Z wudaća: srjeda, 15 měrca 2017

Wot spočatka wuchadźenja Serbskich Nowin jako wječornik stara so Jan Šołta­ wo to, zo maja čitarjo w Kašecach swoju nowinu stajnje dypkownje w kašćiku. Spočatnje je Šołta tež hišće w Žuricach po puću był, hižo něšto lět pak so na Kašecy wobmjezuje. Wo jeho posłužbje­ je so Jan Kral z nim roz­mołwjał.

Kak sće scyła k tomu přišoł, Serbske Nowiny roznošować?

J. Šołta: Mje je tehdy sobudźěłaćer rozšěrjenja nakładnistwa Feliks Haza narěčał, hač njeby to něšto za mnje było. Myslach sej, něšto móžeš tež za serbstwo činić, a přiwzach poskitk. Za to mi hnydom Žuricy sobu dowěrichu.

Kak sće to po puću?

J. Šołta: W lětnim času a při rjanym wjedrje jězdźu z kolesom. Při hubjenym wjedrje sym z awtom do Žuric jězdźił. Žuricy je potom znaty přewzał. W Kašecach nětko pěši roznošuju. To je dobra přičina, so hibać a něšto za strowotu činić. Mój kardiologa wuskutk toho tež zwěsća.

Maće zastupjerja za tón pad, zo njeje Wam móžno nowinu nosyć?

J. Šołta: Hdyž sym chory abo hinak zadźěwany, to moji swójbni nadawk přewozmu. W dowolowym času mje susodka zastupuje.

Jurij Dźisławk z Haslowa dlěje hač 22 lět Serbske Nowiny roznošował

Wot septembra 1994 hač do decembra 2016 je Jurij Dźisławk w Haslowje, Wutołčicach a Sulšecach Serbske Nowiny roznošował. Tak je jedyn z tych, kotřiž su najdlěje swěrnje naš wječornik ludźom dodawali. Přez cyłe lěta bě jemu to wutrobna naležnosć. Chorosće dla pak dyrbješe nadawk złožić a jón druhemu přewostajić.

„Jónu je načasu a nětko bě tak daloko.“ Dlěje hač 22 lět je Haslowčan Jurij Dźisławk tydźeń wob tydźeń wot póndźele do pjatka Serbske Nowiny roznošował. Kónc tydźenja bě to hišće Předźenak a měsačnje kulturny časopis Rozhlad. „Štó drje by hewak nadawk činić dyrbjał, hdyž nic čitarjo wječornika a Serbja.“ Spočatnje bě hišće wjac zajimcow w Has­lowje, Sulšecach a Wutołčicach Serbske Nowiny abonowało. „Jich pak je dale a mjenje. Młodźi ludźo hižo telko nowinu nječitaja, maja dźě internet, hdźež najnowše nowinki SN hižo zahe popoł­dnju nańdu“, wón wuswětla.

Pod tymle nadpismom z dodawkom „konfrontacija iniciatiwneje skupiny Serbski sejm Serbam njetyje“ dawa předsyda Domowiny Dawid Statnik slědowace­ linki do diskusije:

Něhdźe 15 wosobow wopřijaca sejmi­kowa iniciatiwna skupina Serbski sejm přepóznawa (verkennt) bazowu demokratiju třěšneho zwjazka ze 7 300 čłonami w Domowinje přisłušacych towarstwach a zwjazkach. Iniciatiwa tohorunja nochce připóznać, zo je zajim mjez towaršnostnje angažowanymi Serbowkami a Serbami na aktiwitach „sejma“ nadal snadny. Ze 46 adresatow (sobustawske towarstwa a čłonojo Zwjazkoweho předsydstwa Domowiny), kotrymž smy přeće iniciatiwy wo rozmołwu posrědkowali, reagowachu jeno dźesaćo, a ći su krótkodobny termin bjez konkretneje temy­ přewažnje wot­pokazali.

W zdźělence iniciatiwna skupina za serbske ludowe zastupnistwo Serbski sejm Domowinje wumjetuje, zo zjawnosć zamyla. Serbske Nowiny tule spis k diskusiji wozjewja:

W lisće čłonskim towarstwam a předsydstwu Domowiny kaž tež zjawnje w Serbskich Nowinach je Iniciatiwa za demokratisce legitimowane ludowe zastupnistwo Serbow – Serbski sejm w februaru z konkretnymi terminami prosyła na zjawnu rozmołwu wo centralnych přichodnych nadawkach, kotrychž rozrisanje je trěbne, zo by so zachowała kulturna identita serbskeho ludu, a za trěbne politiske kompetency. Přeprošenje bě zwjazane z wočakowanjom, dojednać so při wočiwidnje přiwótřacych so wěcownych problemach w zajimje wšitkich derje měnjacych Serbow, na powšitkownje akceptowane a politisce jednanjakmane zastupnistwo. Na poručenu rozmołwu njebě wothłosa. Na naprašowanje pak njeoficielnje znowa rěkaše, zo wo tajku rozmołwu njerodźa. Zwjazkowe předsydstwo tuž swoju obstrukcisku strategiju zašłych pjeć lět dale wjedźe.

Druhdy je proteza abo narunanje kusadła jenička móžnosć, ludźom ze zubnymi problemami dale zaručić, zo móhli so dosć derje zežiwić. Wolóženja kaž implantaty abo kumštne zuby přińdu z rukow nazhonitych zubnych technikarjow, kotrež je w dentalnych laborach swědomiće a za kóždeho jednotliwca wotpowědnje předstawam zubneho lěkarja zhotowjeja. Zubny lěkar a technikar skutkujetaj zhromadnje na dobro pacienta. Zubny lěkar pak móže pacienta jenož potom zaso do wšědneho dnja pósłać, hdyž je tež technikar derje a swědomiće dźěłał.

Dentalny labor Tomaša Mjetaša na Wojerowskej Cyrkwinskej je regionalnym zubnym lěkarjam hižo přez lěta dobra adresa. Tam zhotowja Sulšečan hromadźe z dalšej mišterku a jědnaće přistajenymi zubnymi technikarjemi wšo to, štož zubny lěkar za swojich pacientow jako dobre a spomóžne wobhladuje.

SV Babelsberg 03

– Budissa Budyšin 2:2 (1:2)

Zestawa hosći: Wohlfeld – Kolan, Patka, Hausdorf, Heppner, Pfanne, Hoßmang, Žuljević (89. Baudis), Rosendo, Barnickel (73. Hermann), Hänsch (58. Němec)

Prěnju hru jako zamołwity trenar koparjow Budissy Budyšin měješe Torsten Gütschow w Babelsbergu. Po krótkej přihotowanskej fazy chcyše so wón z mustwom rady z najlěpšim wunoškom nawróćić. Z Maikom Salewskim pak pobrachowaše najnazhonićiši stajny hrajer pjateje žołteje karty dla. Prěnje akcenty sadźachu hosćo. 1:0 bě Daniel Hänsch přihotował a Marko Žuljević docpěł (13.). Po tym zo běchu domjacy dwě šansy wuwostajili, woni přez Andisa Shalu wurunachu (27.). Njetraješe dołho a Budyšenjo znowa nawjedowachu. Třělwa nadběhowarja Hänscha dyri do hornjeho třiróžka wrotow (31.). Hosćo startowachu dalše nadběhi, zo bychu třeće wrota docpěli.

Přećiwo wupokazanju

Budyšin. Zwjazkarstwo Budyšin wostanje pisany podpěruje saksku peticiju přećiwo wupokazanju ćěkancow do Afghanistana. To su na wčerawšim zetkanju wobzamknyli. W internetnej peticiji žadaja sej podpisarjo wot sakskeho knježerstwa, z praksu wupokazanja hnydom přestać. Wšako njeje Afghanistan žadyn „wěsty pochadny kraj“.

Přihoty běža

Budyšin/Wodowe Hendrichecy. Přihoty na lětušu olympiadu serbskeje rěče běža. Wona wotměje so kónc apryla we Wodowych Hendrichecach, zdźěla Serbske šulske towarstwo. Hišće hač do kónca měrca je přizjewjenje móžne. Na olympiadźe pruwuja ertne a pisomne serbskorěčne kmanosće šulerjow 6. lětnika wyšich šulow Hornjeje, srjedźneje a Delnjeje Łužicy kaž tež serbskeju gymna­zijow.

Kolesowansku šćežku rozšěrić?

Prěni raz schadźowachu so wčera zastupjerjo šěsć němskich dźiwadłow w Budyskim NSLDź, zo bychu festiwal „Witajće druhdźe III – hrajo so zetkawać“ přihotowali. Wot 4. do 7. meje chcedźa w Budyšinje předstajić dźiwadłowe hry z ćěkancami a domoródnymi dźěćimi a młodostnymi. Studenća z Lipšćanskeho uniwersitneho instituta Centre of competence for theatre projekt přewodźeja. Foto: SN/Maćij Bulank

18. swětowy dźeń šulerskeho dźiwadła z hosćimi

Budyšin (SN/CoR). Prěni raz wočakuja na 18. swětowy dźeń šulerskeho dźiwa­dła 27. měrca w Budyskim Němsko-Serbskim ludowym dźiwadle skupinu Elisabeth-von-Thadden-gymnazija z partnerskeho města Heidelberga. Šulerjo chcedźa pod hesłom noweho planeta „Celtagon“ utopiju předstajić, kak chcedźa jutře žiwi być. Je to zhromadny projekt z dźiwadłom Junges Theater Heidelberg, a woni su z hosćom Serbskeho dźěćaceho dźiwadła w NSLDź. Planowane je to jako wuměna, wšako chcedźa čłonojo Serbskeho dźěćaceho dźiwadła wot 10. do 13. apryla Heidelberga wopytać. Woni su přeprošeni, so na tamnišim prěnim dźiwadłowym laborje „domizna“ wobdźělić. Tež profije so wuměnjeja. 3. apryla předstaji Heidelbergske dźiwadło inscenaciju „Blutrote Schuhe“ Charlesa Wayja w Budyšinje, kruch „Terror“ budźe potom nazymu w partnerskim měsće widźeć.

Kamjenc (SN/at). SPD w Budyskim wo­krjesu chce so we wobłuku dźěłoweho kruha ze serbskimi naležnosćemi zaběrać. Přeprošenje předsydkow městneju zwjazkow Kamjenc a Wojerecy Kathrin Michel a Margitty Albrecht kaž tež předsydow Budyskeho městneho a wokrjesneho zwjazka dr. Měrćina Krawca a Kevina Stanulle do Kamjenca je wčera dźesać wosobow, Němcow a Serbow, sćěhowało. Mjez nimi běštaj tež předsyda Domowiny Dawid Statnik a Harald Baumann-Hasske, zapósłanc Sakskeho krajneho sejma a jedyn z narěčenskeju partnerow frakcije SPD za serbske naležnosće.

Přitomni zwěsćichu, zo je trjeba so ze serbskimi prašenjemi na bazy rozestajeć. Tu zdobyte informacije móhli skutkowanje frakcije w krajnym sejmje, ale tež dźěło jako koaliciski partner w sakskim knježerstwje podpěrać, rozłoži šef SPD za město Budyšin a wokolinu dr. Měrćin Krawc na naprašowanje. „Chcemy so ze serbskimi temami zaběrać, je sćěhować, tež z hosćimi, zo njebychmy stajnje jenož w swójskim kruhu byli“, Krawc podšmórny.