Z wudaća: pjatk, 06 julija 2018

Berlin (dpa/SN). Po tydźenje trajacej zwadźe je so wulka koalicija CDU, CSU a SPD na naprawy přećiwo ilegalnej migraciji do Němskeje dojednała. Předewšěm nutřkowny minister Horst Seehofer (CSU) bě na tym wobstał. „Wot A do Z je wšitko tak, kaž sej to jako minister přeju“, rjekny wón wčera wječor po wjerškowym zetkanju koalicije w Berlinje. Při­wšěm njeje so we wšitkich dypkach přesadźić móhł. SPD je docpěła, zo ma so hišće lětsa zakoń wo zapućowanju do Němskeje předpołožić.

Městopředsyda SPD Ralf Stegner wšak dwěluje, zo je kompromis k azylowej politice zwoprawdźomny. Za to trěbne zrěčenja z Italskej a Awstriskej drje njenastanu, rjekny wón w ZDF. „To njemóže scyła ­fungować, hdyž su zwjazkarjo sami na­cionalisća a egoisća.“

Praha (ČŽ/K). Čěski zawod Škoda Transportation twari za Němsku 80 tramwajkow najmodernišeho razu, štož jemu přibližnje sydom miliardow krónow (dobrych 280 milionow eurow) wunjese. Zrěčenje z nim je wujednało wobchadne předewzaće Rhein-Neckar-Verkehr. Předwidźane su nowe tramwajki za wobchad w Badensko-Württembergskej, Hessenskej a Porynsko-Pfalcy. Je to dotal najwjetši eksportny nadawk za Škoda Transportation, po wobjimje produkcije kaž tohorunja financy nastupajo, zwurazni generalny direktor čěskeho zawoda Petr Brzezina. Kontrakt wobsahuje opciju na dalše 34 tramwajkow.

K ekskluziwnemu nadawkej je čěske předewzaće přišło, po tym zo bě za njón dobyło wupisanje, mjezynarodnje publikowane w měrcu 2017. Při tym móžeše cyłu swětowu konkurencu „wutłóčić“, mjez njej tež renoměrowane koncerny. „Kaž je widźeć, je wužitne orientować so na zapadne wiki“, Brzezina wuzběhny. W tym zwisku wón zdźěli, zo doda Škoda Transportation hišće lětsa prěnje tramwajki do sakskeje Kamjenicy. W zapadnych zwjazkowych krajach budu prěnje za tři lěta jězdźić.

Justicna reforma zbudźa reakcije Europskeje unije a protesty ludźi

Waršawa (dpa/SN). Pólska wobstawa dale na swojej samostatnosći w EU. „Respekt před narodnej identitu je jedyn ­ze sćežorow Europskeje unije“, rjekny ministerski prezident Mateusz Morawiecki srjedu w Europskim parlamenće w Straßbourgu. „Kóždy kraj ma prawo, swój justicny system swojim tradicijam wotpowědnje tworić.“

Pólska so mjeztym dlěje hač dwě lěće z komisiju EU wadźi, předewšěm wot narodnokonserwatiwneje knježerstwoweje strony Prawo a sprawnosć přesadźeneje justicneje reformy dla.

Morawiecki potwjerdźi konstruktiwnu rólu, kotruž chcyła Pólska w EU přewzać, žadajo sej dalši wutwar nutřkoeuropskich wikow runje hladajo na posłužby. Wón warnowaše před skrótšenjemi dotalnych europskich přiražkow na dobro Pólskeje, kotrež běchu krajej jara pomhali. Morawiecki zdobom před tym warnowaše, so „wosudnym wizijam“ někajkeho europskeho superstata podwolić. Europska unija je po jeho słowach jenož „mjezystatny eksperiment“, z kotrymž za rozrisanjemi pyta, kotrež kraje same njezdokonjeja.

Ně! To njebě žadyn dobry tydźeń za demokratiju w Němskej. Razne rozestajenja mjez sotromaj CDU a CSU, wumjetowanja, hroženja, ultimaty – bjezmała by samo knježerstwo zwrěšćiło. A čehodla to wšo? Wuslědk wšeho mjenuje so „azylowy kompromis“, njeje pak bohužel ničo druhe hač horcy powětr, kotryž chcedźa nam po wonym lěćnym dźiwadle jako wulki wuspěch předać. Wadźili su so wo problemje, njepotrjechjacym wšědnje ani dźesać ćěkancow, kotřiž chcedźa do Němskeje, byrnjež hižo w druhim europskim kraju registrowani byli. Při tym ani wo tym njerěču, zo je wony kompromis jeničce zwoprawdźomny, jeli jemu susodne kraje scyła přihłosuja. Wone dźě dyrbja wotpokazanych ćěkancow potom zaso přiwzać, štož pak njeje tak wotwidźeć. Sym sej wěsty, zo konflikt po krótkej přestawce znowa wudyri. Najhórje pak je, zo so tajkeho dźiwadła dla dźeń a wjace ludźi wot politiki wot­wobroća. Marko Wjeńka

We wudaću Serbskich Nowin ze 4. julija ­je so w přinošku na 1. stronje pod nad­pismom „Dobra bilanca a wosebita wotnožka“ zmylk zasunył. Awtor piše tam: „Cyłkownje je w serbskim nakładnistwje wot lěta 1958 nimo wučbnicow 150 pu­blikacijow w delnjoserbskej rěči wušło.“ To njewotpowěduje wěrnosći a ma prawje rěkać: „Cyłkownje je w serbskim nakładnistwje aktualnje nimo wučbnicow 150 publikacijow w delnjoserbskej rěči w poskitku.“ Awtor prosy wo wodaće za misnjenje. SN

Swětowe mišterstwa w kopańcy su mnohim profijam krónowanje karjery. Tež sudnikam je to sobu najwjetši cil, kotryž móžeš docpěć. Runja druhim sudnikam dyrbjachu nětčiše mišterstwa w Ruskej tež němskemu refereejej dr. Felixej Brychej dalši wjeršk karjery być. Kaž pak smy předwčerawšim zhonili, dyrbješe wón hižo prjedy swoje kófry pakować, hač bě sej to myslił. Brych pak ze swojim teamom sam njeje. Swětowy koparski zwjazk FIFA je hižo tójšto dalšich sudnikow domoj pósłała. Wopodstatnjenja k jednotliwcam pak hišće žane dała njeje. „Přeběh tychle mišterstwow mje a mój team wězo wulce přesłapja. Žiwjenje pak dale dźe, a přińdźemy zaso“, měnješe němski koparski sudnik.

Praha (dpa/SN). Wobškodźeny płunowód je wosrjedź Prahi wulkozasadźenje wohnjoweje wobory a policije zawinił. Wobornicy dyrbjachu bydlenja, hotele a hosćency we wot turistow sylnje wopytanym měšćanskim centrumje ewakuować. Dohromady bě to 500 ludźi, kaž rěčnik města wčera wječor zdźěli. Direktnje na městnje wobškodźenja su sčasom strašnje wulku koncentraciju płuna naměrili, tak zo hrožeše samo strach rozbuchnjenja. Městnosć defekta na Masnej hasy w starym měsće tuž w dalokim wobkruhu zaraćichu a wobchad tramwajkow nachwilnje přetorhnychu.

Po informacijach zamołwitych běchu twarscy dźěłaćerjo płunowód mylnje přerězali. Na to dyrbjachu syć płuno­wodow w čěskej stolicy krok po kroku wotpinyć. W aprylu 2013 bě so při rozbuchnjenju płunowoda w Praskim starym měsće 43 ludźi zraniło. Pozdźišo zwěsćichu fachowcy twarske njedostatki při kładźenju nowych rołow w 70tych lětach. Tehdy běchu płunowód a mili­nowody přewusko hromadu kładli. Po krótkospjeću bě płunowód před pjeć lětami rozbuchnył.

Křesćan Krawc z Hrubjelčic piše k zeńdźenju Serbskeho sejma dla:

Prawniski wuběrk Domowiny – zastu­pjeny přez předsydku sakskeje serbskeje rady Marju Michałkowu, předsydu třěšneho zwjazka Domowiny Dawida Stat­nika, něhdyšeho a tučasneho jednaćela Domowiny Bjarnata Cyža a Marka Kowarja, bywšeho direktora Załožby za serb­ski lud Marka Sucheho, delnjołužiskeho Serba Kita Elu kaž tež prawiznicu Katrin Suchec-Dźisławkowu – je sej 12. smažnika wysokorjadnych zastupjerjow Rady starostow do Serbskeho domu w Bud­y­šinje přeprosył, zo bychu prašenja hladajo na wólby Serbskeho sejma stajili. Što je zhromadźizna na kóncu wobzam­knyła, njezajimuje jenož mje. Nihdźe njenamakam, na čo su so tam dojednali. Zwěrju so prašeć, čehodla su zeńdźenje wotměli a z kotrym zaměrom.

Runja druhim městam přewjeduja w Biskopicach prawidłowne wodźenja po starym měsće. Přichodne budźe wutoru, 10. julija, w 10 hodź. Zetkanje je při radnicy. Runje tam budźe sobotu, 14. julija, wot 15 hodź. wosebite wodźenje. Zajimcy dóstanu wobšěrny dohlad do měnjatych stawiznow domu, měli pak so sčasom w měšćanskim zarjadnistwje přizjewić. Foto: Sascha Hache

Pjatk 6. do 8.7.   Wjesny swjedźeń w Lěsce (Lieske) pola Wóslinka

   Wubědźowanje Simson-mopedow při nahłej skłoninje přibrjoha w Lejnom (Geierswalde)

Pjatk 6. a 7.7.   Diskoteka kuntworow w Salowje

   Sportowy swjedźeń Rakečanskeho ST

Sobotu 7. a 8.7.    Dźěćacy swjedźeń z wikami starožitnosćow na Jaku­becec twjerdźiznje w Mortkowje

Sobotu 7.7. 8:00 Wolejbulowy turněr Captainscup we Worklecach

  10:00 Wodźenje po zornowcowej wsy Zemicach­Tumicach

  10:00 Přirodowědna ekskursija Kamjenskeho Muzeja zapadneje Łužicy z Bodom Pleskym k wulkim larwam­ kobołkoweje krokawy při Rakečanskich hatach

  11:45 Wuhladko na MDR

  14:00 Zelowe wodźenje po Miłočanskej skale Při Kra­bato­wym kamjenju

  16:00 Wodźenje „Na slědach Wojerowskeho čestneho wobydlerja a nana kompjutera Konrada Zusy“ wot Wojerowskeho hrodu

Njedźelu 8. do 13.7.   Prózdninski camp „Stare a tradicionalne rjemjesło“ w Dołhoboršćanskej přirodoškitnej staciji

Njedźelu 8.7. 9:00 Prózdninske pućowanje NABU po Dubrjenskim bahnje – start: w Michałkach

  9:00 Wuchodoněmske wubědźowanje w jězdźenju z kartom na Łazowskej kartowej čarje