Z wudaća: štwórtk, 18 meje 2017

Dźensa wječor podadźa so čłonojo Krabatoweho towarstwa a Smjerdźečanskeje rejwanskeje skupiny na puć do Słowjenskeje. W městačku Metlika, njedaloko chorwatskeje mjezy, wotměje so składnostnje tamnišeho Vinskeho Vigreda (Winoweho nalěća) lětuši Krabatowy swjedźeń.

Njebjelčicy (JK/SN). Ke kónčinje Bela Krajina wudźeržuje Krabatowe towarstwo wjelelětne styki. Wottam pochadźa Jan Šadowic, znaty tež jako Krabat. Jeho potomnicy ze swójby Šajatović maja w krajinje wjacore winicy a su tuž na tradicionalnym winowym swjedźenju zastupjeni. Tam chcedźa tež na Krabata a jeho stawiznu skedźbnić. Direktna potomnica Šajatovića, Monika Bračika, je aktiwna na polu slědźenja za swojim prjedownikom a iniciěruje mnohe zarjadowanja na temu Krabat. Na lětušich přemysłowych wikach WIR w Kamjencu je wona za Krabatowy swjedźeń w Belej Krajinje wabiła. W chorwatskim Žumberaku, njedaloko słowjenskeje mjezy, wobsedźi jeje swójba winicy. Tam budu čłonojo Krabatoweho towarstwa mjez druhim z hosćom.

W Kromolanskim Krügerec zahrodnistwje žněja nětko jara požadane zelene kórki. Sobudźěłaćerka Jeanette Urban ma zas a zaso swój koš pjelnić. Jenož na tele wašnje dóstawaja so tak mjenowane „dołhe šwižne“ cyle čerstwe na předawanske blido. Tež bohatosć kwětkow za balkon kupcow do zahrodnistwa wabi. Předewšěm pak je to sakska rostlina lěta, wonjaca begonija. Zdobom čakaja tež požadane zela a zeleninowe sadźenki na to, zo skónčnje do zahrodki přińdu. Foto: Joachim Rjela

Choćebuz/Hamburg (SN/at). Powołanske jednanje wo ciwilnoprawniskich sćěhach wobsadźenja kolijow wuhloweje železnicy­ přez aktiwistow Greenpeace w septembrje 2013 we łužiskim rewěrje skónči so zawčerawšim na Braniborskim wyšim krajnym sudnistwje (OLG) z dojednanjom. Konfliktnej stronje, wobhospodarjer łužiskich jamow a milinarnjow LEAG a Greenpeace, stej so na to dojednałoj, zo zarunaja aktiwisća Greenpeace škodu 11 000 eurow. Zdobom wobmjezuje so zawjazk so wobsadźenja wzdać na připrawy wuhloweje železnicy w Braniborskej. OLG je wujasniło, zo ma prěnjotny wusud Choćebuskeho krajneho sudnistwa w dźělach za wopačny.

LEAG je jara spokojom z dojednanjom. „To płaći hladajo na to, zo dyrbi Greenpeace nětko tola škodu zapłaćić“, rjekny Berthold Stevens, nawoda prawniskeho wotrjada přede­wzaća. „Hdyž LEAG pjenjezy do strukturneje změny a do wróćo­twara brunicowych jamow tyka, da je 11 000 eurow derje zapołoženych“, zdźěli Anike Peters, zastupjerka Greenpeace.

Statna dróha S 100 twarskich dźěłow dla dlěje hač lěto zawrjena

Pančicy-Kukow (SN/MWj). Dołho je so wo tym rěčało a wjele diskutowało, nětko­ woprawdźe tak daloko je, zo je statna dróha S 100 w Pančicach-Kukowje za­wrjena. Přičina je nowy móst, kotryž ma nad Klóšterskej wodu nastać. Nimo toho dróhu přez wjes ponowja.

Wjace pjenjez hač dotal planowane trjebaja w Rakecach za ponowjenje Cyrkwinskeho naměsta. Tole wuwabi wčera diskusiju mjez čłonami tamnišeje gmejnskeje rady.

Rakecy (JK/SN). Konsolidacija Rakečanskich gmejnskich financow po słowach wjesnjanosty Swena Nowotneho (CDU) hišće wotzamknjena njeje. To zdźěli wón na wčerawšim posedźenju gmejnskeje rady na naprašowanje z wobydlerstwa. Wobydler bě wo to prosył, hač njehodźeli so sadźby přemysłoweho dawka znižić. Wjesnjanosta skedźbni na to, zo ma tajke rozsudy gmejnska rada rozjimać a wobzamknyć. Přiwšěm su sadźby w Rakečanskej gmejnje hišće tójšto pod sakskim přerězkom a tuž tuchwilu trjeba njeje je změnić.

Budyšin (SN/MWj). Z Budyskim Sprjewinym hotelom a domom na Belmsdorfskej dróze w Biskopicach zawrje Budyski wokrjes lětsa dalšej přebywarni požadarjow azyla. Kaž krajnoradny zarjad w nowinskim wozjewjenju zdźěla, wuběži zrěčenje­ ze Sprjewinym hotelom srjedź julija, w nowembru te z Biskopičanskim domom. Wobě njebudźetej hižo podlěšenej. Přičina je, zo lědma hišće nowi po­žadarjo azyla do Budyskeho wokrjesa přichadźeja, na tamnym boku dźeń a wjace potrjechenych wokrjes wopušća abo dóstawa azylowe připóznaće.

Aktualnje ma wokrjes něhdźe 700 njewobsadźenych­ městnow za ćěkancow. Po najnowšich prognozach tale ličba hač do kónca lěta na 1 200 rozrosće. „Smy nuzowani jednać, hewak dyrbimy hač do kónca lěta něhdźe 700 000 eurow za njewobsadźene městna płaćić, kotrež w tym mnóstwje hižo njetrjebamy“, piše prěni přirjadnik wokrjesa a přisłušny za azylowe prašenja Udo Wićaz.

W Lipsku staraja so serbscy studenća kóžde lěto wo to, zo maja tež we wulkoměsće swoje mejemjetanje. Na nje přichwatachu zawčerawšim tež přećeljo Sorabije a zajimowani Lipšćanscy Serbja. Prěni raz přewodźeše młodostna na dudach hromadźe z akordeonistom wokoło meje rejwace pory. Najspěšniši při wjeršku meje bě Chróšćan Samuel ­Šiman, kiž wuzwoli sej za mejsku kralownu Lubinu Mičkec z Worklec. Swjedźeń wuklinča při zhromadnym praženju kołbaskow a lěhwowym wohenju. Hač do nocy znošowachu so po internatnej zahrodźe serbske ludowe pěsnje. Foto: Franciska Grajcarekec

18.5.2017–24.5.2017 Budyski filmowy palast: Alien – Covenant: wšědnje 17:00 (nimo pó) a 19:45 (nimo pó) | pó 17:15 a 20:00 | pj, so a srj 22:15 Fluch der Karibik 5 w 3 D: srj 19:30 a 22:30 Hanni & Nanni: nj 14:30 Grease Sing-A-Long: srj 19:45 King Arthur – Legend of the Sword w 3 D: wšědnje 16:30 a 19:30 (nimo srj) | pj, so a srj 22:15 Überflieger – Kleine Vögel, großes Geklapper: wšědnje 15:00 pj, so, nj a pó 15:00 | wu 14:30 Guardians of the Galaxy: wšědnje 14:30 (nimo štw a srj) a 17:15 (nimo pó) Get Out: štw 20:00 | pj, so a srj 22:30 Guardians of the Galaxy w 3 D: wšědnje 19:30 (nimo wu a srj) | pj a so 22:15 The Boss Baby: wšědnje 17:00 | pj a wu 14:30 Fast & Furious 8: wšědnje 20:00 (nimo štw a pó) Abgang mit Stil: nj 12:30 | so 14:30 Die Schlümpfe – Das verlorene Dorf: wšědnje 14:30 (nimo štw a srj) | nj 12:30 Die Schöne und das Biest w 3 D: nj 12:30 Conni & Co. 2 – Das Geheimnis des T-Rex: nj 12:30

Kino-ekstra: Der glücklichste Tag im Leben des Olli Mäki: pó 14:30, 17:15 a 20:15

Ćišćanska pěstowarnja „Lutki“ w nošerstwje Dźěłaćerskeho dobroćelstwa swjeći jutře­, pjatk, 70lětne wobstaće. Tónle podawk zahaja z mejemjetanjom, za kotrež su předšulske dźěći minjene dny małe mejki jako přeprošenje paslili. Kubłarka Sibylle Bernardowa (nalěwo) dźěła hižo 30 lět w pěstowarni. W dwurěčnym kubłanskim koncepće zarjadnišća njepěstuja jeno serbske nałožki. Hižo wjele lět tam tohorunja serbšćinu posrědkuja. Kaž Sibylle Bernardowa přeradźi, ma so tole tež w programje wotbłyšćować, kotryž dźěći jutře předstaja. Foto: Ulrike Herzger

Kamjenc. Wjace hač sto namjetow za ­přichodne mjeno noweje starownje na Budyskej­ horje w Kamjencu dósta mi­njene tydźenje wobhospodarjer Azurit. Tole zdźěli přichodna nawodnica domu ­Kathleen Hanschke. Mjez wobdźělni­kami wubědźowanja běchu wobydlerjo z Halštrowa, Pančic-Kukowa a Biskopic. Šěsć wosobow wopřijaca jury je so nětko na dobyćerja dojednała. Mjeno starownje wozjewja sobotu, 10. junija, we ­wobłuku dnja wotewrjenych duri wot 11 hodź.