Istanbul/Berlin (dpa/K/SN). Wot njeho samoho a syłow jeho přiwisnikow wulce sławjene dobyće prezidenta Recepa Tayyipa Erdoğana při jutrownu njedźelu přewjedźenym referendumje wo dwělomnym zawjedźenju prezidialneho systema njeje najskerje hišće doskónčne. Wólbna komisija chce skóržby nastupajo njeprawidłownosće při wothłosowanju pruwować. A tych je prawdźepodobnje dźeń a wjace. Po najnowšim je opozicija próstwu stajiła, wuslědk anulować, a chce, je-li trjeba, hić na Europske sudnistwo za čłowjeske prawa. Z 51,4 procentami bě změna wustawy jenož cyle snadne přihłosowanje dóstała. Předewšěm so kritizuje, zo bě wólbna komisija schwaliła, tež wot njeje njekołkowane a njewerifikowane wólbne lisćiki za prawe měć. To je ranjenje turkowskeho prawa. We wjacorych turkowskich městach, mjez druhim w stolicy Ankarje, w Istanbulu, a zapadoturkowskim Izmirje, zhromadźichu so wčera znowa tysacy, zo bychu přećiwo wuslědkej wothłosowanja demonstrowali.
INTERNET je tež w susodnej Čěskej dźensniši dźeń njeparujomny medij. Tuchwilu wužiwa jón wšědnje 76,5 procentow wobydlerjow staršich hač 16 lět, potajkim na wšěch 6,7 milionow wosobow. Wot lěta 2006 sem je so ličba wužiwarjow interneta staršich hač 16 lět wo 36 procentow powyšiła. Tole zdźěleja medije kraja, złožujo so na daty Čěskeho statistiskeho zarjada (CSÚ). Z nich zdobom wuchadźa, zo so 1,6 milionow Čechow do interneta wohlada. „Zwjetša jedna so při tym wo wobydlerjow nad 65, ludźi zakładneje zdźěłanosće abo bjezdźěłnych“, wuswětla fakt šefina ČSÚ Iva Ritschelová, přispomnjejo, zo pak so jich podźěl lěto wob lěto pomjeńša. Wjetšina młodych ludźi do 24 lět surfuje dlěje hač 20 hodźin wob tydźeń w interneće. Něhdźe dwě třećinje wužiwarjow interneta so z nim přez notebook zwjazuje, přibližnje połojca posłužuje so kompjutera, smartfona abo tableta. Zdobom ličba tychle wužiwarjow dale spěšnje rosće. Wjetšina wužiwa internet wšědnje krótšo abo dlěje za skontaktowanje z přiwuznymi a znatymi, dale a bóle pak tež móžnosćow socialnych syćow dla. Telefonowanje přez internet porno tomu woteběra.
Z nowosću je Serbska kulturna informacija w Budyskim Serbskim domje ćichu sobotu wopytowarjow wabiła. Prěni raz je křižer – Bjarnat Cyž z Noweje Jaseńcy – wo tymle nabožnym nałožku informował a při tym wo swojich dožiwjenjach jako tajki powědał.
Budyšin (CS/SN). Normalnje je, zo wuhladaš křižerja jenož na konju. W Budyšinje pak mějachu nowosć: Ćichu sobotu je Bjarnat Cyž wopytowarjam wo tym powědał a na jich prašenja wotmołwjał. Nazhonity křižer bě sobu přinjesł, štož křižer a kóń trjebataj, kaž su to šabraka, graty, wopušna sekla, suknja a cylinder.
Budyšin (SN/mwe). Nic jenož w hosćencach, hotelach a pensijach běchu jich mějićeljo na jutrownych swjatych dnjach z wobrotom spokojom, tež w parkach a druhdźe registruja jich wudźeržowarjo dosć spokojace wopytowarske ličby.
W Małowjelkowskim prazwěrjencu móžachu přez jutry něhdźe 10 000 hosći witać. Awtowe znamješka pokazachu, zo běchu sej přewažnje swójby z cyłeje Němskeje kaž tež z Čěskeje a Pólskeje do tohole njewšědneho areala z hakle njedawno přepodatym Mitozejom wulećeli. „Wjeselimy so přez wulkotny kónc tydźenja. Najebać njerjane wjedrowe prognozy, móžachmy w prazwěrjencu wjele ludźi witać“, nam Diana Liebsch z Budyskeje wobdźělenskeje a zawodneje towaršnosće BBB zdźěli.