Z wudaća: wutora, 09 oktobera 2018

Budyšin (CS/SN). W Budyskej Pětrowej cyrkwi su minjeny pjatk dźesaćlětne wobstaće Ekumeniskeho tachantskeho wobchoda woswjećili.

Wobchod při Budyskich Mjasowych wikach běchu nazymu 2008, do reformaciskeho swjedźenja, wotewrěli. Tehdy staj wobchod ewangelski krajny biskop Jochen Bohl a katolski biskop Joachim Reinelt zhromadnje poswjećiłoj. Wša přičina tuž, róčnicu hódnoćić. Koncept wšak su mjeztym tróšku změnili. Dale njezměnjena pak je zasadna myslička, strachi před tamnej nabožinu přewinyć a wěrywuznaći mjez sobu zwjazać.

Ekumeniski wobchod ma wukładne wokno cyrkwinskeho žiwjenja a městno zetkawanja być. Swjedźeń k dźesaćlětnemu wobstaću su z teje přičiny w tachantskej cyrkwi zarjadowali. Mjez něhdźe 200 hosćimi bě mjeztym na wuměnku žiwy biskop Joachim Reinelt, kotrehož staj čłon předsydstwa towarstwa tachantskeho wobchoda Peter-Paul Straube a wjelelětna čestnohamtska sobudźěłaćerka Barbara Pohl wutrobnje witałoj.

wozjewjene w: Politika
wutora, 09 oktobera 2018 14:00

Z fantaziju wuměłske twórby nastali

Kak ze starych, hižo njetrěbnych materialijow něšto nowe zhotowić, z tym zabě­rachu so dźensa dźěći Ralbičanskeho horta w Budyskim Serbskim muzeju. Sobu­dźěłaćerka muzeja Mónika Ošikowa rozłoži jim k zazběhej prózdninskeho poskitka wažnosć přirodoškita a z kotrymi małymi skutkami móža tež wone k wobswě­to­škitej přinošować. Po tym wěnowachu so holcy a hólcy zhromadnemu paslenju­, za čož­ wužiwachu bjezwuwzaćnje hižo njewužiwane materialije kaž knefle, knihi a papjerc, płat abo tyzki. Při tym pokazachu tójšto fantazije, a tak nastachu małe wuměłske twórby, kotrež so zawěsće tež jako dar hodźa. Foto: SN/Maćij Bulank

wozjewjene w: Kultura
wutora, 09 oktobera 2018 14:00

Křiž do stolicy Čěskeje

Praha/Pančicy-Kukow (SN/MiR). Towarstwo přećelow Serbow (SPL) w Praze přihotuje w tamnišim Serbskim seminarje wosebite počesćenje. 1. decembra 2018 chcedźa w rumnosćach seminara poswje­ćić drjewjany křiž. Iniciator projekta je Kukowčan Alfons Kuring. Dotal njeje čłonam SPL jasne, štó je wuměłc twórby. Tež serbski měšnik, kiž ma křiž poswjećić, njeje hišće pomjenowany. „Přiwšěm ma iniciatiwa za nas hłuboki zmysł“, praji předsyda SPL Lukáš Novosad. „Poměr Če­chow­­ ke křesćanstwu njeje runjewon jara wulki. Mamy pak so na to dopominać, zo bě to w zašłosći hinak, jako mějachmy w Čěskej hišće kralestwo. Njemóžemy tuž twjerdźić, zo njejstej katolska cyrkej a Čěska tež dźensa ze sobu zwjazanej.“

Křiž je dar z Łužicy Serbskemu seminarej a tak wšěm, kotřiž so tam za serbstwo zasadźeja. „Přeco rěči so jenož wo tym, što drje přichod přinjese. Njesměmy pak zabyć tež na zašłosć, na duch městnosće. Křiž budźe składnosć, pokazać na hłuboke a daloko sahace zwiski, mjez druhim kulturne, z Łužicy do Čěske­je, wosebje do jeje stolicy Prahi“, wuswětla čłon předsydstwa SPL Milan Hrabal.

wozjewjene w: Kultura
wutora, 09 oktobera 2018 14:00

Za dary přirody so dźakowali

Hdyž su nazymske dźěła na polach, ­zahrodach a w zahrodkach w dalokej ­měrje dokónčene, swjeća na mnohich městnach domchowanku abo žnjowy dźakny swjedźeń. Tajke zarjadowanja přiwabjeja dźeń a wjace ludźi.

Čorny Chołmc (AK/SN). We wobłuku cyłoněmskeho dnja regionow swjećachu minjeny kónc tydźenja w Čornochołmčanskim Krabatowym młynje domchowanku. 35 regionalnych producentow a direktnych zwičnjerjow je tam swoje wudźěłki poskićało. Jedna z nich bě Yvonne Müller z Njedźichowa. „Domchowanka za mnje woznamjenja so přirodźe dźakować, zo nas zastaruje. Ale bjez ­prócy a lubosće njeje tež žanych žnjow“, wona rjekny.

wozjewjene w: Kultura
wutora, 09 oktobera 2018 14:00

Doma dotal bjez dypka

ST 1922 Radwor

– Drohotka Ramnow 2:3 (0:2)

Zestawa domjacych: Ch. Šěrak (46. Jendrewski) – F. Šěrak, Zähr, Bauer, Nuk, T. Schulze, Mark (70. A. Schulze), Glück­lich, Reineke, Omran, Amar

wozjewjene w: Sport
wutora, 09 oktobera 2018 14:00

Dobry start za Jednotu Kamjenc

W Sakskim koparskim zwjazku móže krajny ligist Jednota Kamjenc ze startom do hraj­neje doby 2018/2019 jara spokojom być. Dotal je mustwo trenarskeje dwójki Frank Ričel/Dirk Rettig (wotprawa) pjeć partijow dobyło, jónu njerozsudnje hrało a jenož jónu přěhrało. Minjenu sobotu porazychu koparjo z Lessingoweho města Wocl Riesa ze 4:0. Foto: Jörg Stephan

wozjewjene w: Sport
wutora, 09 oktobera 2018 14:00

Płuwanska wučba zaručena

Z wurjadnym posedźenjom je Budyski wokrjesny sejmik swoje wupadnjene wuradźowanje 17. septembra wčera nachw­atał. Na dnjowym porjedźe stejachu mjez druhim wudawki, z kotrymiž wokrjes tež w dwurěčnych gmejnach šulsku płuwansku wučbu dale zaruča.

Budyšin (SN/MWj). Hač do kónca lěta ma Budyski krajnoradny zarjad wo­krjesnemu sejmikej předpołožić nowy płaćiznowy porjad, z kotrymž dochody ze šulskeje płuwanskeje wučby w Kamjenskej halowej kupjeli wudawki kryja. To je Budyski wokrjesny sejmik na swojim wčerawšim wurjadnym posedźenju z někotrymi napřećiwnymi a wzdatymi hłosami schwalił. Nimo toho radźićeljo wobzamknychu, přewostajić Korzymskej kupjeli lětsa přiražku 250 000 eurow, w lětomaj 2019 a 2020 po 200 000 eurach.

wozjewjene w: Lokalka
wutora, 09 oktobera 2018 14:00

Prašenja wostanu

Z rozsudom Budyskeho wokrjesneho sejmika, Kamjenskej a Korzymskej kupjeli tež w přichodnymaj lětomaj pomhać, je tam płuwanska wučba dale zaručena. Tak je sej wokrjes takrjec čas kupił za rozrisanjom pytać, kak móhł wudawki z dochodami zarunać. Ja wšak so boju, zo tež po lěće 2020 połoženje wjele hinaše njebudźe hač tuchwilne. Lědma někajke kulturne zarjadnišćo, a tajkim tež kupjele přiličam, ma telko dochodow, zo móže z toho žiwe być. Na tamnym boku njerozumju, čeho­dla šulerjow jeničkeje hodźiny wob tydźeń dla na płuwanje transportuja. Njeby da móžno było dwě hodźinje płuwanskeje wučby za sobu přewjesć? Tak bychu znajmjeńša jězbne wudawki społojčili. W tym dypku pak kultusowe ministerstwo zapřimnje a praji ně, dokelž to pječa dźěćom přicpěwać njemóžeš. Wězo njeměli na kóšty dźěći lutować. Ale je dwójce 45 mjeńšin płuwanja za nje woprawdźe přewjele? Marian Wjeńka

wozjewjene w: Lokalka
Woči małeje Heleny z Běłeje Wody stej dale a wjetšej, hdyž wona wobkedźbuje, kak so wonkowna bělizka worjechow pukać ­póčnje, ­doniž worjech njewupadnje. Mjeztym zo je wjele druhich płodow hižo dožnjatych, je nětko wulki čas worjechow. A tych je lětsa chětro wjele, byrnjež zwjetša mjeńše byli hač hewak. Foto: Joachim Rjela

wozjewjene w: Lokalka
wutora, 09 oktobera 2018 14:00

Ryzy kopiju wotpokazali

Chróšćanscy radźićeljo argumentaciju z Delan njepřewozmu

Chrósćicy (aha/SN). Poprawom bě minjeny štwórtk na posedźenju Chróšćanskeje gmejnskeje rady po dnjowym porjedźe předwidźane, „wobzamknyć zapodaće próstwy gmejny Chrósćicy knježerstwu Swobodneho stata Sakskeje wo regulaciju wjelčeho wobstatka“. Wjesnjanosta Marko Kliman (CDU) do wobjednanja tohole dnjoweho dypka na to skedźbni, zo drje su w zašłosći naležnosć hižo narěčeli. Nětko pak je trjeba to tež zjawnje činić. Kaž bě hižo gmejna Ralbicy-Róžant swoje žadanje sakskemu knježerstwu zapodała, měješe so nětko Chróšćanska tomu přizamknyć. Čim wjace komunow to čini, ćim doraznišo móhł ministerski prezident Michael Kretsch­mer (CDU) žadanje za trěbnej regulaciju wjelčeho wobstatka přednjesć, argumentowaše Kliman.

wozjewjene w: Lokalka

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND