Z wudaća: wutora, 15 meje 2018

wutora, 15 meje 2018 14:00

Krótkopowěsće (15.05.18)

Nowy mjezu přesahowacy zwisk

Gubin. Měsće Gubin na juhu Braniborskeje a w Pólskej změjetej bórze prěnju mjezy přesahowacu busowu čaru. Zakład tworja wobstejace busowe zwiski, kotrež přez mjezu podlěšeja, připowědźichu wčera zamołwići namjezneju městow. Wot 11. junija měli tam busy prawidłownje přez mjezu jězdźić.

Dulig do Čěskeje

Drježdźany/Praha. Sakski hospodarski minister Martin Dulig (SPD) poda so jutře na dwudnjowsku wizitu do čěskeje stolicy. Susodny kraj je po Chinje druhi najwažniši wikowanski partner Sakskeje. Z dowožowanjemi w hódnoće 4,7 miliardow eurow steji Čěska jasnje na prěnim městnje importowych partnerow. Eksport sakskich tworow do susodneho kraja­ je wot lěta 1993 wo 16 króć na dwě miliardźe eurow rozrostł.

Duka dale arcybiskop

wozjewjene w: Krótkopowěsće
Wčera je Budyska Smolerjec kniharnja tydźeń serbskeho antikwariata zahajiła. Hač do pjatka přiwozmu tam stare knihi, časopisy,­ noty a tačele – dołhož njejedna so wo eksemplary, kotrež ma wobchod na składźe. Mjez drohoćinkami su na přikład po lětnikach wjazane zběrki Katolskeho Posoła a Serbskich Nowin kaž tež Protyki z 19. lětstotka. Wot 2008 kniharnja tydźeń dwu­lětnje wuhotuje. Jutře budźe nimo toho tež w Choćebuzu móžno antikwity wotedać. Foto: SN/Maćij Bulank

wozjewjene w: Kultura
wutora, 15 meje 2018 14:00

Sport za politiku njeznjewužiwać

21. koparske swětowe mišterstwa wotměja so wot 14. junija hač do 15. julija w Ruskej. Smy so mjez ludźimi prašeli, hač sej najebać móžny politiski bojkot turněra, wosebje ze stron zapadnych krajow, hry w telewiziji přiwšěm wobhladaja.

Cyril Pjech z Berlina: Dźiwam so stajnje znowa nad politiskej hłuposću zapadnych politikarjow. Kóžda akcija přećiwo Ruskej sylni nahladnosć Wladimira Putina w jeho ludźe na jednej stronje a strach wójny na tamnej. Abo su woni tajcy hazarderojo, zo samo z wójnu liča? Wšitke hry mišterstwow sej njewobhladam, wažne pak chcu sćěhować.

Halena Jancyna z Ralbic: Kopańca nje­je­ runje moja najwoblubowaniša spor­towa družina, ale při tajkich po­dawkach sej tež ja tu abo tamnu partiju wobhladam. Kotre to budu, wotwisuje wot časa. Přez beamer pola susodow dam sej tajku zawěsće lubić. Budźe-li móžno, činju to pola wohnjoweje wobory. Wobžaruju, zo stej politika a sport tak wusko zwjazanej. Politiske podawki a reakcije tajki sportowy wjeršk zaćěmnjeja.

wozjewjene w: Měnjenja
wutora, 15 meje 2018 14:00

Nowe časy prěnja kročel

SKI dwójce dlěje wotewrjena a internetna strona załožby přewidniša

Budyšin (SN/bn). Serbska kulturna informacija je wot spočatka měsaca wutoru a štwórtk dlěje wotewrjena. Tej dnjej SKI wotnětka hakle we 18 hodź. durje zamka. „Smy ze wšelakich stron naprašowanja dóstali, na přikład wot wjesnjanow, kotřiž bychu sej rady tuchwilnu wosebitu wustajeńcu tu wobhladali, swo­jeho dźěłoweho časa dla pak k tomu dotal składnosć njemějachu. Po internych wuradźowanjach smy so rozsudźili, na tak mje­nowanych dołhich dnjach wote­wrjenske časy podlěšić a je wjetšinje zarja­­dow přiměrić. Nětko wočaknjemy, kak so rozšěrjenje přiwozmje a kajki budźe wothłós. Mamy nowe wotewrjenske časy za prěnju kročel a chcemy w awgusće wo tym porěčeć, hač při tym wostanjemy a hač by zmysłapołne było, SKI ewentualnje tež tamne dny hač do wječora wotewrjenu měć. Jeničce kónc tydźenja njeje nam tarifowych postajenjow dla dale móžno rumnosć spřistupnić“, rozłožuje za zetkanišćo nic jeno za turistow zamołwita Michaela Mošowa ze Załožby za serbski lud.

wozjewjene w: Kultura
wutora, 15 meje 2018 14:00

„Smjertnica“ w Smochćicach

Smochčanski hudźbny swjedźeń pod ho­łym njebjom wotměje so lětsa 14. raz. Mjez twórbami z nimale wšit­kich­ wuměłskich dobow a žanrow zaklin­ča tež kompozicije Jurja Pilka.

Budyšin/Smochćicy (SN/bn). Hudźbny swjedźeń pod hołym njebjom na dworje Smochčanskeho Doma biskopa Bena wěnu­je so lětsa pod hesłom „Měsačne nocy“ twórbam, kotrež so na najwšela­koriše wašnje z jeničkim trabantom zemje zaběraja resp. kotrež su wot njeho wobwliwowane.

wozjewjene w: Kultura
wutora, 15 meje 2018 14:00

Premjera za Gretu Schulzojc

Na 1. wěžowy swjedźeń při „Ćežkej horje“ přeprosy Towarstwo za hórnistwowy turizm­ Wjelcej minjenu sobotu na měšćansku kromu Běłeje Wody. Nimo wšelakich kulturnych poskićenjow je tež Serbski folklorny ansambl Slepo mały program předstajił.­ Swój premjerny wustup měješe při tym hakle dwanaćelětna Greta Schulzojc­ (druha wotlěwa) z Baršća na dudach. Dale hudźachu Melanie Kotisekec na wul­kich huslach, Frank Hermaš na trompeće, Wolfgang Kotisek na dudach a Emi­ Panašec na małych huslach (wotprawa). Foto nasta na platformje wuhlad­neje wěže, zwotkelž maš wuhlad na hižo rekultiwowane přestrjenje Wochožan­skeje brunicoweje jamy hač k Hamorskej milinarni. Foto: Joachim Rjela

wozjewjene w: Towarstwa
wutora, 15 meje 2018 14:00

Nowy domicil za biblioteku

Budyšin/Kamjenc (SN/at). Kamjenska mě­šćanska biblioteka dóstanje nowy do­mi­cil. Wona ma so integrować do wudospołnjaceho twara na přichodnym gymnazialnym třičarowym šulskim stejnišću na Henselowej. Tam změje Lessingowy gymnazij 2020/2021 swoje nutřkoměšćanske stare nowe stejnišćo. Budyski wo­krjesny sejmik je wotpowědnu próstwu města Kamjenca wčera na swojim wurjadnym posedźenju přiwzał a wobzamknył, zo ma so za to trěbny 4. poschod twarić. Kamjenske měšćanske zarjadnistwo a krajnoradny zarjad wotzamknjetej nětko financowanske dojednanje, w kotrymž ma Lessingowe město wokrjes wot wšěch kóštow wuswobodźić, nastawacych w zwisku z planowanjom, twarom a wužiwanjom rumnosćow jako biblioteki. Město Kamjenc je za wudospołnjacy twar 80procentowske spěchowanje přez wobłuk „bój přećiwo chudobje“ Europskeho fondsa za regionalne wuwiće wobstarało.

Měšćanska biblioteka přewozmje na nowym stejnišću zdobom nadawk šulskeje knihownje, kaž Kamjenski nowinski rěčnik Thomas Käppler zdźěli.

wozjewjene w: Łužica
wutora, 15 meje 2018 14:00

Nowy móst na kupu Krim

Moskwa (dpa/SN). Ruski prezident Wladimir Putin je dźensa móst mjez přiswojenej něhdyšej ukrainskej połkupu Krim a ruskim teritorijom wotewrěł. Twar je z 19 kilometrami najdlěši Ruskeje. Poprawom chcychu móst hakle kónc lěta do­twarjeny měć, wot jutřišeho pak móža jón awta hižo wužiwać. Železniski wobchad budźe wot klětušeho móžny.

Nahrawanja wužiwajomne

Karlsruhe/Magdeburg (dpa/SN). Nahrawanja minikamerow w awtach hodźa so při wuhódnoćenju wobchadnych njezbožow jako dopokaz wužiwać. To je Zwjazkowe sudnistwo w Karlsruhe dźensa rozsudźiło. To pak njerěka, zo smě so permanentnje awtomatisce filmować. Wšako to prawa njewobdźělenych rani. Přiwšěm su nahrawanja w ciwilnych procesach wužiwajomne. Skoržił bě šofer awta z Magdeburga, kiž chcyše z pomocu filma swoju njewinowatosć dopokazać. Ani hamtske ani krajne sudnistwo pak nochcyštej nahrawanja widźeć.

Sejm debatuje wo etaće

wozjewjene w: Kraj a swět
Po hodźiny trajacym woblěhowanju přez policiju w Kinsporku su pozdatneho mordarja 75lětneje žony mortweho našli. 33lětny Němc bě so w něhdyšim wojerskim objekće schował a wospjet na zastojnikow třělał, jednoho z nich trjechi do ruki. Tež poli­cajski pos bu přez kulku bywšeho wojaka Zwjazkoweje wobory zranjeny (hlej wobraz). Policija, kotraž bě ze 270 zastojnikami prezentna, z toho wuchadźa, zo je so 33lětny sam morił. Foto: Jonny Linke

wozjewjene w: Kraj a swět
wutora, 15 meje 2018 14:00

To a tamne (15.05.18)

Stadło howjadow wosrjedź města je so w srjedźosakskim Rochlitzu wo zasadźenje policije postarało. Po tym zo běchu wobydlerjo něhdźe 20 kruwow w by­dlenskej štwórći wuhladali, wołachu policiju. Wobsadce policajskeju awtow stej je njedaloko dwórnišća zadźer­žałoj. Z pomocu zamołwiteho za kruwy móžachu je skónčnje zaso na pastwu ­honić.

Ručnu granatu w hosćencu wotedał je dźěd zhromadnje ze swojimaj wnučkomaj w čornolěsnym Feldbergu. Dźěsći běštej granatu z Druheje swětoweje wójny w bliskim lěsu namakałoj. Po tym zo bě muž tak mjenowanu jejowu ručnu granatu wotbył a wotešoł, zawoła hosćencar nablaku policiju. Fachowcy ­ju wotewzachu a znješkódnichu. Policija na to skedźbnja, zo njesměł so nichtó sta­reje municije přimać. W mjenowanym padźe wšak je wšitko derje wotběžało.

wozjewjene w: To a tamne

Serbska debata

nowostki LND