Z wudaća: wutora, 07 awgusta 2018
wutora, 07 awgusta 2018 14:00

Dyrbitaj wjele lět do jastwa

Freiburg (dpa/SN). W padźe přez lěta znjewužiwaneho hólca z breisgauskeho Staufena pola Freiburga je sudnistwo dźensa jeho mać a jeje partnera k wjele lětam jastwa zasudźiło. 48lětnu mać chłostachu z dwanaće lětami a šěsć měsa­cami, 39lětneho partnera z dwanaće lětami a z wěstotnej jatbu. Nimo toho mataj wonaj hólcej a dalšemu wopo­rej, małej holčce, 42 500 eurow bólneho pjenjeza płaćić. Dźensa dźesaćlětny bu wot swojeje maćerje a partnera dlěje hač dwě lěće ćežko znjewužiwany. Zdobom poskićeštaj jeho w interneće.

Sankcije wotnětka płaća

Washington (dpa/SN). Najebać spjećowanja EU je prezident USA Donald Trump dwělomne sankcije přećiwo Iranej zaso zawjedł. Naprawy płaća wot dźensnišeho w 6 hodź. Po słowach Trumpa měli na Iran maksimalny hospodarski ćišć wukonjeć. Prezident Hassan Ruhani pak wumjetuje jemu psychologisku wójnu. Trump porno tomu knježerstwo w Teheranje wobwinuje, zo podpěruje terorizm kaž tež namóc a chaos.

Najwjetši woheń w stawiznach

wozjewjene w: Politika
wutora, 07 awgusta 2018 14:00

Wobjim hodźi so rozšěrić

Přikład z Braniborskeje maja tež sakscy krajměrjerjo za zajimawy

Podstupim/Drježdźany (SN/at). Serbske mjena gmejnow a wjesnych dźělow w zdźědźenym sydlenskim rumje namakaš nětko w online přistupnym Brandenburgviewer Krajměrjenja a geobazoweje informacije Braniborskeje (LGB). Na to skedźbnjatej ministerstwo za nutřkowne a komunalne a ministerstwo za wědomosć, slědźenje a kulturu w Podstupimje w nowinskej zdźělence.

wozjewjene w: Politika
wutora, 07 awgusta 2018 14:00

Beck rěči za fuziju krajow

Berlin (dpa/SN). Bywši šef SPD Kurt Beck žada sej fuziju zwjazkowych krajow, zo móhli statne zarjady lěpje a eficientnišo dźěłać. Wo wjetšej reformje federalizma, kotraž tež mjezy krajow zapřijima, njebu hižo dlěši čas diskutowane. „Bych sej tajku přał“, zdźěli Kurt Beck dźensa Němskej redakciskej syći. Tak móhłoj so po jeho słowach na přikład Posaarska a Porynsko-Pfalcska zjednoćić. Kurt Beck ma federalizm za wažny a stabilizowacy element, přiwšěm su reformy trěbne. W Němskej hižo dlěje wo zwjazanju jednotliwych krajow rěča. Konkretny pospyt fuzije mjez Berlinom a Braniborskej pak je w lěće 1996 zwrěšćił. Sakski ministerski prezident Michael Kretschmer (CDU) je přećiwo namjetej Kurta Becka. „Njewidźu ničo, što Zwjazk bóle zamóže hač kraje, nimo zwólniwosće, pjenjezy wudać“, wón praji. Samozrozumliwje budźe so federalny porjad­ dale wuwiwać. „Prošu pak nic do směra centralizacije. Při wólbach zwjazkoweho a krajneho sejma ma wobydler jasnje wědźeć, kotre politiske rozsudy kotry parlament zamołwja.“

wozjewjene w: Politika
wutora, 07 awgusta 2018 14:00

Přichodne pruwowanje

Wuznamny awtor pjero dale wótři – mjez druhim na nowym polu

Dźensa swjeći Křesćan Krawc wosomdźesaćiny. Rodźeny Lemišowčan słuša k najwuznamnišim a najproduktiwnišim serbskim spisowaćelam našeho časa. Dokładny wid na stawizniske a towaršnostne podawizny, zrozumliwa, často dokumentariska rěč a wuraznje serbski fokus jeho twórby wuznamjenjeja. „Moje sujety budu přeco w Serbach jednać a změja stajnje serbski poćah jako jadro powědanja“, awtor rozłožuje. Jubilej jemu „docyła wažny njeje, na žiwjenskich problemach dźě tón ničo njezměni. Čuju so trochu kaž před abiturnym pruwowanjom. A scyła: Dyrbiš za swjedźeń telko organizować a hosćom stajnje prawu wotmołwu dać. Što chceš tež hewak w Hrubjelčicach činić? Do Sprjewje skočić? Snano to tuchwilu ani tajka špatna ideja njeje ...“ Přiwšěm je tajka ličba, tajki datum, přeco tež woblubowana přiležnosć, so jubilara prašeć, kak wróćo zhladujo wažne stołpy swojeho žiwjenja posudźuje. „Hdyž čłowjek rjec njemóže: ‚Kajki hłupak sym tehdy był‘, njetrjebaš docyła z tym započeć. Sy-li stajnje prawje měł, je to najwostudliše.

wozjewjene w: Kultura
wutora, 07 awgusta 2018 14:00

Wopomnjeni Hanki Šěrcec

Hanka Šěrcec, literarnje tež jako „Židowka Hana“ znata, by lětsa 100. narodniny swjećiła. Składnostnje toho zarja­duja wjacori hosćićeljo spomnjeni na wopor nacionalsocializma w Budyšinje a Hórkach.

Budyšin/Hórki (SN). Dźens za tydźeń wuhotuje krajne dźěłowe zjednoćenstwo Serbska Lěwica zjawny spominanski wječor­ w Budyskim Tespis-centrumje. Wosebitaj hosćej budźetaj tam prěni direktor załožby Nowa synagoga Berlin – Centrum Judaicum dr. Hermann Simon a wuznamny serbski spisowaćel Jurij Koch. Wědomostnik wobswětli žiwjenje Hanki Šěrcec a towaršnostne wobstejnosće jeje časa ze stawizniskeho wida, Jurij Koch čita ze swojeho powědančka „Židowka Hana“, kotrež bě 1963 spisał.

Dźeń pozdźišo zarjaduja župa „Michał Hórnik“, Hórčanske wjesne towarstwo Při skale, Chróšćanska wosada a Jěwa-Marija Elic wopomnjenje w Hórkach. Popołdnišu spominansku swjatočnosć při ródnym domje Hanki Šěrcec wobrubi chór 1. serbskeje kulturneje brigady. Wje­čor­nu Božu mšu w Chrósćicach budu spěwarki a spěwarjo Serbskeho gymnazija Budyšin tohorunja přewodźeć.

wozjewjene w: Kultura
wutora, 07 awgusta 2018 14:00

Knefle z cyłeho swěta widźeć

W Njeswačanskim domizniskim muzeju su wot zawčerawšeho knefle z cyłeho swěta­ widźeć. Michael Voigt z Nowosólca-Hródka pokazuje tam wuběr swojich knefli­, kotrež je wjele lět zběrał – wot jednorych přez drohotne hač ke kurioznym“. Wo tym móžeše so tójšto hosći, mjez nimi Njeswačanski wjesnjanosta Gerd Schuster­ (CDU), na wotewrjenskej swjatočnosći njedźelu přeswědćić. Wustajeńca wostanje nětko hač do kónca nowembra přistupna, a to kóždu njedźelu wot 13 do 17 hodź. Po telefoniskim naprašowanju móža zajimcy wosebite wodźenje ze znajmjeńša pjeć wosobami tež tamne dny tydźenja skazać. Foto: Feliks Haza

wozjewjene w: Kultura
Dwórnišćowy hosćenc jenož pućowacy njewužiwali

W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nasta­chu dwórnišća, stražniske chěžki a wuhibkarnje. W lětnjej seriji so rozhladujemy, kak trěbne wone něhdy běchu­ a što je so z nimi stało. (13)

wozjewjene w: Lokalka
wutora, 07 awgusta 2018 14:00

Horcota žně přikrótšiła

Łužiscy ratarjo domchowanje žita z rozdźělnymi wuslědkami zakónčili

Zdźěr/Hodźij/Róžant (JK/SN). Hdyž dowolnicy a šulske dźěći lětuše, hižo dlěši čas trajace horce wjedro jara witaja, maja ratarjo z nim přiwšěm swoju lubu nuzu. Suche wjedro je drje tomu dopomhało, zo móžachu žnjensku techniku tak efektiwnje kaž hižo dołho wjace nic zasadźić a žně wo wjele spěšnišo zakónčić. Wuslědki žnjow pak su po Hornjej Łužicy přerězne a zdźěla njespokojace. To na­stupa mnóstwo runje tak kaž kwalitu.

Na lochkich pódach Holanskeje farmy Zdźěr su lětsa suchoty dla wjele mjenje žita domchowali, hač běchu wočakowali. Tež kwalita zorna po słowach jednaćela Uda Noacka njespokoja. Tak liči wón z mjenje dochodami a z přidatnymi hospodarskimi ćežemi. Tež běrny a coko­rowa rěpa ćerpja pod trajacej suchotu. Hačrunjež su zažne běrny trójce krjepili, njejsu z wunoškom spokojom. Najebać to pak su kupcy na Zdźěrjanskich běrnach dale zajimowani. Kaž wšitcy druzy ratarjo nadźijeja so tež w holanskej farmje bórzomneho dešća.

wozjewjene w: Hospodarstwo
wutora, 07 awgusta 2018 14:00

Wobě mustwje so distancujetej

Budyšin/Biskopicy (SN/at). Na spočatku a w běhu koparskeje hry regionalneje ligi Biskopičanske KT 08 – Budissa Budyšin minjenu sobotu w Biskopicach je k antiserbskim parolam dóšło. Policija podawk z kameru dokumentowaše a zwěsći personalije škaraka. Mjeztym so tež statny škit z podawkom rozestaja.

„Jako FSV Budissa Budyšin nimamy diskriminowace a ponižace wołanja ani za rjane ani je njetolerujemy“, rěka na internetnej stronje Budyskeho koparskeho kluba. Budissa chce nětko ze swojim zamołwitym za fanow rěčeć a so z nim zhromadnje wo to starać, zo so tajke hanjace wołanja njewospjetuja. Budissa je drje so pola Biskopičanskeho KT 08 a jeho fanow zamoł­wiła, pola Serbow pak eksplicitnje nic.

W Biskopičanskim KT 08 su dźensa podawki analyzowali. „Distancujemy so wot tajkich ranjacych wołanjow“, rjekny nawoda jednaćelnje Fred Wonneberger našemu wječornikej. Jedna postajena naprawa je, zo jědźe prezident Jürgen Neumann dźensa z fanami w busu na hru přećiwo Lokomotiwje Lipsk, hdźež chce wohańbjace zadźerženje narěčeć.

wozjewjene w: Sport
wutora, 07 awgusta 2018 14:00

Startuja do sezony

Pjatk započnje so za Zapadołužiski kopar­ski zwjazk sezona 2018/2019. Prěni­ duel we wokrjesnej wyšej lize wuhra­jetej w Dobruši wot 18 hodź. mustwje ST Hnašecy-Dobruša a Póst Germania Budyšin. A to je nětčiša zesta­wa najwyšeje koparskeje ligi wokrje­sa Budyšin:

Módro-běli Kulow

Sokoł Ralbicy/Hórki

Wojerowski FC

Rakečanske ST

LSV Hory

SG Großnaundorf

Motor Kumwałd

Drohotka Ramnow

ST Radwor

Natwar Němske Pazlicy

ST Porchow

ST Hnašecy-Dobruša

Zeleno-běli Bukecy

ST Kinspork/Łužnica

Póst Germania Budyšin

TSV Połčnica Jurij Bjeńš

wozjewjene w: Sport

nawěšk

nowostki LND