Z wudaća: srjeda, 15 měrca 2017

Nimale 400 najwšelakorišich powołanjow w Němskej mamy. Njeje tuž scyła tak jednore so rozsudźić. Ćim lěpje, zo móža so šulerjo w praksy wuspytać a nazhonjenja zběrać. Chwalobna je iniciatiwa „Pohladaj nutř“, kotruž tónle tydźeń mjez druhim tež w Budyskim wokrjesu přewjeduja. We wobłuku akcije smědźa zajimcy někotre hodźiny w zawodach přebywać a tam dźěłowe wotběhi dožiwić. Na akciju su so předewzaća dokładnje přihotowali a ju organizatoram přizjewili. Porno lońšemu wobdźěla so na njej tónraz 30 procentow wjace šulerjow, štož pokazuje na wuspěšne zarjadowanje. Hladaš-li pak na lisćinu móžnosćow, pytaš podarmo za mjeńšimi tež serbskimi rjemjeslniskimi zawodami. Zwjetša wobdźěleja so wjetše firmy, institucije, šule a samo agrarne drustwa. Škoda tuž, zo wosebje rjemjeslniske zawody składnosć njewužiwaja. Wšako je to přiležnosć, zajim za powołanje budźić. Bianka Šeferowa

Planuja cyłkownje dwanaće milionow eurow

Wojerecy (AK/K/SN). Wulke nakładne wozydła njebudu w bliskim přichodźe wobchad w samych Wojerecach hižo poćežować. Wo to postara so twar wobjězda zwjazkoweje dróhi B 97 wuchodnje města. „Wobjězd Wojerec je scyła dobry přinošk k wjetšej wobchadnej wěstoće“, wuzběhnje Isabel Siebert, nowinska rěčnica Sakskeho krajneho zarjada za dróhotwar a wobchad (LASuV), kotryž ma projekt na starosći.

Na wuchodnej kromje Wojerec běchu loni we wobšěrnej měrje kładli nowe roły­ za pitnu wodu kaž tež za dalnoćopłotu. Zamołwite instancy za wone medije, mjez druhim transportownja płuna ONTRA­ a Wojerowske zastaranske za­wody, běchu wšitke dźěła same wuwje­dli. Drježdźanski krajny zarjad jako twarski knjez je wudawki za to sobu přewzał.

Čłonojo čěskeho Towarstwa přećelow Serbow SPL podpěruja Delnich Serbow w boju přećiwo planowanemu přikrótšenju wučby serbšćiny na braniborskich šulach. Na kromje­ hłowneje zhromadźizny Maćicy Serbskeje minjenu sobotu w Budyšinje přepodaštaj Radek Čermák a Antonín Kříž předsydźe Domowiny Dawidej Statnikej a jednaćelej třěšneho zwjazka Markej Kowarjej (wotprawa) lisćiny z nazběranymi protestnymi podpismami. Foto: SN/Maćij Bulank

We wčerawšim wudaću SN je so do rozprawy wo hłownej zhromadźiznje Sportoweje jednotki Njebjelčicy zmylk zasunył. SJN njeswjeći hakle 2018 swoje 60lětne wobstaće, kaž mylnje wozjewjene,­ ale hižo lětsa,­ potajkim 18. nowembra 2017. Serbske sportowe towarstwo w Njebjel­čicach bu 8. no­wembra 1957 załožene. Awtor prosy wo wodaće za misnjenje.

Budyšin (SK/SN). Wjele přitomnych, předewšěm młodych ludźi, spožči předstajenju knihi wo bojach zachowanja španiskeje republiki před wosom lětdźesatkami wosebity raz. Tema wječora minjeny pjatk w Budyskej měšćanskej bibliotece, róla žonow w španiskej byrgarskej wójnje, njeje jenož w sprjewinym měsće lědma wobjednana tema, žněješe pak wjele zajima. Wšako wosebje młoda generacija mało wo te­hdyšim času wě.

Karla Popp a Anita Kochnowski, dźowce interbrigadistow-zakitowarjow demokratije w Španiskej přećiwo pučistam Franca, podaštej přehlad wo podawkach, mjeztym zo serbski historikar Hajko Kozel wo situaciji žonow w Němskej wot 1918- do 1930tych lět porěča, podawajo historiski kontekst prašenja runoprawosće žonow. Anita Kochnowski, wudawaćelka wobšěrneje biografiskeje dokumentacije „Žony a španiska wójna 1936–1939,“ wuzběhny, zo so z nětko wušłej knihu prěni króć na mnohe njeznate žony spomina,­ kotrež wojowachu w Španiskej a zwonka kraja za republiku. Z doku­mentaciju je jim wona pomnik stajiła. Kniha wopřijima nimale 700 stron.

Wuknjacy Krabatoweje zakładneje šule Kulow, kotřiž so na wučbje serbšćiny po koncepće 2plus wobdźěleja, wopytachu zawčerawšim Budyski Serbski muzej. Měrćin Brycka pokaza holcam a hólcam serbsku drastu a rozprawješe jim wo serbskich nałožkach. W dalšim dźělu­ wotměnjaweho dopołdnja móžachu dźěći nalětnje wěnčki z hałžkow paslić. Foto: Lubina Dučmanowa

Póndźelu wječor su lětuši rjad ekumeniskich póstnych seminarow w połnje wobsadźenej cyrkwi Smochčanskeho Domu biskopa Bena z teologiskej temu dale wjedli, a to z poprawnej přičinu reformacije před 500 lětami: „Wot 95 tezow k bibliji – Zwadna tema wotpusk“.

Rekord spěšnosće nastajiła

Nowe Błohašecy. Ze swojim wosobowym awtom typa VW je młoda žona wčera w Nowych Błohašecach dotalny negatiwny rekord w lětušej statistice spěšnosće w Budyskim wokrjesu nasta­jiła. Na statnej dróze S 111 błysknychu ju při wobchadnej kontroli ze 124 km/h, a to při dowolenych 50 km/h. Hrěšnica dyrbi nětko 680 eurow pokuty płaćić, tři měsacy nóžkować a dóstanje nimo toho dwaj dypkaj w Flensburgu.

Ze swěta rejow

Budyšin. Z pućowanjom po stawiznach rejwanja prezentujetej njedźelu, 19. měrca, w 16 hodź. balet Serbskeho ludoweho ansambla a moderatorka Kristina Nerádowa małym a wulkim přihladowarjam tójšto wo swěće rejow. Wopytowarjo jenož njezhonja, wot hdy ludźo rejuja, ale tež, kelko rozdźělnych formow a stilow rejwanja eksistuje. Wot barokneho menueta přez Wiensku klasiku hač k rock ’n’ rollej dožiwja hosćo rejwansku hodźinu połnu horcych rytmow, ke kotrymž smědźa so tež sami pohibować. Za zarjadowanje na žurli SLA poskićeja w předpředani swójbny lisćik za 16 eurow a jednory za šěsć.

Radźićeljo so zetkaja

Róžant. Wjacore wažne dypki steja na dnjowym porjedźe posedźenja gmejnskeje rady Ralbicy-Róžant jutře, štwórtk, we 18.30 hodź. w Róžeńčanskej sydarni. Tam porěča wo móžnym nowotwarje Ralbičanskeje pěstowarnje a zaběraja so z energetiskim saněrowanjom Róžeńčanskeho wjacezaměroweho domu. Dalša tema budźe planowane powjetšenje Ralbičanskeje kormjernje swini.

Zaměrowy zwjazk za wopłóčki hospodarski plan wobzamknył

Porchow (AK/SN). Zaměrowy zwjazk za wopłóčki Při Klóšterskej wodźe (AZV) chce w Sernjanach a Porchowje wjetšu ličbu twarskich ležownosćow za młode swójby syći přizamknyć. Tole předwidźi hospodarski plan, kotryž je wjetšina zwjazkoweje zhromadźizny wčera wobzamknyła. Zastupjerjo Porchowa, Chrósćic a Worklec planej přihłosowachu, gmejna Ralbicy-Róžant bě přećiwo njemu. Gmejna Pančicy-Kukow bě zamołwjena, dokelž mějachu tam sami posedźenje gmejnskeho wuběrka.