Z wudaća: póndźela, 09 julija 2018

Berlin (dpa/SN). Zeleni žadaja sej jasne směrnicy, zo hodźeli so sćěhi wudobywanja brunicy financować. Předewšěm měło so zaručić, zo wuhlowe koncerny žadane nalutowanki za tak mjenowane wěčne poćežowanja tež woprawdźe składuja, rjekny předsydka strona Annalena Baerbock powěsćerni dpa. Zamołwite zarjadnistwa dyrbjeli sej pjenjezy a hódnotowe papjery jako wěstotu wužadać. Stat dyrbjał tomu zadźěwać, zo móža so koncerny wuwinyć, je-li jedna z wotnožkow insolwentna. Němska chce přichodne lěta wudobywanje brunicy skónčić.

Praha (ČŽ/K). Čěski ministerski prezident Andrej Babiš je so w Karlovych Varach ze swojim pólskim kolegu Tadeu­szom Morawieckim zetkał. Jednałoj staj wo dalšim wutwarje zhromadneho dźěła mjez krajomaj. Tak ma so na woběmaj stronomaj hranicy infrastruktura hišće polěpšić. Předwidźany je tohorunja dalši wutwar awtodróhow. Zhromadne dźěło w jadrowej energiji bě dalša tema.

Pólska je nastupajo wobrot druhi najwjetši hospodarski partner Čěskeje republiki, před Słowakskej. Porno tomu je Čěska w susodnym kraju sedmy najsylniši inwestor. Přezjednje Babiš a Morawiecki konstatowaštaj, zo su poćahi mjez Čěskej a Pólskej na jara dobrym niwowje a zo matej wobaj krajej na problemy nastupajo EU kaž tež migraciju jara podobne nahlady. „Čěska republika njeje za nas klučowy partner jenož na hospodarskim polu, ale tež w kulturje“, Morawiecki zwurazni. Zhromadnje wopytaštaj premieraj předstajenje we wobłuku 53. Karlovarskeho filmoweho festiwala a wobhladaštaj sej „Rain Man“.

Žitawa chce so wo titul „kulturna stolica Europy 2025“ prócować

Zhorjelc (AK/SN). Prócowanja Žitawy wo titul „kulturna stolica Europy 2025“ Zhorjelski wokrjesny sejmik podpěruje. Krajny rada Bernd Lange (CDU) a Žitawski wyši měšćanosta Thomas Zenker (Žitawa móže wjace) mataj nadawk, wotpowědne kooperaciske zrěčenje podpisać. To je wokrjesny sejmik na minjenym posedźenju z wjetšinu hłosow wobzamknył. Radźićeljo wotpowědowachu tak rozsudej Žitawskich měšćanskich radźićelow loni w septembru kaž tež wotumej hłowneho wuběrka Zhorjelskeho wokrjesneho sejmika lětsa w juniju. „Stejimy we wubědźowanju. Tež druzy kandidaća maja dobre argumenty. Tola žane druhe přizjewjenje nima charakter splećenja a trojonarodnosće kaž my“, wobroći so Thomas Zenker – wón je tuchwilu słužbnje we wukraju – we widejowym nahrawanju na radźićelow. Wón ma prócowanje wo titul za wulku šansu za cyły region a za impuls w zahajacej so strukturnej změnje. Liberecski a Budyski wokrjes stej hižo podpěru signalizowałoj.

Čłonojo iniciatiwneje skupiny Serbski sejm činja dale kaž planowane. To rěka, kóždy móže so dale do lisćiny wolerjow zapisać, zo by sobu wolić móhł. Kelko ludźi je dotal zapisanych, pak iniciatiwnicy njepraja. K tomu wottam jenož rěka, zo su „wólby tajne a podleža wólbnemu porjadej, w kotrymž steji, zo so interna do zakónčenja wólbow do zjawnosće njedawaja“. Serbske Nowiny pak so dale naprašuja. Wšako je zajimawe zhonić, kelko ludźi chce poprawom tajki „serbski parlament“ wolić. Měnjenja wo nim dźě su jara rozdźělne. Mnozy dźerža k Domowinje, kotraž hižo dlěje hač sto lět serbske za­jimy zastupuje. Druzy su sejmej jara wotewrjeni a jón witaja. Fakt pak je, zo přemało ludźi wo ideji, móžnych nadawkach a zwoprawdźenju wšeho wě. Iniciatiwnicy njeměli tuž přejara wo „skandalach“ ­a zmylkach druhich rěčeć, ale ludźi na městnje bóle wo swojej naležnosći informować. Janek Wowčer

Z Francoskej, Belgiskej, Jendźelskej a Chorwatskej steja jenož hišće europske wubranki w połfinalu swětowych koparskich mišterstwow. Pjatk popołdnju bě so Francoska jako prěnje mustwo za koło najlěpšich štyrjoch swětoweho cupa kwalifikowała. Équipe Tricolore přesadźi so přećiwo Uruguayjej z 2:0. W 40. min. nawjedowaše wona přez wrota Raphaëla Varany. Škitar dobyćerja champions league Real Madrid přetwori wólny kop Antoinea Griezmanna z hłójčku k 1:0. Wo 2:0 postara so Griezmann sam. Wón měješe nadobo přewjele městna a třěli bul cyle jednorje raz na wrota. Centralnje kulowata koža lećeše a tróšku zlětowaše. Třělwu wotwobarać njedyrbjało za wrotarja poprawom problem być. Fernando Muslera pak hrajny nastroj wopak powobliči, a tak skoči tón wot jeho rukow do syće.

8. julija 1928 wotmě so w Budestecach pjaty Wšotowarstwowy zlět Domowiny. Do toho běchu hosćićel 1924 Chwaćicy, 1925 Kulow, 1926 Bukecy a 1927 Radwor. Kaž na wšěch městnach měješe Serbski Sokoł tež w Budestecach wulki podźěl ­na poradźenju swjedźenja. Wot zetkanišća w Rašowje pochodowachu Sokoljo pod přewodom Malešanskeje sokołskeje kapały na čole swjedźenskeho ćaha. Njesechu chorhoj Poršiskeje jednoty, poswjećenu hakle měsac do toho (jako scyła prěnju w Sokole). Na wupyšenym wozu Sokoła bě čitać hesło „Sokoljo dźerža Łužicu“. Wo swjedźenskim ćahu pisachu Sokołske Listy, zo „witachu jón wšudźe wulke syły přihladowarjow“. Na swjedźenišću wu­stupichu Sokoljo-mužojo pod nawodom bratra Kerka, Sokołki-žony pod sotru Šudakowej a Malešanscy rejwarjo pod bratrom Bartom. Zlět skónči so ze zabawnym wječorkom na Mnišoncu a z mištrom Bjar­natom Krawcom. Wo naledźe Sokołske ­Listy tež pisachu: „Pjero njemóže wopisać, štož je kóždy sam w sebi začuwał, hdyž zynki sokołskeje kapały do nócneje ćišiny zaklinčachu.“ Po Budestecach slědowaštej zlětaj 1929 w Klukšu a 1930 w Rakecach. Mikławš Krawc

Jedyn z najwjetšich podawkow w běhu lěta w Salowje je diskoteka kuntworow. Na nju je sobotu zaso tójšto wopytowarjow ­přišło, wšako běchu za nju mócnje wabili. Runje tak kaž loni postaraštaj so tam Berlinskaj diskotekarjej z mjenom Mütze Katze DJ Team předewšěm z hudźbu z 90tych lět wo dobru naladu. Foto: Gernot Menzel

Parkowanski dom na Wonkownej Lawskej w Budyšinje ma do komunalneho wobsydstwa přeńć. To drje so na parkowansku situaciju w měsće njewuskutkuje, ma pak lěpšiny při wobhospodarjenju.

Budyšin (CK/SN). Z 289 městnami je ­Budyski parkowanski dom Centrum na Wonkownej Lawskej za parkowansku situaciju w sprjewinym městnje dosć wažny. Za tych, kotřiž parkowanske městno pytaja, po wšěm zdaću nic tak jara. 190 trajnych městnow drje je zwjetša wuknihowanych. Wot městnow za dnjowych hosći pak wostanje často dźěl prózdny. Wobdźělenskej a zawodowej towaršnosći (BBB) jako wobhospodarjerjej načinja to kóžde lěto deficit něhdźe 200 000 eurow. Přiwšěm chce komunalne předewzaće parkowanski dom kupić. Wo tym pak měješe měšćanska rada rozsudźić. Na swojim zašłym posedźenju bě wjetšina jeje čłonow za to.

Towarstwa a jednotliwcy móža namjetować, štó měł pjenjezy dóstać

Hórki (SN/MWj). Swobodny stat Sakska podpěruje lětsa na wosebite wašnje čestnohamtske dźěło. Za to přewostaji wšitkim wokrjesam po 100 000 eurow. Budyski wokrjes je sumu městam a gmejnam rozdźělił, tak zo móže kóžda komuna čestnohamtsce skutkowacych z cyłkownje 1 250 eurami počesćić. Wo tym informowase Chróšćanski wjesnjanosta Marko Kliman (CDU) na zašłym posedźenju gmejnskeje rady w Hórčanskej wohnjowobornej gratowni. Nětko su towarstwa a jednotliwcy namołwjeni namjetować, štó měł w Chróšćanskej gmejnje dźěl tychle pjenjez za swój čestnohamtski angažement dóstać.

Kamjenc. Předsydka Lěwicy a zapósłanča zwjazkoweho sejma Katja Kipping budźe jutře, wutoru, w Kamjencu. Hromadźe ze zapósłanču Sakskeho krajneho sejma Marion Junge prosy wona na piknik a rozmołwu na zahrodowej kulturnej šćežce. Zajimcy zetkaja so w 10 hodź. před hotelom „Villa Weiße“ blisko dwórnišća. Tam wočakuja tohorunja předsydu frakcije Lěwicy krajneho sejma Rica Gebhardta. Wot 13 hodź. chcedźa wšitcy třo Kamjenskej tafli pomhać. Wot 16 hodź. je dalša rozmołwa z wobydlerjemi při kofejowni před Klóšterskimi wrotami planowana.

Za dźěłarničku so přizjewić

Wojerecy. Wot 30. julija do 3. awgusta wotměje so na Wojerowskej dźěćacej a młodźinskej farmje cirkusowa dźěłarnička za dźěći a młodostnych w starobje sydom do 18 lět. Wšědnje wot 9 do 16 hodź. budu tam wobdźělnicy akrobatiku, ku­złarstwo, reje a wjele dalšeho zwučować. Nazwučowany program předstaja woni 3. awgusta w 16 hodź. Za dźěłarničku móža so zajimcy hač do 16. julija přizjewić, a to pod telefonowym čisłom 03571/ 979 164 abo e-mailnje pod .

Dyrdomdej po měsće