Z wudaća: pjatk, 09 februara 2018

Trjebin (AK/SN). Fairne wobchadźenje LEAG z wobydlerjemi Trjebinka, kotřiž njejsu wot přesydlenja potrjecheni, chce Trjebinska gmejna docpěć. Tole podšmórny wjesnjanosta Waldemar Locke (CDU) na zašłym posedźenju gmejnskeje rady. „Dźe wo samsne spěchowanje inwesticijow kaž w Trjebinje“, wón rozłoži. W oktobru 2013 je so Vattenfall na 20 lět zawjazał, 780 domjacnosćam w Slepom a Trjebinje ćopłotu k wosebje přijomnym kondicijam dodawać. Nětko wojujetaj Waldemar Locke a jeho Slepjanski kolega Reinhard Bork (njestronjan) wo to, zo so zrěčenje wo dodawanju ćopłoty předźěła. Při tym ma so mjez druhim docpěć, zo so z wobydlerjemi Trjebinka runje tak wobchadźa. Tež jich domjacnosće měli so k přijomnym wuměnjenjam z ćopłotu zastarać. „Je wažne, zo so socialny měr we wsy wobchowuje“, praji Locke. To samsne płaći za temu wopłóčki. Tu chce wón docpěć, zo Sakska přizamknjenje k wopłóčkowej syći sylnišo spěchuje hač dotal připowědźene. Tuchwilu pak hišće žane rozrisanje njepředleži. „Ručež budźe wone na blidźe, wobydlerjow wo tym informujemy“, wjesnjanosta připowědźi.

Budyšin. Mnoho naprašowanjow dla je so Serbski ludowy ansambl rozsudźił, poskićić přidatne předstajenje swojeho wuspěšneho wječorneho ptačokwasneho programa „Po serbskich slědach“, a to njedźelu, 11. februara, w 19.30 hodź. na žurli SLA. Zastupne lisćiki dóstanu zajimcy při wječornej kasy. Předstajenja jutře w 16 a 19.30 hodź. kaž tež njedźelu w 16 hodź. su wupředate.

Kružk pisacych w hospodźe

Chrósćicy. Wosom čłonow wopřijmje Róžeńčanski kružk pisacych, kotřiž pod nawodom spisowaćela Bena Budarja ­prawidłownje swójske twórby pisaja. Lětsa kružk hižo swoje 55. narodniny swjeći a přeco hišće so z pjerow kreatiwne ideje wužórla. Hač do lěća ma samo nowa zběrka wuńć: „Zornjatka na puću“. ­Něštožkuli z tejele knihi budźe hižo ­słyšeć jutře, sobotu, w 19.45 hodź w Chróšćanskej putniskej hospodźe. Hobbyjowi poeća čitaja basnje a powědančka wo běhu lěta, zdźěla podpěrani wot ­młodeje generacije. Wo hudźbny přewod postara so čłonka kružka Marija Šołćina na gitarje.

Poskitk za prózdniny

Wopačni policisća zazwonili

Kinspork. Jako policisća wudachu so njeznaći, kotřiž zawčerawšim pola muža w Kinsporku zazwonichu. Pječa běchu někoho zajeli, kiž měješe adresu muža při sebi. Nětko wobhonichu so „zastojnicy“ za tym, kelko pjenjez ma Kinsporčan na konće a hač ma debjenki doma. Muž pak bě skedźbliwy dosć, wobchowa požadane informacije za sebje a zazwoni woprawdźitu policiju, kotraž tónle pad dale přepytuje.

Wojerowski zwěrjenc ma dohromady 1 048 zwěrjatow w 108 družinach. Tole je wunjesło lětuša inwentura. Mjeztym zo je ličenje pola wulkich zwěrjatow kaž dweju mjedwjedźow Björna a Bengta jednore, činja to pola wjace hač 300 rybičkow z pomocu fotow. Najstarši wobydler zwěrjenca je z 58 lětami galapagosowa nopawa ­Jolante. Štyri flamingi maja hižo wot lěta 1981 swój domicil we Wojerecach, wone z tym najdlěje w zwěrjencu bydla. Zwěrjata njejsu jenož ličili, ale tež wažili a měrili, mjez druhim fidźiskeho leguana na wobrazu. Foto: Stefanie Jürß

Narok na status ćěkanca

Budyšin. Ćěkancy ze Syriskeje, kotřiž su ze swojim ćěknjenjom wojersku słužbu abo rezerwowu wojersku słužbu zapowědźeli, maja prawo na spožčenje statusa­ ćěkanca. To je 5. senat Sakskeho wyšeho zarjadniskeho sudnistwa wčera w Budyšinje we wjacorych padach rozsudźiło. Skóržbnikam bě Zwjazkowy zarjad za migraciju a ćěkancow drje subsidiarny škit připóznał. Wyši škit jako ćěkanc pak bě pobrachowacych wuměnjenjow za to dla wotpokazał.

Křižerjo po nowym mosće

Pančicy-Kukow. Klóšterski a Chróšćanski křižerski procesion móžetej lětsa jutry nowy móst nad Klóšterskej wodu w Pančicach-Kukowje wužiwać. Tole je zastupjer krajneho zarjada za dróhotwar a wobchad wobkrućił, kaž wjesnjanosta Markus Kreuz (CDU) na wčerawšim posedźenju gmejnskeje rady zdźěli. Móst pak budźe jeničce za křižerjow wužiwajomny, za pěškow nic.

Ze słóncom do prózdnin

XXIII. olympiske zymske hry su so dźensa připołdnju našeho časa w južnokorejskim Pyeongchangu swjatočnje zahajili. Na ceremoniji w olympiskim stadionje (hlej foto), je Eric Frenzel z chorhoju němske mustwo nawjedował. Naš kraj zastupuje 153 sportowčow a sportowcow na wurisanjach přichodnych 16 dnjow. Foto: Peter Kneffel/dpa

Axel Arlt

Dobyćerjam wubědźowanja „Rěči přichilena komuna – Serbska rěč je žiwa“ wulke připóznaće. Z Wojerecami, Kulowom, Hodźijom, Łazom a Ralbicami-Róžantom buchu komuny počesćene, kotrež su so na dotal třoch wurisanjach stajnje wobdźělili. Runje tak prawidłownje běchu Kamjenc, Slepo, Wulka Dubrawa a Worklecy pódla. Tež to zasłuži sej respekt. Wšako maja tule formu dwurěčnosć w swójskej komunje přepruwować za prawidłowny a samozrozumliwy srědk.

Zo z nowym wjesnjanostu nowy dych zaćehnje, to su tónkróć Chrósćicy a Rakecy dopokazali. Z prěnim wobdźělenjom stej so wobě komunje hnydom do dobyćerskeho kruha dóstałoj. Wuběrnje! Trójku nowačkow su Bóšicy wudospołnili. Tak je so na třoch dotal wotmětych wurisanjach 22 komunow znajmjeńša jonu wobdźěliło. To je dobra połojca wonych 42 po Serbskim zakonju pomjenowanych w serbskim sydlenskim rumje Budyskeho a Zhorjelskeho wokrjesa.

Laura Schmidt: Hósć liči z darmotnymi ćišćanymi wudźěłkami

Wojerecy (SN/mwe). „Minjene lěta mějachmy literaturu Ludoweho nakładnistwa Domowina we wulkim wob­jimje w sortimenće. Na zakładźe lokalneje změny Wojerowskeje turistiskeje informacije a lěta trajaceho snadneho naprašowanja smy literaturu ze sortimenta wzali“, zdźěli Laura Schmidt, wjednica turistiskeje informacije Łužiska jězorina na naprašowanje SN. Tole nam we wotrjedźe za rozšěrjenje w serbskim nakładnistwje w Budyšinje wobkrućichu a dodachu, zo běchu ze stron Wojerowskeje turistiskeje informacije před lětom zrěčenje jednostronsce wupowědźili, dźakujo so wuraznje za wjelelětne spomóžne zhromadne dźěło z LND. „Rady při wotpowědnym naprašowanju a při sezonalnje wotwisnych a so hodźacych produktach literaturu nakładnistwa zaso do sortimenta wozmjemy. Nazhonjenja minjenych lět pak pokazuja, zo přeje sej hósć darmotne ćišćane wudźěłki. Wón pyta městnosće, hdźež móže serbske žiwjenje a jeho wosebitosće dźensa hišće dožiwić.

Podstupim/Budyšin/Drježdźany (SN/at). Skromne wuprajenje nastupajo narodne mjeńšiny w naćisku koaliciskeho zrěčenja „Wuznawamy so k tomu škitać a spěchować štyri narodne mjeńšiny w Němskej – Danow, Serbow, Frizow kaž tež Sintow a Romow.“ kritizuje rěčnica zwjazkoweho dźěłoweho zjednoćenstwa „Etniske mjeńšiny“ při stronje Lěwicy Renate Harcke. Trěbnu změnu za awtochtone mjeńšiny wona tam njespóznaje.

Tydźenja na medijowym forumje Federalistiskeje unije europskich narodnosćow w Berlinje je to hinak klinčało, jako „sakski społnomócnjeny při Zwjazku připowědźi, zo móhło w koaliciskim zrěčenju CDU, SPD a CSU klawsla wo dynamizowanju za Załožbu za serbski lud stać; wo skrućenju institucionalneho spěchowanja ani njerěčo“, zwěsći Harcke.

Budyšin (SN/MiR). Towarstwo přećelow Smolerjec kniharnje ma nowe před­sydstwo. Na swojej wčerawšej čłonskej a wólbnej zhromadźiznje wuzwoli 17 přitomnych z cyłkownje 57 čłonow towarstwa dr. Franca Šěna za swojeho noweho předsydu. Hač do swojeje smjerće loni w septembru bě Kito Lorenc před­syda towarstwa. Z nim mnohe lěta tam jara wusko hromadźe dźěłała bě dr. Ruth Thiemannowa. Po smjerći jeje bratra dr. Franka Stübnera w aprylu minjeneho lěta dowěri wona Francej Šěnej towarstwo jako komisariski naslědnik Lorenca nawjedować.