Z wudaća: srjeda, 09 awgusta 2017

LSV 61 Tauscha – SJ Chrósćicy 5:6 po třělenju jědnatkow

Zestawa hosći: Cyž – Dórnik, Bětnar, Sentivan, Teichmann, Runt, Henčel, F. Zahrodnik (83. Młynk), Němec, Žur (97. Domaška), Bogusz (53. Králíček)

W prěnim kole krajneho pokala je prěnje mustwo SJ Chrósćicy w Tauscha nastupiło. Přiwisnikam wobeju lěhwow skićeše so přewšo napjata hra. Hosćo hru wot započatka sem kontrolowachu. Prawe šansy pak sej wuhrać njemóžachu. Klasu niže hrajacy hosćićeljo stejachu hłuboko w swójskej połojcy, čakachu na zmylki a tež na kontery.

Prěnju stoprocentnu šansu měješe Chróšćanski nadběhowar Josef Němec we wosmej mjeńšinje. Derje kopnjeny wólny kop pak zadyri do žerdźe. Chró­šćenjo sadźachu w prěnim połčasu wosebje přez standardy akcenty. Tak zhłójčkowa Marko Teichmann po róžku Toma Henčla­ w 40 min. k 0:1.

Nowa wjednica

Njebjelčicy. Viktorija Brězanec je nowa wjednica Njebjelčanskeje pěstowarnje. To wobkrući nowinski rěčnik Křesćansko socialneho kubłanskeho skutka CSB Maik Brězan na wospjetne naprašowanje SN. Wona je zastojnstwo 1. awgusta přewzała, tak CSB jako nošer. Jeje zastupjerka je Andreja Hejdušcyna, kotraž je zdobom zamołwita za hort. Dotalna wjednica, Anke Grofina, bě kónc junija wotešła.

Ermer pola Radworskeje CDU

Radwor. Něhdźe 25 zajimcow je wčera wječor přeprošenje Radworskeho wjesneho zwjazka CDU na žurlu tamnišeho hosćenca „Meja“ sćěhowało. Jako hosća běchu sej direktneho kandidata CDU Rolanda Ermera přeprosyli. Přitomni wužichu składnosć, pjekarskeho mištra z Njedźichowa wosobinsce zeznać.

Pěši přez Čěsku w ani njedźelomaj

Wo kradnjenym kolesu přeco zaso słyšiš. Druhdy ani najlěpši zamk njedosaha, zo by je před paduchami škitał. Policija tohodla poruča, swoje koleso koděrować dać, zo móhli wobsedźerjow w padźe sćazanja pakosćenych kolesow wo tym informować. W Choćebuzu stej Kati Prajs a Ina Boost tele dny pola policije nimale połsta gróćanych wóslikow z tajkim kodom wuhotowałoj. Foto: Michael Helbig

Mjez hornjołužiskimi konjacymi dworami je Bartušec Šumjelowy na kromje něhdy serbskeje wsy Rakojdy w gmejnje Malešecy swojorazny. Wězo móžeš tu jěchać wuknyć a wšelake druhe posłužby wužiwać, kotrež lubowarjam koni na tajkich dworach poskićeja. Na jedyn wobłuk pak je mějićel Ekhard Bartuš wosebje hordy. Jězby z kuču a kursy za přichodnych wodźerjow kučow 74lětnemu wosebje na wutrobje leža.

„Stara wjesnjanka praješe, zo sym najprjedy wuknył z konjacym zapřahom jězdźić a hakle po tym běhać“, Rakojdźan měni. W ratarstwje staršeju wotrostły ma wosebity poměr ke konjam a konjacym zapřaham. Nimale 20 lět wobdźěleše so wukubłany ratar za čas NDR na wubědźowanjach jako wušikny wodźer zapřaha. Radosć nad tejle družinu konjaceho sporta bě tomu sobu polěkowała, Šumjelowy dwór wutworić a za to wot 1998 na swójskej pódźe inwestować.

„Lubowach swoje čornaki. Hdyž pak chcych jězby z běłej kwasnej kuču poskićeć, mi rjeknychu, zo so čorne konje k tomu njehodźa. Ćežkeje wutroby je předach a kupich sej šěre šumjele“, wuswětla Ekhard Bartuš mjeno swojeho konjaceho dwora.

Biskopicy (SN/MiR). Syć za dźěło z dźěćimi a młodźinu w Biskopicach (KiJu) pyta młodych ludźi za dobrowólne socialne lěto (FSJ) a dobrowólne zwjazkowe lěto (BFD). Wot septembra móža zajimcy w tymle wobłuku skutkować. Namołwjeni so powabić su młodostni, kotřiž nimaja hišće studijne abo wukubłanske městno a tež młodźi dorosćeni, kotřiž so powołansce nowje orientuja. Zajimcy a zajimče móža mjez druhim w serbskich dźěćacych dnjowych přebywanišćach dźěłać. Partner za KiJu je Serbske šulske towarstwo. „SŠT je nam dotal najdlěje partner w naležnosćach dobrowólneho dźěła“, rozłoži projektowa nawodnica za tele słužby pola KiJu, Birgit Pietrobelli. Dotal mějachu kóžde lěto wja­corych požadarjow, přewažnje zajimcow, za FSJ. Loni skutkowachu štyri mło­dostne w kubłanišćach SŠT. Siegrid Ederec w Malešecach, Hanka Róblec we Wotrowje a Viktorija Zahrodnikec w Chrósćicach. Mjeztym jenož hišće Leonie Handrikec w Ralbičanskej pěstowarni dźěła. Lětsa so hišće nichtó w KiJu a pola SŠT za FSJ přizjewił njeje.

Jutře za šěsć tydźenjow chcedźa zakładny kamjeń noweho Slepjanskeho šulskeho centruma połožić. Tohodla je so tamniša gmejnska rada wčera k wurjadnemu posedźenju zetkała.

Slepo (AK/SN). Nowotwar Slepjanskeho němsko-serbskeho šulskeho kompleksa móže so kaž planowane 21. septembra z połoženjom zakładneho kamjenja zahajić. „Prěnje tři losy za přihotowanske dźěła su hižo wotdźěłane“, rjekny nawoda twarskeho zarjada Slepjanskeje zarjadniskeje zhromadnosće Steffen Seidlich na wčerawšim wurjadnym posedźenju gmejnskeje rady. Jeje čłonojo dalše nadawki rozdawachu.

Budyšin (SN). Njeznaći su w nócy na wutoru běrow zapósłanče w zwjazkowym sejmje a městopředsydki frakcije Lěwicy Caren Lay w Budyšinje nadpadyli. „To je jědnata ataka w Budyšinje a cyłkownje 27. nadpad na jedyn z mojeju wólbnowokrjesneju běrowow wot lěta 2010“, zdźěli zapósłanča.

Skućićeljo běchu spytali, z kamjenom wokno zachodnych duri přerazyć. Njeskutk je policiji přizjewjeny, próstwa wo chłostanje zapodata. Lay namołwi policiju njeskutk přepytować a wujasnić. Při tym je zapósłanče wažne zhonić, „dalokož tu zwisk k aktualnje přiwótřenej klimje w Budyšinje a zjawnje zwuraznjenej kritice na mojej wosobje a stronje po mojich słowach k najnowšim rozestajenjam na Žitnych wikach wobsteji“.

Runje na zahajacej so horcej fazy wólbneho boja nima Caren Lay namóc jako srědk rozestajenja za akceptabelnu.

Kaž Zhorjelska policiska direkcija na naprašowanje SN zdźěli, je Operatiwny wotwobaranski centrum (OAZ) sakskeje policije w Lipsku přepytowanja zahajił.

W Serbach njeje wón žadyn njeznaty, wšako ze swojimi 2,12 metrami hižo optisce wšitko přesahuje. Roman Dźisławk z Chasowa pak je přiwšěm tež politisce a towaršnostnje angažowany čłowjek.

Lěta 1975 rodźeny z Haslowa pochadźacy Roman Dźisławk bě po maturje na Budyskim Serbskim gymnaziju w Drježdźanach zawodne hospodarstwo studował. Dźensa nawjeduje logistiski wotrjad Hornjołužiskich klinikow w Budyšinje z 50 sobudźěłaćerjemi a ma tak dosć wulku zamołwitosć. Lěta 2004 bě Roman Dźisławk nachwilnje za Serbske Nowiny dźěłał a za naš wječornik nowy moderny redakciski system wobstarał.

Paris (dpa/SN). W nakromnej štwórći Parisa je dźensa njeznaty z awtom do skupiny wojakow zajěł a šěsć wosobow zranił. Dweju ćežkozranjeneju dowjezechu do chorownje. Skućićel móžeše ćeknyć, powěsćernja dpa rozprawja. Pozadki podawka w štwórći Levallois-Perret njejsu dotal znate. Měšćanosta štwórće Patrick Balkany je sej wěsty, zo jedna so wo zaměrny nadpad na wojakow, kotřiž přisłušeja anti-terorowej operaciji Sentinelle: Jednotka w mnohich francoskich městach te­roroweho stracha dla patruljuje.

Ministraj před wuběrkom

Brüssel (dpa/K/SN). Ze skandalom skaženych jejow dla je so dźensa belgiski parlament zaběrał. Minister za ratarstwo Denis Ducarme a ministerka za strowotnistwo Maggie De Block wotmołwještaj na prašenja zapósłancow přisłušneju fachoweju wuběrkow. W Belgiskej je wu­dyriła diskusija wo postupowanju cyrobizny dohladowaceje instancy FASNK. Ta je wo fipronilu w jejach pječa hižo w juniju wědźała, wo tym pak tamne staty EU hakle 29. julija informowała.

Přičiny njezboža dale njeznate

Chětro wobškodźeny bu tónle bus, jako so dźensa rano při zemjerženju w chinskej juhopazadnej prowincy Sichuan kamjeniska ze skały wułamachu a na dróhu padnychu. Zemjerženje sylnosće 7,0 je sej znajmjeńša 13 smjertnych woporow žadało, mjez nimi je šěsć turistow. Znajmjeńša 165 ludźi so zrani. Foto: dpa/Fan Peishen