Z wudaća: wutora, 09 januara 2018

wutora, 09 januara 2018 13:00

W Smječkecach po puću byli

Mjeztym hižo 23. raz su minjenu sobotu Smječkečanscy hwězdni spěwarjo we wsy po puću byli. Lětsa zběrachu woni pjenjezy za potrěbne dźěci w Indiskej. Kóždolětny start je pola Hejduškec swójby, kotraž hižo wot wšeho spočatka akciju we wsy nawjeduje. Mysl, něšto dobre činić, ale tež krasne słónčne wjedro spožčištej dźěćom motiwaciju a wutrajnosć, wot ranja hač do popołdnja z małej wobjedowej přestawku wudźeržeć. Wjesele spěwajo móžachu tak tež swójbam posměwk mjezwoči skuzłać, kotrež so jim z darom a małej chłóšćenku podźakowachu. Wulke mnóstwo słódkosćow rozdźělichu pozdźišo mjez wobdźělnikami, zbytk wužiwaja za dźěćace swjedźenje, kaž na přikład za póstnicy. Foto: Alena Pašcyna

wozjewjene w: Socialne
wutora, 09 januara 2018 13:00

Načolnik jara wužadany był

Tabulka volleyballoweje wobwodneje ligi wuchodneje Sakskeje

1. ST Kupoj-Nowa Łuka  7  21 : 7  20

2. TSV Kundraćicy  7  16 : 10  15

3. OSC Lubij  7  14 : 14  11

4. Viktoria Worklecy  7  14 : 13  11

5. CVJM Zhorjelc 6   13 : 13 9

6. Módro-běli Wojerecy  7  13 : 14  9

7. Mittelherwigsdorf  6   7 : 15  3

8. MSV Budyšin 04 II  7  7 : 19  3

Dalše hry Viktorije Worklecy

13.01. 14:00 ST Kupoj-Nowa Łuka

– Viktoria Worklecy

27.01. 14:00 Trakt. Mittelherwigsdorf

– Viktoria Worklecy

03.02. 14:00 Viktoria Worklecy –

Kundraćicy


Po njezbožownym zazběhu sezony z třomi wonkownymi poražkami su so Worklečanscy volleyballisća jasnje stop­njowali, domjacej partiji dobyli a poslednje městno w tabulce wob­wodneje ligi wopušćili. Dobyće wobwodneho pokala bě jim hišće přidatny pohon, tež sobotu w swójskej hali dale dypkować.

Viktoria Worklecy – Traktor Mittelherwigsdorf 3:0 (25:23, 25:15, 25:20)

wozjewjene w: Sport
wutora, 09 januara 2018 13:00

Wo pokal TCM za bulom honili

Kónčna tabulka

Puklot Chrósćicy 4 11 : 3   12

Pančicy  4 15 : 14    7

Pančicy-elita  4 11 : 11    5

Hórki 4 9 : 12   4

Klumpaki  4 11 : 16    0


Minjenu sobotu zetkachu so wólnočasni a aktiwni koparjo z wjacorych wsow w Chróšćanskej „Jednoće“, hdźež wotmě so tradicionalny halowy koparski turněr Towarstwa Cyrila a Metoda. TCM bě wězo tež lětsa zaso rjany pokal wobstarało, wo ko­tryž mustwa z połnej paru wojowachu. Pjeć cyłkow bě so přizjewiło, tak zo njehrajachu w skupinach, ale kóždy přećiwo kóždemu.

wozjewjene w: Sport
wutora, 09 januara 2018 13:00

Grandslam za Kamila Stocha

Pólski sněhakowarski skakar Kamil Stoch je swój lońši triumf na turneji po štyrjoch skakanišćach wospjetował. Jako druhemu w stawiznach znateho wubědźowanja poradźi so jemu grandslam. Kaž Sven Hannawald je Polak wšitke štyri dnjowe skakanja dobył.

Stoch bě z wotstawkom najkons­tant­niši a najlěpši atlet lětušeje turneje. Mjez druhim a třećim skakanjom wupadaše hišće za dwubojom mjez Polakom a Němcom Richardom Freitagom. Při prěnim přechodźe w Innsbrucku a při jara měnjatym wětřiku pak njemóžeše Freitag swój daloki skok wěsće stać a padny. Po prěnich lěkarskich přepytowanjach bě spěšnje jasne, zo Freitag turneju njezakónči.

Za tučasnje najlěpšeho němskeho sněha­kowarskeho skakarja bě to wulke přesłapjenje. Wězo bě diskusija wo při­činach jara wótra, na kóncu pak dyrbi so rjec, zo je kóždy skok wěste riziko. Ně­komu winu za to dać Freitagej zawěsće dale njepomha. Snano bě ćišć do turneje za njeho trochu přewulki. Nadźijomnje so spěšnje zaso wustrowi, zo by so na Olympiskich zymskich hrach w februaru wobdźělić móhł.

wozjewjene w: Sport
wutora, 09 januara 2018 13:00

Zrěčenje rozpušćiłoj

Po nimale třoch lětach přisłušnosće koparskemu towarstwu Budissa Budyšin je wrotar Marek Große Młynkec łuku wopušćił. Přezjednje stej wobě stronje zrěčenje kónc lěta 2017 rozpušćiłoj. Große bě pola regionalneho ligista minjene lěta stajnje jenož wrotar čisło dwaj a chce nětko změnu na sportowym polu. Foto: Torsten Zettl

wozjewjene w: Sport

Mjez hodami a Nowym lětom spytaja Budyscy basketballowcy stajnje turněr přewjesć. To je so jim tónraz w Radworju poradźiło, dokelž bě w Budyšinje ćežko swobodnu halu dóstać. Nimo toho dyrbi w sportowni wulka košowa připrawa k dispoziciji być. W ćěłozwučowarni Serbskeho šulskeho a zetkawanskeho centruma maja na přikład jenož małe koše připrawjene. W Radworju su wuměnjenja idealne. Tam maja wotpowědne koše za basketball, moderne předrasćernje, areal za přihladowarjow a porjadnu kantinu z kuchnju.

wozjewjene w: Sport

Serbska debata

nowostki LND