Z wudaća: štwórtk, 10 awgusta 2017

štwórtk, 10 awgusta 2017 14:00

Studija: Boja so přichoda

Njespokojnosće nad swójskim połoženjom dla ludźo AfD wola

Što su přičiny, zo přiwobroćeja so ludźo, tež dźěłarnicy, prawicarskopopulistiskemu orientowanju, potajkim AfD? Tele prašenje je dźěłarnistwam bliska Hansa Böcklerowa załožba w aktualnym pře­pytowanju sćěhowała. Slědźerjo su kónc januara/spočatk februara nimale 5 000 wosobow­ w starobje wot 18 lět nastu­pajo nastajenje, orientowanje hódnoty a wólbnu preferencu online-woprašeli. Wuslědki je Němski dźěłarniski zwjazk wčera w Berlinje předstajił.

wozjewjene w: Kraj a swět
štwórtk, 10 awgusta 2017 14:00

To a tamne (10.08.17)

Pod wliwom drogow stejaceho lokomotiwnika je policija w Hamburgu lepiła. 40lětny je po dotalnych dopóznaćach ćah z 40 wagonami a 3 800 tonami ranžěrował. Při tym ignorowaše signal a zajědźe bjezmała do barjery. Swědk bě do toho wobkedźbował, kak lokomotiwnik joint kuri. Drogowy test na THC, wobstatk hašiša, bě pozitiwny, policija zdźěli. Jězbnu dowolnosć lokomotiwnika dyrbješe 40lětny wotedać.

Jako powědarjo bajkow móža so sakscy politikarjo wopokazać. Při 4. bajkowym festiwalu swobodneho stata wot 17. do 27. awgusta chcetaj so tež sakski ministerski prezident Stanisław Tilich a prezident krajneho sejma Matthias Rößler (wobaj CDU) wobdźělić, Němski centrum bajkoweje kultury jako zarjadowar informuje. Festiwal wěnuje so lětsa pomjeznej kónčinje k Čěskej a tež serbskim tradicijam.

wozjewjene w: To a tamne
štwórtk, 10 awgusta 2017 14:00

Wobdźiwajomne

Kak rozdźělnje so někotři ludźo ze stawiznami zaběraja a je přichodnym genera­cijam zachowuja, je prosće wobdźiwajomne. Tole smy minjene tydźenje stajnje wutoru a štwórtk w lětnjej seriji Serbskich Nowin na lokalnej stronje nazhonili. W dohromady 16 přinoškach zhonichmy wo tym, kak akribisce stawiznisce zajimowani wobydlerjo historiske radija zběraja, so ze starymi jězdźidłami zaběraja abo samo priwatne muzeje wudźeržuja. To su takrjec stawizny k přimnjenju a je derje, tajkile angažement w ćichej komorce tež raz zjawnje hódnoćić. Wjele přinawuknył je tohorunja naš awtor Alfons Handrik, kotryž je wšitke tele přinoški za serbski wječornik napisał. Tójšto hodźin je sej historiske zajimawostki wopisać dał a při tym tež tu abo tamnu hodźinu wjace woprował, hač bě předwidźane. Tež to mam za wobdźiwajomne. Za to jemu wulki dźak. Marian Wjeńka

wozjewjene w: Łužica
štwórtk, 10 awgusta 2017 14:00

Richter: Rozsud swědomja

Drježdźany (dpa/SN). Bywši direktor Sakskeje krajneje centrale za politiske kubłanje Frank Richter je z CDU wustupił. Bě to „wosobinski rozsud swědomja“, z kotrymž bě so wón hižo dlěši čas nosył, rjekny znaty wojowar za čłowjeske prawa nowinarjam Sächsische Zeitung. „Mój wustup je znamjo jasnosće, nic hněwa.“ Richter wopodstatni swój rozsud z po jeho měnjenju pobrachowacej kulturu wadźenja a diskusije w sakskej uniji. „Demokratija je wjace hač jenož puć k wólbnemu kašćikej. Wona rozeznawa so wot monarchije mjez druhim w tym, zo maja ju wobydlerjo za swoju naležnosć, a nic za naležnosć krala, a zo wo jeje přichodźe zjawnje a kontrowersnje diskutuja.“ Richter, kiž bě spočatk 1990tych do CDU zastupił, nawjedowaše centralu wot lěta 2009 hač do spočatka 2017. W tejle funkciji měješe tež wospjet rozmołwy ze zastupnikami Domowiny. Nimo toho wobdźělowaše so wospjet na kóždolětnym Budyskim forumje, w kotrymž režim potłóčowanja w něhdyšej NDR z pomocu časowych swědkow předźěłuja.

wozjewjene w: Kraj a swět
štwórtk, 10 awgusta 2017 14:00

Wólbna opcija zaručena

Ličba dźěći zaso dale a bóle přiběra. Tuta dobra powěsć wotbłyšćuje so w planowanju šulskeje syče w Budyšinje. Stajne blido měšćanskeho zwjazka CDU je so z noworjadowanjom zakładnych šulow zaběrało.

Budyšin (CRM/SN). „Stupaca ličba porodow w našim měsće žada sej nowe planowanje“, potwjerdźi předsyda Budyskeho měšćanskeho zwjazka CDU Tobias Schilling wčera wječor na rozmołwnym kole. Z aktualneje přičiny běše wón měšćanostu za financy, kubłanje a socialne dr. Roberta Böhmera na měsačnu rozmołwu do piwarnje na Thomasa Mannowej přeprosył. Tema pali pod nochćemi. Na to pokaza wulka ličba zajimowanych a angažowanych staršich, kotřiž běchu na zarjadowanje přichwatali.

wozjewjene w: Kubłanje
štwórtk, 10 awgusta 2017 14:00

Snadny přirost

Praha (ČŽ/K/SN). Pjeć měsacow zasobu je bjezdźěłnosć w Čěskej wot spočatka lěta 2017 na kwotu štyrjoch procentow spadowała – w juliju je pak prěni raz zaso přibyła, byrnjež jeničce wo snadnuški 0,1 procent. Přičina tohole přibytka je hłownje, zo njeje hišće wulki dźěl šulskich wotchadnikow studij zahajł resp. do dźěła­wosće přešoł. Přiwšěm njeje sej w zašłych 20 lětach hišće ženje tak mało ludźi dźěło pytało kaž w juliju. Cyłkownje je w pražniku 303 074 wosobow bjez dźěła było. Porno tomu móžachu předewzaća přemysła, ratarstwa a posłužby 188 000 swobodnych dźěłowych městnow poskićeć. Mi­nisterski prezident Bohuslav Sobotka je njedźiwajcy sezonalneho přirosta bjezdźěłnosće ze situaciju na dźěłowych wikach spokojom, dokelž je ličba dźěłopytacych w europskim přirunanju w Čěskej dale na rekordnje niskim niwowje.

W juliju je w Čěskej tež inflacija postupiła, a to wo 2,5 procentow. Podróšili su so předewsěm cyrobizny, na př. mloko, butra a jeja. Kusk butry (250 gr.) płaći nětko­ 50 krónow. Loni w juliju bě hišće 15 krónow tuńša. Sćěh tohole wuwića je podróšenje jědźow w hosćencach.

wozjewjene w: Słowjanski wukraj
štwórtk, 10 awgusta 2017 14:00

„Njezasudźam nikoho“

„Kaltland. Unter Syrern und Deutschen“ rěka kniha Berlinskeje žurnalistki Jasny Zajček, kotraž bě spočatk lěta 2016 štyri měsacy w Budyskim Sprjewinym hotelu požadarjam azyla němčinu podawała. Socialna reportaža je lětsa w nakładnistwje Droemer wušła. Połchorwatka je islamske wědomosće studowała a bu hižo za undercover-reportažu wo přihotach ameriskich wo­jakow za Afghanistan wuznamjenjena. Cordula Ratajczakowa je so z Jasnu Zajček rozmołwjała.

Dožiwjenja w Sakskej drje njejsu Was tak wottrašeli. Wšako runje wo tym rozmyslujeće do Zhorjelca přećahnyć?

wozjewjene w: Kultura
štwórtk, 10 awgusta 2017 14:00

My w špihelu?

Kniha „Unter Sachsen“, wušła w měrcu w Berlinskim nakładnistwje Ch. Links, je po cyłej Němskej wótre diskusije wuwabiła – zdźěla tež tohodla, dokelž su spytali diskusiju wo knize zakazać. Wo wotpowědnym pospyće Mišnjanskeho měšćanskeho zarjadnistwa w juniju rozprawjachu Spiegel online, Neues Deutschland, Focus online, Vorwärts, Süddeutsche Zeitung a Frankfurter Rundschau. Hižo w měrcu bě sakska CDU přeprošenje na diskusiju w Małym domje Drježdźanskeho statneho dźiwadła wotpokazała. Přichodny štwórtk, 17. awgusta, předstaja knihu „Unter Sachsen“ w Budyskim Serbskim domje. Je to zhromadne zarjadowanje Domowiny a Serbskeho instituta w kooperaciji z nakładnistwom Ch. Links a sakskej Heinricha Böllowej załožbu. Robert Lorenc je knihu za SN čitał.

wozjewjene w: Kultura
štwórtk, 10 awgusta 2017 14:00

Wyšoklasowy jěchanski sport

Kaž hižo loni dožiwichu 3 000 lubowarjow konjaceho sporta při 11. Wulkim Budyskim jěchanskim turněrje w Bošecach wyšoklasowe wubědźowanja. Startowali běchu tam 250 jěcharkow a jěcharjow z něhdźe 500 konjemi.

Wosebity hósć bě lětsa Benjamin Wulsch­ner, kotryž ma swój konjenc w Mecklenburgsko-Předpomerskej a kiž doby Wulke myto města Budyšin. Benjamin Wulschner bě wo zarjadowarju a wuhotowarju turněra jara zahorjeny a slubi, zo so zaso wobdźěli. To turně­roweho nawodu Martina Sämanna jara zwjeseli. Sylnje zastupjeni běchu w Bošecach tež jěcharki a jěcharjo z Chrósćic, Pančic-Kukowa, Šěšowa, Njeswačidła, Kulowa, Bošec, Budyšina a tež Zhorjelca. Z 9. městnom poradźi so Laurje­ Grundmannec z PSV Budyšin při A-skakanju česćehódny wuslědk. Cindy Reppe ze Šešowa zaměstni so při Wulkim myće Budyšina na sedmym městnje. Jara derje prezentowachu so tež konjacy sportowcy PSV Rosenhof ze Zhorjelca. Anna-Lena Frenzel wobdźěli so na přikład na ska­kanju a tež na dresurowych wurisanjach.

wozjewjene w: Sport
štwórtk, 10 awgusta 2017 14:00

Kopica wrotow w testowej hrě

SJ Njebjelčicy – TSV Połčnica 5:6 (5:3)

Zestawa SJ Njebjelčicy: Ričel – Domš, Deleńk, Hanuza, Čornak, Haška, Dubaw, Lejnart, Hrjehor, Šram, Korjeńk

W poslednjej přihotowanskej partiji do zahajenja noweje hrajneje doby 2016/2017 steješe trenarjej Handrijej Krawčikej jeno mała horstka hrajerjow k dispoziciji. Dla dowola, studija a zranjenjow pobrachowachu na tym dnju hnydom šěsć aktiwnych. Tola hižo zahe we hrě (2., 4.) Robert Lejnart dwójce do přećiwniskich wrotow trjechi. W 20. mjeńšinje zwyši Handrij Korjeńk samo na 3:1, po tym zo bě hóstny nadběhowar z hłóčkowanjom k 2:1 trjechił (18.). W běhu pjeć mjeńšinow zwyšištaj Lejnart a Korjeńk na 5:1 (35., 40.). Hakle nětko wotućichu hrajerjo z Połčnicy dospołnje a skrótšichu hišće do přestawki na 5:3 (43., 44.). Po přestawce so hosćom trójce zasobu poradźi do čorneho trjechić, šmjat w Njebjelčanskim centralnym škiće tomu polěkowa. Njebjelčenjo w druhim poł­času hižo žane wrota njedocpěchu, byrnjež sej domjacy cyłk pjeć do šěsć rjanych šansow wuhrał. Nětko dyrbi so tón abo tamny trochu polěpšić a lěpje koncetrować, zo by so zazběh w Ćisku poradźił.

wozjewjene w: Sport

Serbska debata

nowostki LND