Z wudaća: wutora, 12 junija 2018

wutora, 12 junija 2018 14:00

Krótkopowěsće (12.06.18)

Serbski napis bórze připrawja

Drježdźany. Twarjenje Sakskeho krajneho sejma změje bórze tež serbskorěčny napis. Kaž zarjadnistwo parlamenta wčera wozjewi, je prezident krajneho sejma dr. Matthias Rößler iniciatiwu wjacorych zapósłancow CDU sćěhował a wotpowědny nadawk dał. Zarjadnistwo jón ze społnomócnjenym architektom hišće wothłosuje. „Wjeselu so, zo budźe wuslědk za wšitkich wopytowarjow parlamenta bórze widźomny“, Matthias Röß­ler podšmórny.

Schwarz swój mandat złožił

Budyšin. Wokrjesny radźićel Martin Schwarz z frakcije Wobydlerske zjednoćenstwo za swobodu měnjenja a sobupostajowanje je swój mandat w Budyskim wo­krjesnym sejmiku złožił. To pisa wón w lisće krajnemu radźe Michaelej Harigej (CDU). Kaž krajnoradny zarjad zdźěla, mjenowaše Schwarz jako přičinu swoje zasudźenje z 10. apryla kaž tež pobrachowacy čas powołanja dla.

Čěska je měrliwy kraj

wozjewjene w: Krótkopowěsće
wutora, 12 junija 2018 14:00

Spektrum temow hoberski

Wuběrk krajneho sejma wo serbskich naležnosćach wuradźował

Drježdźany (SN/MkWj). Wuběrk za wědomosć, wysoke šule, kulturu a medije Sakskeho krajneho sejma je wčera Rozprawu sakskeho statneho knježerstwa wo połoženju serbskeho ludu kaž tež Dźěłowu rozprawu Rady za serbske naležnosće Sakskeje rozjimał. Bě to prěni króć scyła, zo wotmě so wuradźowanje we wobłuku zjawneho posedźenja na plenarnej žurli Drježdźanskeho krajneho sejma. Na wuradźowanju wobdźělichu so jako zastupnicy Serbow předsyda Domo­winy Dawid Statnik, předsydka sakskeje serbskeje rady Marja Michał­kowa, městopředsydka Leńka Thomasowa a Chróšćanski wjesnjanosta Marko Kliman (CDU). Dobry dźesatk serbskich zajimcow je posedźenje na wopytowarskej tribunje sćěhował.

wozjewjene w: Kraj a swět
wutora, 12 junija 2018 14:00

Busy kulturnišća zwjazali

Budyšin (CS/SN/bn). Wuměłstwo na kolesach bě minjeny kónc tydźenja wospjet we Łužicy dožiwić. Na dwěmaj linijomaj a ze štyrjomi jězdźidłami zwjaza tak mjenowany wuměłstwowy bus jednotliwe stacije w Pomorcach, Koporcach, Budyšinje a Korzymju. Ducy zahorichu hudźbnicy, rejwar a dźiwadźelnica hosći z wotměnjawym programom.

Ćežišćo w sprjewinym měsće bě Strowot­na studnja. Pod hesłom „Morjo platow – Wjace hač plata“ chcychu or­gani­zatorojo atraktiwitu měšćanskeho dźěla wuzběhnyć. A woprawdźe tworjachu na ze­leń bohate nutřkowne dwory, Naměsto přećelstwa ludow a samo stara Konsumowa pjekarnja kmany ramik za spě­wanje, molowanje a breakdance.

wozjewjene w: Kultura
wutora, 12 junija 2018 14:00

Z łužiskim koordinatorom

Podstupim (SN/at). Braniborski ministerski prezident Dietmar Woidke (SPD) je strukturne wuwiće we Łužicy jako šefowu naležnosć wozjewił. Za to powoła wón wjelelětneho bywšeho prezidenta wyšeho hórniskeho zarjada w Choćebuzu dr. Klausa Freytaga jako społnomócnjeneho premiera za Łužicu a łužiskeho koordinatora. Po dźensnišim kabinetnym posedźenju je Woidke noweho społnomócnjeneho předstajił.

Hamtske sydło łužiskeho koordinatora budźe w Choćebuzu, hdźež změje braniborska statna kenclija zdobom łužisku wotnožku, kaž rěka w nowinskej zdźělence. Klaus Freytag bydli wot lěta 1993 we Łužicy. Naposledk bě wón wot decembra 2015 wotrjadnik „energija a surowizny“ w braniborskim minister­stwje za hospodarstwo a energiju.

Powołanje Freytaga je jedyn ze štyrjoch personalnych rozsudow, z kotrymiž chce ministerski prezident Woidke centralne nadawki přichoda lěpje zmištrować. Dalši potrjechi statneho sekretara Martina Gorholta. Něhdyši społnomócnjeny knježerstwa za serbske naležnosće budźe nowy šef statneje kenclije.

wozjewjene w: Kraj a swět

Róžant (CRM/SN). Na kóncu koncerta njedźelu popołdnju wudyri wichorojty přiklesk w połnje wobsadźenej Róžeńčanskej cyrkwi – dźakowano dirigentej Friedemannej Böhmje – stajnje korektnej pianistce Ginje Hentsch, gymna­ziast­ce Theji Čórlichec jako wobhnadźenej solist­ce-sopranistce kaž tež wěsće wustupowacym komornym spěwarkam a spěwarjam a skónčnje cyłemu chórowemu cyłkej chowancow Serbskeho gymnazija w Budyšinje za pozběhowacu interpre­taciju duchowneje hudźby. Chróšćanski nowy kapłan dr. Jens Buliš wědźeše k tomu z jadriwymi słowami zawod a impuls do modlitwy podać.

Z „Preludè“ k swětosławnemu „Te Deum“ francoskeho mištra baroka Marca­-Antoina Charpentiera poda chór zawodnje nazorny přikład swojeho do­breho hłosoweho kubłanja. Slědowachu wujimki ze wšěch pjeć oratorijow „Počasy“ Korle Awgusta Kocora, woblubowana moteta „Strowa sy, Marija“ Jana Pawoła Nagela a cyle swojotna sadźba serbskeje kwasneje hymny „Praj, křesćijanski čłowjeko“ z pjera na swoje wašnje genial­neho Jurja Pilka.

wozjewjene w: Kultura
wutora, 12 junija 2018 14:00

Bonus přesadźić

Drježdźany (SN/MiR). Lipšćanska uniwersita kaž tež Techniskej uniwersiće Drježdźany a Kamjenica nałožuja nětko wšitke tři bonusowe rjadowanje za serbskorěčnych zajimcow, kotřiž chcedźa wučerstwo studować. Techniskej uniwersiće stej online-maski za požadanje za wšitke wobmjezowane předmjety a směry za studij wučerstwa wo polo „pohłubšace znajomosće serbšćiny“ rozšěrili. Na Lipšćanskej uniwersiće móža zajimcy we wobłuku online-požadanja z pomocu portala za studowacych AlmaWeb z wosebitej próstwu pohłubšene znajomosće serbšćiny dopokazać.

wozjewjene w: Kubłanje
wutora, 12 junija 2018 14:00

Za atomarne wotbrónjenje

Singapur (dpa/SN). Sewjerokorejski mócnar Kim Jong Un je zwólniwy, k dospoł­nemu jadrowemu wotbrónjenju korej­skeje połkupy přinošować. W zhromadnje z prezidentom USA Donaldom Trumpom podpisanej deklaraciji potwjerdźa wón swoje „krute a njepowalne wuznaće“ k wobšěrnemu atomarnemu wotbrónjenju. Za to bě jemu Trump wulke wěstotne garantije přilubił. USA a Sewjerna Koreja chcedźa „trajace a stabilne“ měrowe roz­risanje za korejsku połkupu nańć.

Wo ćěkancach rěčeć

Berlin (dpa/SN). Zwjazkowa kanclerka Angela Merkel wočakowaše dźensa awstriskeho zwjazkoweho kanclera Sebastiana Kurza na rozmołwu wo azylowej politice. Politikar ÖVP je jedyn z najraznišich kritikarjow politiki předsydki CDU ćěkancam napřećo. CSU ma Kurza porno tomu za wažneho partnera nastupajo žadanja, předpisy wo migraciji raznje přiwótřić. Wčera jewjachu so diferency mjez nutřkownym ministrom Horstom Seehoferom (CSU) a Angelu Merkel. Dźe wo prašenje, kotrych ćěkancow měli na mjezy Němskeje wotpokazać.

Zakaz stawkowanja wostanje

wozjewjene w: Kraj a swět

Podstupim (SN/BŠe). Hižo někotre lěta zasadźa so braniborski ministerski prezident Dietmar Woidke (SPD) za to, wutwarić železnisku syć do Pólskeje. Na wčerawšim 3. němsko-pólskim železniskim wjeršku w Podstupimje je wón prěni wulki wuspěch docpěł. Tak su so zamołwići za wutwar dźělneje čary a za železniski zwisk w intercityjowej kwaliće mjez Berlinom, Wrócławjom a Krakowom dorozumili. Dietmar Woidke je zdobom koordinator zwjazkoweho knježerstwa za němsko-pólske poćahi.

Němska železnica kaž tež zwjazkowej krajej Braniborska a Berlin podpisachu tuž wotpowědne wozjewjenje wotpohladow za dwučarowy zwisk mjez Berlinom a Szczecinom přez Angermünde. Na železniskej čarje mjez Berlinom a Waršawu měli bórze moderne ćahi zasadźić, zdźěli koordinatorka za němske nalež­nosće pólskeho knježerstwa Renata Szczęch, kotraž je wobdźělnikow na 4. wjeršk klětu w Pólskej přeprosyła.

wozjewjene w: Kraj a swět
wutora, 12 junija 2018 14:00

Sakska a Čěska dobraj susodaj

Drježdźany (ČŽ/K). Štwórć lětstotka dobreho, přećelskeho susodstwa mjez Čěskej a Sakskej bě wčera knježerstwomaj wobeju krajow witana składnosć, na dnju 25. róčnicy wujednanja přisłušneho zrěčenja zhromadnje wopominać jeho signowanje. Zo bě čěski premier Andrej Babiš do Drježdźan z rjadom dalšich ministrow na woswjećenje podawka přijěł, wobswědča wusahowacu wažnosć kontrakta, kotryž wopokazuje so jako spomóžny zakład wuskeje wzajomnosće.

Sakski ministerski prezident Michael Kretschmer (CDU) a Babiš wobjednawaštaj mjez druhim wobchadnu infrastrukturu a planowany twar wysokospěšnostneje železnicy, zwjazowaceje Berlin, Drježdźany a Prahu z nowym tunlom pod Rudnymi horami. Předmjet rozmołwy je tež była kooperacija policije wobeju krajow w boju přećiwo kriminaliće a drogowej scenje. Dale diskutowaštaj premieraj wo pohłubšenju zhromadneho dźěła na polu hospodarstwa a kultury.

wozjewjene w: Kraj a swět
wutora, 12 junija 2018 14:00

Městnosć zetkanja OSSI

Pomoc migrantam je ćežišćo dźěła we Wojerowskim młodźinskim klubje

Wojerecy (SiR/SN). Zamołwity Sakskeje za wukrajnikow Geert Mackenroth je swoje wobdźělenje na interkulturelnym swjedźenju za dźěći, młodźinu a swójby we Wojerowskim klubje OSSI krótkodobnje wotprajił. Politikar chcyše so minjenu sobotu wo tuchwilnym stawje a přichodźe zarjadnišća přeswědčić. Rozsud Mackenrotha njeje pak swjedźenjej škodźał. Zajimcy wužiwachu składnosć sej poskitki zbližić. Regionalne dźěłanišćo, za kubłanje, dźěło a perspektiwy žiwjenja (RAA) Wojerecy-wuchodna Sakska je wobhospodarjer OSSIja. Zhromadnje ze swojimi partnerami chce wone k tomu přinošować, zo su wobydlerjo kmani so zamołwiće a ze swójskeje iniciatiwy za zhromadnosć zasadźić. Za to wuhotuja sobudźěłaćerjo poskitki, wosebje za dorosćacych, a spěchuja wuwiće socialneje kaž tež indiwidualneje kompetency.­ ­Zdobom podpěruja ciwilnotowaršnostny ­angažement přećiwo prawicarskoekstremistiskim ideologijam.

wozjewjene w: Socialne

Serbska debata

nowostki LND