Z wudaća: wutora, 10 oktobera 2017

Sylna wichorowa nižina „Xavier“ je so minjeny tydźeń štwórtk tež w Hózku wot swojeje njelubozneje strony pokazała. Ludźo maja tam wotłamanych hałzow a zdón­kow starych, sylnych chójnow dla přeco hišće dźěło z rumowanjom. Sakske statne lěsniske zarjadnistwo w aktualnym wozjewjenju warnuje: „Přebywanje w lěsu móže dale strašne być.“ Foto: Michał Domjanja

W Ptačecach swjeća kóžde lěto na domchowance drastowe kemše. Prjedy hač je tam zašłu njedźelu we wjesnej cyrkwi swjećachu, zetkachu so wšitcy w šulskej a domizniskej stwičce k zwoblěkanju Wojerowskeje serbskeje drasty.

Ptačecy (HH/SN). Organizatorojo wokoło Martiny Petschik su sej za domchowanku pomoc skazali. Hotowarniči Sylwija Stephanowa a Heidemarie List z Čorneho Chołmca rady přijědźeštej, zo byštej k dostojnemu swjatkej přinošowałoj.

Při zdrasćenju so 18lětna Salome Petzer­ z Ptačec rady na to dopominaše, zo hižo jako małe dźěćo k drastunošerkam na domchowance słušeše. Salome ma tutu tradiciju za jara rjanu. Tež sydomlětna Luisa Putzing ze wsy bě sej lětsa třeći króć Wojerowsku serbsku narodnu drastu woblekła. „To je wulkotne, zo směm so z drastu, kotruž tule něhdy nošachu, jónu wob lěto pokazać“, wona měnješe.

Jednaćel Tobias Kockert w Koćinje dźakny žnjowy dźeń wuhotował

Koćina (aha/SN). Sobotu bě tomu wosmy raz pospochi, zo je Koćinjanski zawod Krabatowy mlokowy swět na inciatiwu agilneho jednaćela Tobiasa Kockerta dźeń do Kulowskeje kermuše dźakny žnjowy swjedźeń wuhotował. Zahajeny bu tón ze žohnjowanjom tónraz wot Kulowskeho fararja Wolfganga Křesaka. Jara wulka ličba awtowych značkow přeradźi, zo běchu hosćo tež ze zdalenišich kónčin Sakskeje a Braniborskeje.

Hamor (AK/SN). Wódna wuchowanska słužba při Bjerwałdskim jězoru trjeba trajnje zawěsćene personelne a financne zawěsćenje. Tole podšmórny Hamorski wjesnjanosta Achim Junker (CDU) wčera na posedźenju gmejnskeje rady. „Jako gmejna chcemy po našich móžnosćach k tomu přinošować. Tola tež wokrjes a kraj měli zamołwitosć přew­zać“, wón měnješe. Wuraznje dźakowaše so Junker čestnohamtskemu Hamorskemu towarstwu wódneje straže. W minjenej sezonje 2017 wukonješe straža na 46 dnjach při jězoru 1 490 dobrówólnych hodźin. „Dwójce móžachmy žiwjenje wuchować. Šěsć króć běchmy na městnje, hdyž nas surfowarojo a kite-surferojo wołachu. Štyri razy pomhachmy płachtakowarjam. Cyłkownje 17 króć wukonjachmy prěnju pomoc a dwójce­ wuchowachmy wěcy“, Joachim Weiß, referent za wódnu stražu DRK w Sakskej před radźićelemi wujasnjowaše.

Kolesowarjow kontrolowali

Budyšin. Zastojnicy Budyskeho policajskeho rewěra su minjeny kónc tydźenja w Budyšinje kolesowarjow kontrolowali. Přičina bě, zo so wobydlerjo na policiju wobroćichu. Wšako běchu po měnjenju Budyšanow mnozy z kolesom na chódnikach po puću a tež techniski staw kołow bě po jich měnjenju jara špatny. Tole so na kóncu při kontroli tež wobkrući. Cyłkownje 14 kolesowarjam zastojnicy porok wuprajichu.

Dźiwi płót wobškodźili

Hórnikecy. W Hórnikecach su njeznaći zawčerawšim na Ernsta-Thälmannowej wobhrodźenje dźiwiznoweho rewěra wobškodźili. Tuž móžachu z njeho ně­hdźe 40 skoćatow do wokolnych lěsow ćeknyć. 56lětnemu wobsedźerjej stadła so poradźi, někotre z dźiwich skoćatow zaso popadnyć. Wěcna škoda wučinja něhdźe 3 000 eurow.

Do garažow so zadobyli

Njedźichow. Kónc tydźenja zadobychu so njeznaći w Njedźichowje na Wojerowskej do garažoweho kompleksa. Što su sobu wzali, dotal znate njeje.