele bóle wužadany. Šulerjo rozestajachu so na cyle wšelakore wašnje z temu woheń a běchu jara aktiwni.

Měniće, zo móžeće wudźěłane materialije za wobdźělnikow w běhu studija a pozdźišo jako wučerka wužiwać?

„Budyski juwel njespušćić“

wutora, 03. meje 2016 spisane wot:

W februaru bě koncern Bombardier připowědźił, w Budyšinje a Zhorjelcu 930 dźěłowych městnow šmórnyć. Zapósłanc Sakskeho krajneho sejma Marko Šiman (CDU) so sylnje za jich zachowanje zasadźa. Bianca Šeferowa je so z nim rozmołwjała.

Što woznamjenja wottwar dźěłowych městnow za Budyšin?

M. Šiman: Za mnje je wažne, zo so w regionje telko industrijnych městnow kaž jenož móžno zachowa. Dokelž wot jednoho dźěłoweho městna dalše městna dodawaćelow wotwisuja. Njemóžemy tuž předwidźanu dimensiju wottwara akceptować. Njeakceptuju tež, zo so knježerstwo na socialne plany spušća.

Što sej Wy žadaće?

M. Šiman: Trjebamy strategiju we wobłukach­, w kotrychž hodźi so statna popěra. Předewšěm měł stat podpěrać slědźenje a wuwiwanje, štož by wažny signal kanadiskemu koncernej był.

W kotrej formje so za Budyske stejnišćo zasadźeće?

Wuhladaš-li chorobne awto z módrej swěcu, da su ludźo mjez druhim tele­fonowe čisło 116 117 wolili. Měrćin Weclich­ je so z internistom dipl.-med. Gerdom Jahnyjom rozmołwjał.

Hdy měli lěkarja za nuzne pady wołać?

G. Jahny: W Němskej eksistujetej dwaj systemaj medicinskeje hotowostneje słužby: domjaca lěkarska hotowostna słužba a nuzowolěkarski system. Domjaca lěkarska hotowostna słužba je prašana, hdyž ludźo zwonka rěčnych hodźin swojeho lěkarja – kaž wječor abo kónc tydźenja – akutnje schorja. Móža to wysoka zymica być, sylne brjušebolenje abo bolenje jěrchenjow. Tele symp­tomy drje njezdadźa so žiwjenjastrašne być, hdyž pak sej pacient praji „Měł so lěkować dać, budźe hórje, njemóžu do přichodneho termina rěčneje hodźiny dočakać“, da měł lěkarja, kiž ma hotowostnu słužbu, wołać. Zda-li so situacija za žiwjenje wohrožaca­ być, kaž kałanje w hrudźnu, da měła nuzowa słužba přijěć.

Kotre telefonowe čisło ma wolić?

Serbski film tema na festiwalu

wutora, 26. apryla 2016 spisane wot:

13. nysowy filmowy festiwal wěnuje so wot 10. do 15. meje wosebje Serbam. Cordula Ratajczakowa je so z nawod­nicu Olu Staszel rozmołwjała.

Čehodla su mjeńšiny, a tu w prěnim rjedźe serbska, ćežišćo lětušeho festiwala?

O. Staszel: Hižo dlěši čas wo tym rozmyslujemy, kak móhł serbski lud na festiwalu prezentniši być. Napadnje, zo bohužel hižo dźesać lět žadyn serbski film w kinowym formaće nastał njeje. Mamy pak kontakty k Rajnerej Naglej ze serbskeho telewizneho teama sćelaka RBB a k dalšim serbskim filmowcam. Tak smy hromadźe ideju zrodźili, we wobłuku našeho regionalneho rjadu filmy wuchodoeuropskich mjeńšin jako ćežišćo předstajić, a k tomu hišće někotre starše filmy, zwjazane z přewodnymi poskitkami. Nimo toho chcemy z dźěłarničku k tomu přinošować, zo přichodnje zaso serbske filmy nastanu.

Kak chceće to docpěć?

Škrička měła přeskočić

štwórtk, 21. apryla 2016 spisane wot:

Wučerjo serbšćiny su do přihotow kóždolětneje centralneje olympiady serbšćiny zapřijeći. Milenka Rječcyna je so z wučerku Janu Bětnarjowej, kotraž wuwučuje na Ralbičanskej Serbskej wyšej šuli, rozmołwjała.

Kak posudźujeće lětuši model olympiady?

J. Bětnarjowa: Žadanja su byli lětsa trochu hinaše hač lěta do toho. Běch spočatnje trochu skeptiska, štož nowy model nastupa. Tola mjeztym mam ideju, jednotliwca do srjedźišća stajić, za dobru. Dotal mějachu šulerjo stajnje nastawki pisać. To njeje so lětsa stało. Lětsa mějachu mjez druhim krótke informacije pisomnje podać, dźěłowe łopjena wupjelnić a pod prašenjemi prawe wotmołwy nakřižikować, zdobom ertne pruwowanje złožić. Mjezsobne dźěło wobdźělnikow je so bóle w mjezsobnym podpěranju jewiło.

Kak sće wobdźělnikow za lětušu olympiadu wuzwoliła?

Lisćiki sčasom wobstarać

srjeda, 20. apryla 2016 spisane wot:

Koncert Puhdyjow loni swjatki w Kamjencu bě jako posledni legendarneje skupiny připowědźeny. Lětsa pak ju tam znowa wuhladamy, hromadźe ze skupinomaj Karat a City. Wo koncerće „Rocklegenden“ je so Marian Wjeńka rozmołwjał z Dawidom Klimanom, zamołwitym­ za měšćanski marketing Kamjenca.

Za koncert „Rocklegenden“ so wjele wabi. Kak wažny je tajki koncert za město Kamjenc, hdyž su Puhdyje tónle termin wjele lět móhłrjec rezerwowany měli?

D. Kliman: Swjatki su tradicionalnje wažny termin za Kamjenc, dokelž su to wjele ludźi awtomatisce z Puhdyjemi zwjazali. A čim jasniše bě, zo so jich čas w Kamjencu tež raz skónči, ćim wjace fanow­ je na koncerty přišło. Po lońšimaj poslednimaj koncertomaj smy so z nimi poprawom hižo rozžohnowali. Zo woni nětko tola hišće raz hromadźe ze City a Karat pola nas koncertuja, je so hakle loni w septembru rozsudźiło, ćim bóle nas to zwjesela.

Kak ćežko poprawom je, tajki koncert do Kamjenca dóstać?

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND