Wojerecy (AK/K/SN). Wulke nakładne wozydła njebudu w bliskim přichodźe wobchad w samych Wojerecach hižo poćežować. Wo to postara so twar wobjězda zwjazkoweje dróhi B 97 wuchodnje města. „Wobjězd Wojerec je scyła dobry přinošk k wjetšej wobchadnej wěstoće“, wuzběhnje Isabel Siebert, nowinska rěčnica Sakskeho krajneho zarjada za dróhotwar a wobchad (LASuV), kotryž ma projekt na starosći.
Na wuchodnej kromje Wojerec běchu loni we wobšěrnej měrje kładli nowe roły za pitnu wodu kaž tež za dalnoćopłotu. Zamołwite instancy za wone medije, mjez druhim transportownja płuna ONTRA a Wojerowske zastaranske zawody, běchu wšitke dźěła same wuwjedli. Drježdźanski krajny zarjad jako twarski knjez je wudawki za to sobu přewzał.
Budyšin (SK/SN). Wjele přitomnych, předewšěm młodych ludźi, spožči předstajenju knihi wo bojach zachowanja španiskeje republiki před wosom lětdźesatkami wosebity raz. Tema wječora minjeny pjatk w Budyskej měšćanskej bibliotece, róla žonow w španiskej byrgarskej wójnje, njeje jenož w sprjewinym měsće lědma wobjednana tema, žněješe pak wjele zajima. Wšako wosebje młoda generacija mało wo tehdyšim času wě.
Karla Popp a Anita Kochnowski, dźowce interbrigadistow-zakitowarjow demokratije w Španiskej přećiwo pučistam Franca, podaštej přehlad wo podawkach, mjeztym zo serbski historikar Hajko Kozel wo situaciji žonow w Němskej wot 1918- do 1930tych lět porěča, podawajo historiski kontekst prašenja runoprawosće žonow. Anita Kochnowski, wudawaćelka wobšěrneje biografiskeje dokumentacije „Žony a španiska wójna 1936–1939,“ wuzběhny, zo so z nětko wušłej knihu prěni króć na mnohe njeznate žony spomina, kotrež wojowachu w Španiskej a zwonka kraja za republiku. Z dokumentaciju je jim wona pomnik stajiła. Kniha wopřijima nimale 700 stron.
Póndźelu wječor su lětuši rjad ekumeniskich póstnych seminarow w połnje wobsadźenej cyrkwi Smochčanskeho Domu biskopa Bena z teologiskej temu dale wjedli, a to z poprawnej přičinu reformacije před 500 lětami: „Wot 95 tezow k bibliji – Zwadna tema wotpusk“.
Rekord spěšnosće nastajiła
Nowe Błohašecy. Ze swojim wosobowym awtom typa VW je młoda žona wčera w Nowych Błohašecach dotalny negatiwny rekord w lětušej statistice spěšnosće w Budyskim wokrjesu nastajiła. Na statnej dróze S 111 błysknychu ju při wobchadnej kontroli ze 124 km/h, a to při dowolenych 50 km/h. Hrěšnica dyrbi nětko 680 eurow pokuty płaćić, tři měsacy nóžkować a dóstanje nimo toho dwaj dypkaj w Flensburgu.
Ze swěta rejow
Budyšin. Z pućowanjom po stawiznach rejwanja prezentujetej njedźelu, 19. měrca, w 16 hodź. balet Serbskeho ludoweho ansambla a moderatorka Kristina Nerádowa małym a wulkim přihladowarjam tójšto wo swěće rejow. Wopytowarjo jenož njezhonja, wot hdy ludźo rejuja, ale tež, kelko rozdźělnych formow a stilow rejwanja eksistuje. Wot barokneho menueta přez Wiensku klasiku hač k rock ’n’ rollej dožiwja hosćo rejwansku hodźinu połnu horcych rytmow, ke kotrymž smědźa so tež sami pohibować. Za zarjadowanje na žurli SLA poskićeja w předpředani swójbny lisćik za 16 eurow a jednory za šěsć.
Radźićeljo so zetkaja
Róžant. Wjacore wažne dypki steja na dnjowym porjedźe posedźenja gmejnskeje rady Ralbicy-Róžant jutře, štwórtk, we 18.30 hodź. w Róžeńčanskej sydarni. Tam porěča wo móžnym nowotwarje Ralbičanskeje pěstowarnje a zaběraja so z energetiskim saněrowanjom Róžeńčanskeho wjacezaměroweho domu. Dalša tema budźe planowane powjetšenje Ralbičanskeje kormjernje swini.
Porchow (AK/SN). Zaměrowy zwjazk za wopłóčki Při Klóšterskej wodźe (AZV) chce w Sernjanach a Porchowje wjetšu ličbu twarskich ležownosćow za młode swójby syći přizamknyć. Tole předwidźi hospodarski plan, kotryž je wjetšina zwjazkoweje zhromadźizny wčera wobzamknyła. Zastupjerjo Porchowa, Chrósćic a Worklec planej přihłosowachu, gmejna Ralbicy-Róžant bě přećiwo njemu. Gmejna Pančicy-Kukow bě zamołwjena, dokelž mějachu tam sami posedźenje gmejnskeho wuběrka.