Z wudaća: štwórtk, 08 měrca 2018

štwórtk, 08 měrca 2018 13:00

Dopominaja na dóńt jatych

Narć (UH/SN). Něhdźe dwaceći zajimcow ­wobdźěli so zawčerawšim na wodźenju po bywšim lěhwje „Elsterhorst“ pola ­Narća w gmejnje Halštrowska Hola. Wědomostna nawodnica Wojerowskeho měšćanskeho muzeja Elke Roschmann jim tam rozłoži, čemu je lěhwo w času wot lěta 1937 do 1948 słužiło. Z něhdy štyrceći barakow je hač do dźensnišeho jenož jenička zachowana, kotruž běchu tehdy jako lacaret wužiwali. Dokelž su ju we wšěch lětach lědma ponowili, baraka dźensa jara awtentiska skutkuje, tak tež jednotliwe eksponaty w njej. Elke Rosch­mann dóstawa nimale wšědnje telefo­naty wočiswědkow abo jich přiwu­znych. Z jich rozprawami a dokumen­tami lěta 2007 zdźěłanu wustajeńcu wudospoł­njeja.

wozjewjene w: Łužica
štwórtk, 08 měrca 2018 13:00

Do kina (08.03.18)

8.03.2018 – 14.03.2018 Budyski fil­mowy palast: Tomb Raider w 3 D: srj 20:15 Die Biene Maja 2 – Die Honigspiele: wšě­dnje 14:00 (nimo pó a srj) a 16:45 (nimo pó a srj) | nj 12:00 Heilstätten: wšědnje 16:00 (nimo štw) a 20:15 (nimo štw) | pj a so 22:15 Red Sparrow: wšědnje 19:30 | pj a so 22:00 Wendy 2 – Freundschaft für immer: wšědnje 14:45 (nimo pó a srj) a 17:00 | nj 12:30 Die kleine Hexe: wšědnje 17:00 (nimo pó) | nj 12:30 | pj, so, nj a wu 14:45 Hilfe, ich hab meine Eltern geschrumpft: wšědnje 14:30 (nimo pó a srj) Black Panther: wšědnje 19:30 (nimo pó a srj) | pó a srj 16:45 Black Panther w 3 D: pj a so 22:15 Fifty Shades of Grey – Befreite Lust: wšědnje 19:30 | pj a so 22:30 Dieses bescheuerte Herz: pj, nj a wu 18:00 Ferdinand – Geht STIERisch ab!: nj 12:15 Wunder: so, pó a srj 18:00

Kino-ekstra: Eine bretonische Liebe: pó 17:15 a 20:15

wozjewjene w: Do kina
štwórtk, 08 měrca 2018 13:00

Šula w zelenym ponowjena

Šula w zelenym w Bórku pola Budyšina přeprosy zajutřišim, sobotu, wot 11 do 16 hodź. na dźeń wotewrjenych duri. Přičina je zakónčenje saněrowanja, kotrež traješe wot nazymy 2016 hač do spočatka tohole lěta. Twarić móžachu jeničce w zymskim času, hdyž maja mjenje wopytowarjow. Mjeztym su wšitke stwy kaž tež klubownja (na wobrazu) nowowuhotowane a meblěrowane, tepjenje je ponowjene a nowa kuchnja zatwarjena. Dohromady su tu 105 000 eurow inwestowali, z čehož je Swobodny stat Sakska 74 000 eurow přidał. Nawodnica Doris Vogel a sobudźěłaćerka dźěćaceho pućowanskeho běrowa Maria Engert (wotprawa) skedźbnjatej na to, zo njeje­ šula w zelenym jeno za šulerjow myslena, ale tež za skupiny dorosćenych. Tak maja k jutram hišće swobodne městna. Foto: Carmen Schumann

wozjewjene w: Łužica
štwórtk, 08 měrca 2018 13:00

Doprědkarske dopomnjenki

Antologija „Mlóče“ bě tema prěnjeho zetkanja tracTare, z kotrymž chce Zwjazk serbskich wuměłcow rjad wuměł­skich rozmołwow wožiwić. 15 zajimcow je nětko čile diskutowało.

Budyšin (SN/bn). Z nowym rjadom tracTare chce Zwjazk serbskich wuměłcow na staru tradiciju rozmołwnych kołow nawjazać. Na zetkanjach „chcemy wo nowych, markantnych, spomnjećahódnych a wusahowacych twórbach serbskeho wuměłstwa rěčeć“, zjima předsyda ZSW Jan Bělk k zazběhej prěnjeho tajkeho zarja­dowanja, na kotrymž steješe anto­logija „Mlóče“ w srjedźišću.

Wjetšina 15 přitomnych tydźenja w Budyskim Serbskim domje běchu awtor­ki loni w Ludowym nakładnistwje Domowina wušłeje knihi. Wudawaćelka Ingrid Juršikowa do diskusije rozłoži, kak je antologija nastała. Na to podaštaj redak­torka Serbskeho rozhłosa Monika Gerdesowa a prof. dr. Dietrich Šołta swoje mysle ke krótkopowědančkam.

wozjewjene w: Kultura
štwórtk, 08 měrca 2018 13:00

Łužiske archiwy spokojom

Wulki zajim na dźěle a skutkowanju institucijow na 9. dnju archiwow

Budyšin (JK/SN/bn). Archiwy po cyłej Němskej su zajimcam swoje durje minjeny kónc tydźenja wotewrěli, a to mjeztym 9. raz. Z dwulětnje zarjadowanej akciju­ chce Zwjazk archiwarkow a archiwarow wopytowarjam dohlad do dźěła swojich institucijow zmóžnić a na jich mnohostronske towaršnostne funkcije skedźbnić. Tež łužiske archiwy so na wosebitym dnju wobdźělichu.

wozjewjene w: Kultura
štwórtk, 08 měrca 2018 13:00

Nowy Łužiski almanach wušoł

Kamjenc (BG/SN). Wušoł je minjene dny jědnaty zwjazk Łužiskeho almanacha, kotryž wobjednawa temy ze stawiznow łužiskeho regiona. W dotalnych wudaćach je 250 awtorow swoje teksty wo­zje­wiło. K tomu přińdźechu tři wosebite zešiwki. Aktualne wudaće poskićeja wšitke kniharnje Budyskeho wokrjesa.

Čitarjo zhonja fakty wo Łužičanach, kotřiž su tójšto zeskutkownili. Prof. dr. Arnošta Muku, rodźeneho 1854 we Wulkim Wosyku (Großhänchen) a zemrěteho 1932 w Budyšinje, znaja mnozy jako serbskeho spisowaćela. Wón pak běše zdobom ludowědnik a organizator serbskeho narodneho žiwjenja. Tež za literarne medije je so zasadźał. Jedyn z jeho najwjetšich žiwjenskich skutkow bě załoženje Serbskeho muzeja. Hač do wotchada na wuměnk wuwučowaše jako gymnazialny wučer w Budyšinje a Freibergu. Mjezynarodnje Muku wuznamjenja, zo běše čłon wědomostnych akademijow w Běłohrodźe, Krakowje, Praze, Pětrohrodźe a Zagrebje. Přinošk wo Arnošće Muce spisał je Mathias Hüsni.

wozjewjene w: Kultura
štwórtk, 08 měrca 2018 13:00

Šěsćdypkowu hru dobyli

ST 1922 Radwor

– ST Zeleno-běli Bukecy 4:1 (2:1)

Zestawa domjacych: Wróbl – Wjeńka, Karwinski von Karwin, Bauer, Zähr, Winar, Zimmermann, Rachel, Bejmak, Kurjat (90. Hančik), Schulze (87. Kubitz)

Wuměnjenja za prěnju koparsku dyp­ko­wu hru w lěće 2018 běchu tež w Ra­dworju poměrnje ćežke. Na twjerdym pódlanskim hrajnišću njemóžachu tam přihladowarjo tuž wyšoklasny bój wočakować.

wozjewjene w: Sport
štwórtk, 08 měrca 2018 13:00

Do 36. sokołskeho volleyballoweho turněra

Za 36. sokołski volleyballowy turněr wo po­kal Domowiny, kotryž budźe za­jutři­šim, 10. měrca, w Budyšinje, su jednotliwe stafle wulosowane. Na dotalnych 35 turněrach wot lěta 1983 wubědźowaše so 101 šestka. W lětomaj 2004 a 2005 je při wysokim saku samo 27 wo požadany pokal wojowało. Choćebuske mustwa su cyłkownje sydom króć pokal dobyli: dwójce gymnaziasća (1997 a 1998), štyri razy Soko­ł-młodźina (1999, 2000, 2002 a 2003) a jónu Sokoł-studenća (2005). Dal­ši dobyćerjo běchu: šěsć króć Přećeljo z pólskeje Tokarnje (2009, 2011, 2012, 2014, 2015 a 2016), trójce Słowjan Budyšin (1985, 1987, 1996) a Přećeljo Smječ­kecy (2008, 2010 a 2013), dwójce Serbski wučerski wustaw Budyšin (1984, 1988), Serbska rozšěrjena wyša šula Budyšin (1989, 1991), NSLDź Budyšin (1990, 2001) kaž tež Serbski dom Budyšin (2004, 2006) a jónu Šula Ćišinskeho Pančicy-Kukow (1983), Šula Ralbicy (1986), Wjesne mustwo Worklecy (1992), Serbscy gymna­ziasća Budyšin (1994), Serbscy studenća (1993), Eksdwanatki Serbskeho gymna­zija Budyšin (1995), Handicap Marijina hwězda Pančicy (2007) a Sokoł Budyšin (2017). Turněry wotměchu so 18 króć w Budyšinje, dźewjeć razow w Radworju, dwójce w Ralbicach (1984, 1987), jónu w Pančicach (1983), Slepom (1986) a Kulowje (1998), přiběraceje ličby wubědźowacych mustwow dla dwójce we Wor­klecach a Ralbicach (1993, 1994), jónu we Worklecach, Pančicach a Chrósćicach (1996). Jurij Nuk

wozjewjene w: Sport
štwórtk, 08 měrca 2018 13:00

Prěnja domjaca poražka noweho lěta

SJ Njebjelčicy – ST Ćisk II 0:2 (0:1)

Zestawa domjacych: Hahn – Hoelzel, Hrjehor, Pawlik, Hanuza, Haška, Kral, Lejnart, Šołta, Čornak (12. Domš, 62. Hommel), Ričel

Za poražku 1:4 w prěnjej partiji hrajneho lěta chcychu so koparjo Njebjel­čan­skeje SJ nětko doma rewanšować. Tola­ znowa měješe cyłk trenarja Handrija Krawčika swoje problemy. W srjedźnym polu njenańdźe so nichtó, kiž by režiju přewzał, a w nadběhu klacaše na zymnokrejnosći. Tak pósła Robert Lejnart Floriana Ričla z niskej přihrawku do směra na wrota, Ričel pak suny kulowatu kožu nimo klětki (11.). Potom bu Sandro Šołta foulowany, ale wólny kop sadźi Lejnart přez klětku hosći (28.). Na tamnej stronje njedósta škit bul w šěsnatce pod kontrolu a hižo ležeše po niskej třělwje hóstneho nadběhowarja w saku (31.). Wurunać móhł w 34. min. Jurij Haška po wólnym kopje Ronyja Hanuzy. Wrotar hosći pak rezolutnje zapřimny. Do přestawki zjewi so Hanuza dwójce před wrotami pře­ćiwnika. Najprjedy bě znowa wrotar na městnje, a druhi raz zleća bul po přihrawce Haški nimo žerdźe.

wozjewjene w: Sport

Serbska debata

nowostki LND