Z wudaća: póndźela, 09 oktobera 2017

Na awtodróze do awta zajěł

Porchow. Z njeznateje přičiny je wčera popołdnju šofer mjez Porchowom a Ohor­nom na A 4 do před nim jěduceho awta zrazył. Kameradojo Hornjowujězdźanskeje a Porchowskeje wohnjoweje wobory městnosć njezboža zawěsćichu a jězdnu wurjedźichu.

Wojerecy (SN). Jedne z najwjetšich lětušich twarnišćow Wojerec maja tam nětko w starym měsće. Wot spočatka měsaca přetwarjeja naměsto při křižowanišću Hasa Rosy Luxemburg/Kolpingowa. Za dohromady 625 000 eurow dóstanje naměsto nowe wobličo. Susodne hasy budu zdźěla wutwarjene. Z noworjadowanjom křižowanišća ma 1 250 kwadratnych metrow wulke nowe naměsto nastać, kotrež ma móžnosće k posydnjenju runje tak skićić kaž wulkomyslne městna za štomy, kerki a kwětki. Hasu Grodkowske předměsto kaž tež Hasu Rosy Luxemburg w tymle wotrězku dospołnje wu­twarja a mjez druhim nowe roły za dešćikowu wodu do zemje połoža. Tam nastanu tohorunja šěroke chódniki. Naměsto kaž tež Grodkowske předměsto chcedźa z 19 nowymi nadróžnymi LED-lampami wuswětlić. Projekt zwoprawdźa w dwěmaj twarskimaj wotrězkomaj. Klětu w juniju ma po informacijach města Wojerec wšitko hotowe być.

SJ Chrósćicy – FSV Zwickau 0:5 (0:3)

Zestawa domjacych: Králíček – Pöpel, Hrdlitschka, Cyž, Bětnar, Teichmann, M. Zahrodnik, Henčel, F. Zahrodnik (55. Młynk), Žur (63. Domaška), Věchet (76. Bogusz)

Zestawa FSV Zwickau: Cichos – Bahn, Öztürk, Könnecke, Wachsmuth, Schröter (46. Barylla), Frick (60. Eisele), Lange, Antonitsch, Koch (46. Mauersberger), König

Awtor dźensa Toni Ryćer

Ničo njeje tak wobstajne kaž změna. W žiwjenju so tele přisłowo přeco zaso wobkruća. W lěće 2000 wotewrjene Łužiske koło njedaloko braniborskich Klěśišćow (Klettwitz) přestanje kónc oktobra jako motorsportowa wubědźowanska čara eksistować. Nowy mějićel, pruwowanska organizacija DEKRA, nima žane ambicije, tu w přichodźe aktiwity sportoweho razu přewjesć. Hladajo na krótku, ale intensiwnu dobu wobhospodarjenja motodroma mje wutroba boli. Přetož tam započach tež ja aktiwnje w motorsporće skutkować. Prěnje ideje za twar běchu hižo za čas NDR wulahnyli, jako zakótwi so wotpowědny naćisk 1986 w pjećlětnym planje. Po přewróće zapo­čachu jón zwoprawdźeć. Historisku čaru w Berlinje, znatu jako AVUS, dyrbjachu wěstotnych a wobchadnych přičin dla zawrěć a pytachu za wotpowědnej swobodnej ležownosću. A to bě płonina něhdyšeje brunicoweje jamy na juhu Braniborskeje.

17. běh po Biskopičanskej Butrowej horje lětsa posledni był

Sydomnaty běh po 385 metrow wysokej Butrowej horje pola Biskopic bě po tradiciji zaso posledni z cyłkownje 15 lětušeho Wopačanskeho cupa a kaž tež posledni z cyłkownje jenož jědnaće lětušeje Drježdźanskeje wobwodneje rjadneje lisćiny, kotryž bu hódnoćeny.

Na pjeć hórskich distancach 0,6 / 1,2 / 2,5 / 5 a 9,5 km, kotrychž start kaž tež cil běchu při hosćencu na wjeršku Butroweje hory, wubědźowaše so 430 wobdźělnikow.

Na 0,6 km je něhdźe 150 šulerjow zakładnych šulow něhdyšeho Biskopičanskeho wokrjesa po tradiciji wo pokal swojeho wyšeho měšćanosty wo­jowało. Na 2,5 km za młodostnych U14 a U16 docpě Oskar Krawc (Serbski gymnazij Budyšin) w skupinje U16 rjane 3. městno (9:15 min).

Na 5 km (60 w cilu, z tych 26 žónskich) běštaj cyłkownaj dobyćerjej Georg Bär (Drježdźany/19:56 min) a Kathrin Tanzmann (Wjelećin/26:56 min). Budyski młodostny Leo Čórlich wubědźi sej w skupinje U 18 bronzowe podestne městno w 26:59 min. Lubowarka walkinga Corinna Měrćinkowa z Chelna wobsadźi mjez sydom konkurentkami cyłkowne 2. městno w spěšnych 40:40 min. na tejle distancy.

Mainz (B/SN). 55lětna Mechthild Heil, zapósłanča zwjazkoweho sejma, je nowa zwjazkowa předsydka Katolskeho zhromadźenstwa žónskich w Němskej (kfd), z 500 000 čłonami najwjetšeho žonjaceho zwjazka Němskeje. Heil bu w Mainzu wot hłowneje zhromadźizny kfd na štyri lěta wuzwolena. Wuwučena architektka je wudata a ma tři dźěći.

Z biskopami so zetkał

Berlin (B/SN). Prěni raz staj so zwjazkowy prezident a rada Němskeje biskopskeje konferency na přeprošenje nawody stata w hrodźe Bellevue zetkałoj. Biskopja rěčachu z Frankom-Walterom Steinmeierom mjez druhim wo towaršnostnym zhromadźenstwje, wo róli nabožinow w sekularnym staće a wo ekumenje.

Socialne temy zanjechane