Z wudaća: wutora, 15 awgusta 2017

wutora, 15 awgusta 2017 14:00

Jednora technika fascinuje

Serbscy fanojo traktorow na najwjetšim zetkanju wuchodneje Sakskeje

Koblicy (BW/SN). Z cyłeje wuchodneje Sakskeje a ze zdalenišich kónčin po­dachu so minjeny kónc tydźenja mějićeljo a lubowarjo starych traktorow do Koblic při Hórnikečanskim jězoru. 14. raz bě tamniše towarstwo traktorowych přećelow tele zetkanje organizowało, a po wšěm zdaću bywa wone z kóždym lětom wjetše. Wjace hač 200 staršich a nowšich, mjeńšich a wjetšich mašinow su tam pokazali.­ Wopytowarjo móžachu při wšelakich wubědźowanjach přihladować, techniku cyle bliska wobdźiwać, po wikach narunanskich dźělow dundać a wjele dalšich poskitkow wužiwać. Tež tójšto serbskich zajimcow z Radworja, Haslowa, Smjerdźaceje a wot druhdźe je sej tam dojěło.

wozjewjene w: Łužica
wutora, 15 awgusta 2017 14:00

Wjace wěstoty na Pastwinej horje

Jewišćo na Kamjenskej Pastwinej horje je jedne z najwoblubowanišich koncertnišćow wuchodneje Sakskeje. Policija a katastrofowy škit pak nuznje radźitej, tam druhi wuchowanski puć připrawić – tež hladajo na powšitkowne połoženje na swěće.

wozjewjene w: Łužica
wutora, 15 awgusta 2017 14:00

Policija (15.08.17)

Płujadło přizemić dyrbjało

Zdźar. Na kukuricnišću pola Zdźarja (Särchen) we Wulkodubrawskej gmejnje dyrbješe zawčerawšim popołdnju płujadło nuzowje přizemić. Wone bě do toho na bliskim Klukšanskim lětanišću startowało. Kaž sobudźěłaćer zwjazkoweho zarjada za lětadłowe njezboža pozdźišo zwěsći, bě 53lětny pilot po wšěm zdaću nadobo termiku zhubił a njemóžeše so tak hižo dlěje w powětře dźeržeć. Při nuzowym přizemjenju so wón snadnje zrani. Wuchowanske jězdźidło dowjeze jeho do chorownje.

wozjewjene w: Policija
wutora, 15 awgusta 2017 14:00

Wjele keramiki w bywšim młynje

Dwudnjowske wiki w Hózkowskej Gleinigec/Schmidtec hornčerni maja swojeje mnohostronskosće dla nadregionalnje dobre mjeno. Mjeztym zo někotři hornčerjo přewažnje domjacu nadobu poskićeja, nadeńdźeš pola druhich debjenki za dom a zahrodu. Tak su tež minjeny kónc tydźenja přewjedźene 13. wiki dobry wothłós žnjeli, k čemuž je tež wjedro přinošowało. Kobjeler, zahrodkar a wikowar ratarskich wudźěłkow su wiki wudospołnili. 2. a 3. decembra wotměja tam adwentne wiki. Potom­ móžeš sej tež bywši młyn wobhladać. Foto: Ulrike Herzger

wozjewjene w: Łužica
wutora, 15 awgusta 2017 14:00

Park ze studnjemi zaso w zwučenej pyše

Njeswačidło (JK/SN). Podobnje kaž w mnohich druhich gmejnach Budyskeho wokrjesa maja tež w Njeswačidle z jara wobmjezowanym budgetom hospodarić. Přiwšěm je z dobrym nazhonjenjom minjenych lět a z podpěru zamołwitych gmejnskich radźićelow móžno było, zjawne nadawki gmejny kaž tež ­tójšto na dobro wobydlerjow zwoprawdźić.

Hrodowy park a tamniše studnje běchu wulkeje wody lěta 2013 dla chětro poćerpjeli. Dźakowano spěchowanskim srědkam a twarskim firmam z bjezpo­srědnjeje wokoliny su park a studnje nětko­ zaso w tajkim stawje kaž do wulkeje wody. Studnje su ponowjene, figury wurjedźene a restawrowane. Tež technika za wodu a swěcu zaso funguje. Za to składowachu mnozy darniwi dobroćeljo šwarny fenk. Dobre 20 000 eurow su za ponowjenje­ studnjow nazběrali.

wozjewjene w: Łužica
wutora, 15 awgusta 2017 14:00

Start do koparskeje sezony z poražku

Fortuna Trjebin – SJ Chrósćicy 2:1 (2:0)

Zestawa hosći: Králíček – Dórnik, M. Zahrodnik, Sentivan, Teichmann, F. Za­hrodnik (82. Bogusz), Runt, Domaška, Žur (70. Šmit), Němec, Věchet

Na hrajnym planje prěnjeho koparskeho mustwa Chróšćanskeje SJ steješe za­wčerawšim, njedźelu, duel přećiwo Fortunje Trjebin. To bě zdobom prěnja dypkowa­ za wobaj cyłkaj w sezonje 2017/2018. Na relatiwnje małym trawniku mějachu sej Chróšćenjo jara ćežko. Domjacy ste­jachu poměrnje hłuboko w swójskej połojcy hrajnišća a čakachu na móžnosće konterow. A tajke so jim tež skićachu. Hosćom so kombinacije tak prawje njeradźachu, dokelž woni bul wosebje w srjedźnym polu přelochko zhubichu. Trjebinski škit bě w powětře jara dominantny. Pavel Runt dósta jeničku dobru składnosć za Chróšćanow w prěnim połčasu, kotraž móhła k wrotam wjesć. Po krótko wuwjedźenym róžku pak trjechi wón jenož aluminij. W 43. min. třěli Trjebin po indiwidualnym zmylku hosći 1:0. A kaž to hišće dosahało njeby, zwyši hosćićel mjeńšinje po tym na 2:0 – zaso po zmylku Chró­šćanow.

wozjewjene w: Sport
wutora, 15 awgusta 2017 14:00

Widźał, słyšał, napisał (15.08.17)

Awtor dźensa

Stefan Šmit

Skónčnje! Přichodny kónc tydźenja započnje so tež w prěnjej zwjazkowej koparskej lize nowa hrajna doba. Dokelž su so mje ludźo w minjenych tydźenjach přeco zaso prašeli, na kotrych telewizijnych sćelakach móža docyła hišće kopańcu hladać, bjez toho zo trjebaja přidatny aparat resp. dyrbja něšto za to płaćić, chcu dźensa składnosć wužić tule raz prawniske rjadowanja rozkłasć.

We wobłuku Róžeńčanskeho wjesneho swjedźenja je tamniša młodźina sobotu beachvolleyballowy turněr přewjedła. Dokelž bě so dohromady wosom mustwow přizjewiło, wulosowachu je najprjedy raz do dweju staflow. Lětsa běštej sej samo dwě z Kamjenca do Róžanta dojěłoj, a zbytk mustwow běchu zwjetša měšane cyłki.

W stafli A přesadźi so cyłk z mjenom „Volker Rachow“ – volleyballisća Vikto­rije Worklecy – snadnje před Bratrowstwom Róžant. 3. a 4. městno wobsadźichu Chróšćenjo a Róžeńčanske rowdyje. W tamnej stafli bě wšitko tróšku jasniše. Tež tam steješe cyłk ze spodźiwnym mjenom cyle horjeka – „Phi a hańba“. Mustwo „Fit for fun I“ z Kamjenca bu druhe, za nimi dalše Kamjenske a dalše Róžeńčanske zastupnistwo.

Byrnjež tróšku ćoplišo być móhło, knježeše přez cyłe popołdnjo wulkotna nalada, wšako starachu so Róžeńčenjo wo nju z napojemi, jědźu a spodobnej hudźbu.

wozjewjene w: Sport
wutora, 15 awgusta 2017 14:00

Za wólby so modlić

Drježdźany (B/SN). Štóž ma wolić, ma so bědźić – ně wšak! Miliony žonow a muži bychu so wjeselili, bychu-li scyła swobodnje wolić móhli. Bórze wotměja so wólby Němskeho zwjazkoweho sejma. Přičiny dosć za hłowny pastoralny wotrjad wo­zjewjenjow našeho biskopstwa, přeprosyć k „modlitwje do wólbow.“ W tajkej mjez druhim rěčnik Drježdźansko-Mišnjanskeho biskopstwa Michael Baudisch prosy: „Ty Božo wšěch časow ... Dźakujemy so Ći za měr a swobodu a za wšo, štož naše towaršnostne žiwjenje zmóžnja ... Prosymy Će, skrućuj našu wolu, zo w zjawnosći a politice swoju zamołwitosć jako křesćenjo spóznawamy.“

Bamž Franciskus je šansa

Dortmund (B/SN). Prezident Němskeho ewangelskeho cyrkwinskeho dnja 2019 w Dortmundźe Hans Leyendecker je křesćanske cyrkwje namołwjał dźělenje přewinyć. Lajske hibanja w katolskej kaž tež w ewangelskej cyrkwi su k tomu dawno zwólniwe, jenož klerus drje trjeba hišće chwile, rjekny žurnalist na wokrjesnym cyrkwinskim dnju w Dortmundźe. Runje nětko móhło jara wuspěšne być wo jednotu so prócować. Přetož „tajkeho bamža kaž Franciskusa tak spěšnje wjace nje­změjemy“.

wozjewjene w: Cyrkej a swět
wutora, 15 awgusta 2017 14:00

Krótkopowěsće (15.08.17)

W kruhu finalistow

Njebjelčicy. Gmejna Njebjelčicy wobdźěla so na cyłoněmskim wubědźowanju „Wjes ze žrom“ (Kerniges Dorf). 147 wsow a gmejnow je so wo myto prócowało. A w kruhu 22 finalistow su tež Njebjelčicy.­ Přichodny tydźeń chce so tam wubědźowanje wuhotowaca Agrarnosocialna towaršnosć wo konceptach a idejach za přichod wobhonić.

Jubilejny swjedźeń

Lědy. Ze sympozijom a swjedźenjom chce kónc tydźenja Muzej pod hołym njebjom na Lědach na 60lětne wobstaće zhladować. Za to přihotuja tež wosebitu wustajeńcu wo šěsć lětdźesatkach skutkowanja wot přeměstnjenja historiskich statokow hač k zarjadowanjam muzeja. Zajim zbudźić ma zdobom openair-galerija jako naddimensionalny album.

Zetkanje dudlowarjow

Praha. W čěskej stolicy je so minjeny tydźeń akcija „Dudlawa je žiwa!“ wotměła. Na njej zetkachu so dudlowarjo z wjacorych krajow Europy, mjez druhim tež z Němskeje. Zaměr bě, mjeztym rědki mechaniski hudźbny nastroj přez koncerty pod hołym njebjom a w Čěskim muzeju hudźby wuraznišo prezentować. Tež přihladowarjo móžachu so wuspytać.

wozjewjene w: Krótkopowěsće

Serbska debata

nowostki LND