Z wudaća: štwórtk, 12 oktobera 2017

Spěchuja zawodne pěstowarnje

Drježdźany. Swobodny stat Sakska chce klětu zawodne pěstowarnje we wysokosći 400 000 eurow spěchować. Z toho zapłaćić hodźi so nowozarjadowanje pěstowarnje abo zawěsćenje hižo wobstejacych pěstowarskich městnow. Wo podpěru prosyć móža zajimcy hač do 30. nowembra w Sakskim komunalnym socialnym zwjazku w Kamjenicy.

Lěkar nuznje pytany

Bóšicy. Lěkarja za powšitkownu me­dicinu pytaja nuznje w Bóšičanskej gmejnje. Kaž zdźěli Serbski rozhłós dyrbješe dotalna medicinarka ze strowotnych přičin přestać. Wobydlerjam gmejny by hižo pomhane było, by-li nowy lěkar dwaj dnjej wob tydźeń w komunje praktikował. Gmejna by jemu samo rumnosće bjez podruže přewostajiła, rjekny k tomu Bóšičanski wjesnjanosta Stanij Ryćer.

Jasnje wjac wučomnikow

Serbske spěwne ćělesa repertoire z nowymi spěwami wudospołnjeja

Budyšin (SN/bn). Nazyma je počas, w kotrymž kulturne žiwjenje rozkćěwa. Dźiwadła – profesionalne kaž tež lajske – su nowu sezonu zahajili, skupiny, hač mjezynarodnje sławne abo regionalnje na spočatku karjery, podadźa so po wustupach pod hołym njebjom na klubowe turneje, muzeje wotewěraja nowe wustajeńcy. Skrótka: Lěćna přestawka je nimo.

Nic jenož we Łužicy njeje jeničce zjawny sektor za zarjadowanja zamołwity, bohaty poskitk je w prěnim rjedźe tež wuslědk prócowanjow angažowanych jednotliwcow a powšitkownowužitnych towarstwow. Hudźbnu nazymu wobohaća tuž powołanscy wuměłcy Serbskeho ludoweho ansambla, 1. Serbska kulturna brigada a hosćo z tu- a wukraja a wosebje tež lajkojo w towarstwach zapisanych łužiskich chórow.

Rjad čitanjow z biblije w Budyskej tachantskej cyrkwi je zakónčeny. We wobłuku ekumeniskeho nyšpora su serbscy a němscy wosadni w minjenych šěsć tydźenjach kóždu srjedu ze Swjateho pisma přednošowali.

Choćebuz (SN/JaW). Serbske kubłanske prašenja w Braniborskej stejachu mjez druhim w srjedźišću wčerawšeho zetkanja zastupjerjow Domowiny z Choćebuskim wyšim měšćanostu Holgerom Kelchom (CDU). Nimo zastupowaceho jednaćela Domowiny Markusa Końcarja wobdźěli so dwanaće dalšich zastupnikow serbskich institucijow, towarstwow a zwjazkow na dwuhodźinskej dźěłowej rozmołwje w Choćebuskim Serbskim domje, mjez druhim předsydka Serbskeho šulskeho towarstwa Ludmila Budarjowa, předsyda Rady za serbske naležnosće Braniborskeje Torsten Mak, zastupowaca direktorka Załožby za serbski lud Sabina Siegowa, komisariski direktor Serbskeho instituta dr. Hauke Bartels a župan župy Delnja Łužica Wylem Janhoefer.

40. wuměłsku wustajeńcu wotewru dźensa wječor w galeriji Čornopumpskeje milinarnje předewzaća Lužiska energija a milinarnje (LEAG). Pod hesłom „Weltsicht“ předstajeja twórby wuměłca a bywšeho wučerja za wuměłstwo na Wojerowskim Lessingowym gymnaziju Karla-Heinza Hochstädta.

Čorna Pumpa (JoS/SN). „Mam jubilejnu wustajeńcu za hódnoćenje swojeho tworjenja“, rjekny w Spalach bydlacy Karl-Heinz Hochstädt, „njech wobrazy k tomu słuža, wo rozšěrjenym łužiskim kulturnym rumje – našej domiznje rozmyslować a sej ju wažić.“ Njeńdźe jenož wo Łužicu, ale tež wo druhe krajiny a powšitkownje wo žiwjenje, kotrež ma so před zničenjom škitać. Tak tematizuje 2014 nastata acrylowa mólba „Taormina“ wohroženu krasnu sicilisku krajinu.

Berlin (dpa/SN). Něhdźe dwaj měsacaj po přizjewjenju insolwency lětanskeho předewzaća Air Berlin rozsudźa zamołwići po wšěm zdaću dźensa w Berlinje wo rozdźělenju airline. Jednaćelstwo je zašłe tři tydźenje z najwjetšej němskej towaršnosću Lufthansa, kaž tež jendźelskim předewzaćom Easyjet jednało. Air Berlin nětko zdźěli, zo ma něhdźe 80 procentow tuchwilu 8 000 sobudźěłaćerjow dobre­ šansy w druhim předewzaću dźěło nańć.

Za wurunane rozdźělenje

Drježdźany (dpa/SN). Ćěkancy w Sakskej maja přichodnje wěsty čas na jednym městnje swoje bydło we wokrjesu abo bjezwokrjesnym měsće měć. Tole je sakska ministerka za integraciju Petra Köpping (SPD) wčera připowědźiła. Z naprawu chcedźa tomu zadźěwać, zo ćěkancy po swójskej woli přećahnu. Zaměr je wurunane rozdźělenje ćěkancow. Tež měšćanske zarjadnišća, kaž šule abo pěstowarnje móža potom lěpje na wobstejnosće reagować.

Slubjenja dodźeržeć

Njeznaći su w nocy na srjedu pjenježny awtomat nalutowarnje w Bórkowach rozbuchnyli. Kaž policija zdźěli, je twarjenje filiale chětro wobškodźene. Swědk bě nocy w dwěmaj eksploziju słyšał a policiju zawołał. Mjeztym žada sej nalutowarnja Sprjewja-Nysa wjac policajskeje prezency, wšako njebě to prěni tajki pad we Łužicy. Wuslědki slědźenjow wosebiteje skupiny Soko Fläming, kotruž su za přepytowanje padow wutworili, měli skónčnje předpołožić. Foto: Michael Helbig

Madrid (dpa/SN). Španiski ministerski prezident Mariano Rajoy je wčera katalanske regionalne knježerstwo namołwjał, wustawowy porjad respektować. Napominanje je předschodźenk wužiwanja artikla 155 španiskeje wustawy, po kotrymž móže centralne knježerstwo katalanskemu knježerstwu móc wzać. Dale sej Rajoy žadaše, zo měł katalanski šef knježerstwa Carles Puigdemont rozkłasć, hač je w swojej njezrozumliwej narěči zawčerawšim njewotwisnosć wuwołał abo nic. Jeli so Puigdemont dale njezakonsce zadźerži, budźe senat informowany, w kotrymž ma wjetšinu hłosow konserwatiwna strona Rajoya. Kotre konkretne naprawy su při njedodźerženju artikla 155 móžne, njeje dokładnje zrjadowane. Teoretisce móže tež wójsko zapřimnyć, štož pak maja wobkedźbowarjo za njepředstajomne.

Dokelž měješe tankownja jenož jednu blešu požadaneho wina, je so 42lětna w Drježdźanach zazłobiła, sobudźěłaćerja nadběhowała a so potom wotsaliła. Po jednej hodźinje so wona z mužom zaso nawróći, wotwjertny honač tankowanskeho stołpa a so zaso zminy. 23 litrow diesela je na to wuběžało. Policija, je skućićelku spěšnje našła a pola njeje 2,5 promilow alkohola w kreji zwěsćiła. Za žonu změje podawk chutne konsekwency, wšako dyrbješe wohnjowa wobora diesel fachowje wotstronić.

W šwicarskich wopłóčkowych kanalach za slěbrom a złotom pytać so wudani. Po analyzy instituta dóńdźe dottam wob lěto 3 000 kilogramow slěbra a 43 kilogramow złota w hódnoće 1,3 milionow eurow. Při tym njejedna so jenož wo debjenki, ale tež wo zbytki industrijoweje produkcije.

Frankfurt n.W./Słubice (RD/SN). Kónc na podawki bohateho swjedźenskeho lěta, mjez druhim z mjezynarodnej konferencu k slědźenju wo Pólskej a mnohimi dalšimi zarjadowanjemi składnostnje swojeho jubileja, wo­swjeći Europska uniwersita Viadrina Frankfurt nad Wódru jutře, pjatk, 25. róčnicu prěnjeje imatrikulacije studentow. Uniwersita přeprošuje na zetkanje by­wšich absolwentow. Tajcy, kotřiž mjez druhim w Londonje, Brüsselu a Moskwje jako lobbyisća, wojowarjo za čłowjeske prawa a diplomaća dźěłaja, stajeja so při tym we wobłuku zjawneje podijoweje diskusije temje „Quo vadis Europa“.