Z wudaća: srjeda, 15 februara 2017

srjeda, 15 februara 2017 13:00

To a tamne (15.02.17)

Njewšědnu namakanku chce Heidelbergska policija swojemu wobsedźerjej wróćić: nowu čerwjenu zahrodowu budku. Kupc drje bě ju po puću z twarskich wikow zhubił. Policija z toho wuchadźa, zo njebě kruće dosć přiwjazana. Tak padny z připowěšaka a wosta w přirowje ležo­, z wimplom wobchoda. Tam zastojnikam wobkrućichu, zo běchu minjene dny woprawdźe tajku budku předali. Policija pyta nětko za swědkami.

Ze starych zelenych uniformow bayerskeje policije maja nětko nachribjetniki nastać. Wotpowědnu kooperaciju je bayerske nutřkowne ministerstwo dźensa w Straubingu zahajiło. Tamniši pomocny skutk Miłosćiwych bratrow zbrašenych chce wudźěłki z uniformow zhotowić. W Bayerskej budźe hač do lěta 2018 wšitkich 27 500 policistow z módrymi uniformami wuhotowanych.

wozjewjene w: To a tamne
srjeda, 15 februara 2017 13:00

Serb morjeny ...

... haj, ale na zbožo jenož w filmje. Jeli pak sej błótowski krimi „Hra ze smjerću“, kotryž­ je telewizija ZDF póndźelu wječor wusyłała, dokładnje wobhladaš, da to wšo cyle hinak skutkuje. Nic hižo jako srědk napja­tosće, ale hłubokeho rozmyslowanja. Hdyž njewě ani domoródny policist rozkłasć, čehodla a hdy wužiwaja tam zapřijeći Serbja abo Wendojo a hdyž wostanje nastajenje kamery dlěje na městnej tafli z přemóranym serbskim mjenom stejo, a to bjez komentara, započnješ rozmyslować. Dopominaš so na seriju móranjow, njezapomniš ataki na młodych Serbow na a po rejach a njezabudźeš na jězbu prawicarjow po našich wsach z chorhojemi na awtach a jich wołanje nacistiskich parolow, kotrež swědča wo radikalnym zmyslenju tychle kruhow. Derje, zo bě mor­darstwo­ jeno srědk wjetšeje napjatosće w filmje. A nadźijomnje tomu tež tak wostanje! Milenka Rječcyna

wozjewjene w: Medije
srjeda, 15 februara 2017 13:00

111. zapust swjećili

W Popojcach (Papitz) – małej wsy mjez Wětošowom a Choćebuzom – su minjeny kónc tydźenja­ swój mjeztym 111. zapust woswjećili. Pod přewodom Strobičanskich dujerjow­ ćehnješe 21 dorosćenych a jědnaće młodźinskich porikow po wsy. Při tym wopytachu mjez druhim hladarnju starych, faru, wjesneho předstejićerja a někotrych předewzaćelow. Wšudźe sej wobdźělnicy něšto k piću wuprosychu a wězo tež stajnje zaso zarejwachu. Foto: Michael Helbig

wozjewjene w: Kultura
srjeda, 15 februara 2017 13:00

Bajkojty raz Błótow so pozhubja

Serbskosć młodźenca Georga bě přičina jeho smjerće. Dźewjaty błótowski krimi „Hra ze smjerću“ je telewizija ZDF póndźelu wječor wusyłała. Dotalna bajkojkosć Błótow dóstawa hrózbne akcenty.

wozjewjene w: Medije
srjeda, 15 februara 2017 13:00

Piše wo „mištrje“ Bjarnaće Krawcu

W Opolu je wušła loni kniha „Bjarnat Krawc. Kronika życia i działalnośći w zarysie“ („Bjarnat Krawc. Chronika žiwjenja a dźěławosće w přehledźe“). Awtor, pólski wědomostnik Zbigniew Kościów, je hižo wjacore spisy wo serbskich wosobinach wudał, mjez druhim wo Jurju Pilku (LND, 1968), Korli Awgusće Kocoru (1972) a Michale Nawce (1996). Za nětko předležacu ediciju złožowaše so wón nimo swójskich slědźenjow hłownje na knihu Achima Brankačka „Žiwjenje je dźěło – wotpočink je mrěće. Stawizna Bjarnata Krawca“ (1999), ale tež na přinoški dalšich serbskich a čěskich awtorow.

Nowostka wopisuje žiwjenje a skutkowanje Krawca, kaž w podtitlu wupokazane, wot naroda 5. februara 1861 w Jitru hač do jeho smjerće 25. nowembra 1948 w čěskim Varnsdorfje. W skrótšenej formje­ su etapy žiwjenja Krawca tež w Nowym biografiskim słowniku k stawiznam a kulturje Serbow podate. Tam wšak je zmylk: Krawc njebě so hakle 1946 do čěskeho Varnsdorfa přesydlił, ale kaž Kościów prawje pisa, hižo 1. nazymnika 1945 – najprjedy do bydlenja Karela Mackůwa, po tym do swójskeho domu, wot města spřistupnjeneho.

wozjewjene w: Kultura

Rozmołwa ze spisowaćelom Křesćanom Krawcom

Serbski spisowaćel Křesćan Krawc je sej we wubědźowanju „Lausitzen“, wupisanym wot Budyskeho Němsko-Serbskeho ludoweho dźiwadła, Złokomorowskeho Noweho jewišća, Statneho dźiwadła Choćebuz a spěchowanym přez Załožbu za serbski lud, za swoje němskorěčne sceny „Eine Aktentasche voller Geld“ jedne z třoch spěchowanskich mytow zdobył. Alfons Wićaz je so z awtorom rozmołwjał.

Kak je scyła k wobdźělenju dóšło?

wozjewjene w: Kultura

Z Karlom Petrickom, Dennyjom Kralom a Jonasom Krawčikom ma regionalny ligist FC Hornja Łužica Neugersdorf hnydom třoch koparjow w swojich rjadach, kotřiž su tež wažna zepěra Serbskeje koparskeje wubranki. Za jich kwalitami je so naš reporter Georg Zielonkowski pola trenarja FC Hornjeje Łužicy Vragela da Silvy prašał.

Karl Petrick

Vragel da Silva: Bjez toho zo bych přehnawał­, móžu prajić, zo je Karl najwažniši hrajer mojeho mustwa. Wón drje njeje na poziciji předstopowarja wu­rjadny technikar, je pak wosebje tohodla wažny, dokelž cyłk hromadźe dźerži. Přeco­ zaso posrědkuje mustwu chutnosć našeho sporta. Hdyž hubu wočini, woprawdźe­ wšitcy na njeho słuchaja. Karl je za mnje jara wažna wosobina w teamje. Hladajo na wšo to njemóžu sej lěpšeho kapitana za njón předstajić.

Denny Kral

wozjewjene w: Sport
srjeda, 15 februara 2017 13:00

W Delanach twarja a dale warja

Přetwar a ponowjenje Ralbičanskeje šulskeje kuchnje derje postupujetej

Ralbicy (JK/SN). Byrnjež tež w Ralbičanskej wyšej šuli prózdniny byli, tam woprawdźity měr njeknježi. Za kulisami so pilnje dźěła. Hižo minjeny tydźeń su kuchnju z prowizoriskej sćěnu wot předrumow wotdźělili. Tam twarja a instaluja firmy z wokoliny nowe přijomne rumnosće za wobhospodarjenje šulskeje kuchnje. W kuchni samej pak kachle zymne njewostanu. Kuchar Alarcon Cardenas-Hančik wari dale wobjed za pěstowarni w Ralbicach a Chrósćicach. Wottam je słyšeć, zo wobjed jara słodźi, zo je wotměnjawy a stajnje dypkownje a w požadanym mnóstwje dochadźa. Je tuž derje, hdyž maja so rjemjeslnicy do dźěła, zo bychu kucharjej dale dobre wuměnjenja abo snano hišće lěpše zawěsćili.

wozjewjene w: Łužica
srjeda, 15 februara 2017 13:00

Spěšnosć při šuli wobmjezować

Wulke Ždźary (MFü/SN). Na naprašowanje gmejnskeho radźićela Reika Stephana (CDU) rozprawješe nawoda gmejnskeho hłowneho zarjada Sven Koppen čłonam Łazowskeje gmejnskeje rady na jich zašłym posedźenju wo tym, zo běchu kónc januara zastupjerjo gmejny hromadźe ze zastupjerjemi wokrjesa při Wulkoždźarowskej zakładnej šuli. Na městnje wobhladachu sej tam wobchadnu situaciju.­ Kaž Koppen wobkrući, su rjadowanja nadróžneho wobchada tak změnjene, zo hodźi so wobmjezowanje spěšnosće na 30 kilometrow na hodźinu jednorišo zwoprawdźić. Po posudźowanju wokrjesnych fachowcow Wulkoždźarowske kubłanišćo wšitke wuměnjenja za to spjelnja. Tak móhli wotpowědnu próstwu wokrjesej zapodać. Fachowcy pak běchu na to skedźbnili, zo ma tuchwilne rjadowanje z warnowanskim znamješkom „Kedźbu, dźěći“ wjetšu hódnotu hač wobmjezowanje na 30 km/h.

wozjewjene w: Łužica
srjeda, 15 februara 2017 13:00

Budyska imobilija najdróša

Drježdźany (SN/MWj). Sakske ležownostne awkcije AG (SGA) přewjedu 24. februara w Lipsku a 28. februara w Drježdźanach swoju lětušu nalětnju awkciju. Nimale 120 imobilijow ze šěsć zwjazkowych krajow je na předań, mjez nimi wjacore objekty z wuchodneje Sakskeje. W Pfaffendorfje, měšćanskim dźělu Königsteina­ w Sakskej Šwicy, poskićeja atraktiwne bydlenske twarjenje. Pod pomnikoškitom stejacy dom su 1767 natwarili­ a w 1990tych lětach wobšěrnje saněrowali. W twarjenju su štyri dowo­lowe bydlenja. Minimalny poskitk leži pola 160 000 eurow.

Najwyši minimalny poskitk wšitkich sakskich imobilijow žadaja sej z 390 000 eurami za pod pomnikoškitom stejacy bydlenski a wobchodny dom w Budyšinje. Wón steji na Lawskich hrjebjach direktnje napřećo Centerej na Žitnych wikach. Bydlenska a wužiwanska płonina wosom bydlenjow a jedneje přemysłoweje jednotki je 580 kwadratnych metrow wulka.

wozjewjene w: Łužica

Serbska debata

nowostki LND