Z wudaća: srjeda, 10 oktobera 2018
srjeda, 10 oktobera 2018 14:00

Starosća so wo čas po brunicy

Rjemjeslniskej komorje so mjez łužiskimi zawodami naprašowałoj

Drježdźany (SN). Sakscy rjemjeslnicy su z tuchwilnym połoženjom hladajo na nadawki poprawom jara spokojom. To pak móhło so bórze změnić, tak rěka w najnowšim naprašowanju rjemjeslniskeju komorow w Choćebuzu a Drježdźanach. Po tym zhladuje 60 procentow wšitkich prašanych předewzaćow starosćiwje do přichoda. Wone boja so w zwisku z kóncom wudobywanja brunicy woteběraceje kupneje mocy ludźi, wotchada a wotwabjenja fachowcow z Łužicy kaž tež přiběraceho poćežowanja wobydlerjow a předewzaćow z dawkami a popłatkami, kaž z nowinskeje zdźě­lenki Drježdźanskeje rjemjeslniskeje komory wuchadźa.

wozjewjene w: Politika
srjeda, 10 oktobera 2018 14:00

Hdźe wostanje protest?

Stajnje zaso so dźiwam, što ludźi w Němskej rozhorja a što nic. Dopominam so na emocionalne debaty, jako so wukopa, zo žiwidłowa industrija ilegalnje konjace mjaso do kołbasy tyka. Abo hysterija wokoło ptačeje gripy – to běchu hišće časy. Nětko so dźeń a bóle pokazuje, zo su nam awtotwarcy za wjele pjenjez dieselowe awta předali, kotrež njemóžemy hižo bórze w němskich wulkoměstach wužiwać. Su nas potajkim zjebali. Awta wotpowědnje přetwarić pak nochcedźa, chibazo to tež hišće sami zapłaćimy. Prašam so: Hdźe wostanje protest ludźi? Čehodla ­so njewobaramy? W Americe dyrbjachu němscy awtotwarcy miliardy eurow pokuty płaćić, w Němskej so w tym nastupanju ničo njestawa. Politikarjo warnuja, zo móhło to dźěłowe městna płaćić, hdyž awtowe koncerny přejara poćežujemy. Čakam na dźeń, hdyž w Budyšinje a Kamjencu dieselowe awta zakazaja. Snano ludźo potom wotuća! Marko Wjenka

wozjewjene w: Politika

Při najkrasnišim słónčnym wjedrje smy so my seniorojo Serbskeho šulskeho towarstwa kónc septembra z busom Poldrackec wozydłownistwa na swoju lětušu dnjowu wuprawu podali.

Naš zaměr běše Liberecski kraj a Čěski raj. Naš přewodnik Gunnar Buchwald, kiž běše hižo wospjet z nami po puću, je nam na tón dźeń wjele noweho, njeznateho a wobhladnjahódneho pokazał.

Prěni impozantny twar, kotryž wu­hladachmy, bě w 13. lětstotku natwarjeny hród Frýdlant. Tón přeńdźe spočatk 17. lětstotka do wobsydstwa hrabje ­Albrechta von Wallensteina, sławneho wjednika wójska w Třicećilětnej wójnje (1618–1648).

wozjewjene w: Towarstwa
srjeda, 10 oktobera 2018 14:00

Porjedźenka

We wčerawšim wudaću SN w přinošku „Křiž do stolicy Čěskeje“ na stronje 1 je so nažel zmylk stał. Partner Towarstwa přećelow Serbow při instalaciji drjewjaneho křiža w Praskim Serbskim seminarje je ­Alfons Korjeńk z Budyšina, kiž projekt ze stron Łužicy organizuje. Iniciator pro­jekta je Zdeněk Blažek z Prahi. David Lenk z Prahi jón z čěskeho boka organizuje. 1. decembra chcedźa křiž po­swjećić. Prosymy wo wodaće za misnjenje!

wozjewjene w: Politika
srjeda, 10 oktobera 2018 14:00

Wuspěšnej předstajeni dožiwili

Hnydom dwójce derje wopytany bě wčerawši prózdninski poskitk na žurli Budyskeho Serbskeho ludoweho ansambla. Wjacore skupiny dźěći wobhladachu sej program „Mała rejwana stawizna“. Rejwarki a rejwarjo baleta SLA po­dachu so zhromadnje z hortskimi a dalšimi prózdninskimi dźěćimi na časowu jězbu po stawiznach rejow, jich wšelakorych stilow a formow, kotrež sahaja wot spočatka baleta přez folklornu reju hač k rock’n’rollej. Dźěćom je so tajki wulět wočiwidnje spodobał. Dalše předstajenja jako šulerski koncert planuje SLA klětu nalěto w Kamjencu, Rakecach a Wulkich Rědorjecach (Großröhrsdorf). Foto: SN/Maćij Bulank

wozjewjene w: Kultura
srjeda, 10 oktobera 2018 14:00

Wěnuja so sonam a rumam Łužicy

Budyšin (SN). W Budyskim Serbskim instituće wěnuja so fachowcy jutře a pjatk na prěnjej dźěłarničce projekta „Serbska Łužica – sony a rumy narodneje mjeńšiny wot 1918 hač do dźensnišeho“. Projekt ma zaměr, historisce a socialno­wědomostnje wobswětlić dimensiju při­rodneho ruma narodneje mjeńšiny jako kategorije. W srjedźišću dźěłarnički wobjednawaja zajimcy teoretiske a meto­diske prašenja, nastawace při analyzy diskur­sa wo „serbskej Łužicy“. Metodiske dźěło wudospołnjeja přednoški wo serbskej ekologiskej literaturje a wo towaršnostnych přirodnych poměrach w dźensnišej Łužicy kaž tež ekskursija.

Wo projekt, spěchowany přez sakske ministerstwo za wědomosć a kulturu we wobłuku humanistiskich wědomosćow w lětach 2018 do 2020, starataj so pro­jektowaj wobdźěłarjej dr. Jana Piňosová a Marcel Langer. Tak staj sej za dźěłar­ničku zastupjerjow historiskeho wědomostneho slědźenja, wobswětowych stawiznow, socialneje geografije kaž tež literarnych wědomosćow přeprosyłoj. Zarjadowanje pak přewjedźe Serbski institut internje.

wozjewjene w: Kultura
srjeda, 10 oktobera 2018 14:00

Přinoški za schadźowanku zapodać

Budyšin. Lětuša 144. schadźowanka wotměje so sobotu, 24. nowembra, we hłownym domje Budyskeho Němsko-Serbskeho ludoweho dźiwadła. Zo móhli znowa zajimawy program za nju organizować, chcedźa Jana Pětrowa ze Załožby za serbski lud a režiseraj Maximilian Kral a Jakub Wowčer hač do 19. oktobra wědźeć, štó chce što w kotrym žanru předstajić. Studenća a šulerjo njech na to mysla, zo su w zašłosći krótke a jadriwe sceny najwjace přikleska wuwabili.

Schadźowanka budźe lětsa prěni raz w NSLDź. Dokelž tam profesionelni technikarjo dźěłaja, maja so wšitke terminy dodźeržeć! Organizatorojo proša tuž wo disciplinu, dokelž budu wosebite rjadowanja trěbne. Doskónčne teksty maja hač 8. nowembra zapodate być. Proby budu pjatk, 23. nowembra, za kabaretne skupiny w probowych rumnosćach dźiwadła. Tam dyrbja wšitke teksty wěsće sedźeć! Techniska proba je 24. nowembra wot 14 hodź. za wšitke skupiny.

Wšitkim, kotřiž su swoje přinoški hižo přizjewili, so Jana Pětrowa, Maximilian Kral a Jakub Wowčer za kreatiwne so­budźěło dźakuja.

wozjewjene w: Kultura
srjeda, 10 oktobera 2018 14:00

Wšitko zaso na spočatku

Prócowanja wokrjesa Budyšin, wobchadny zaměrowy zwjazk Hornja Łu­žica­-Delnja Šleska (ZVON) wopušćić, su zwrěšćili. Nětko chcedźa so na nowowuhotowanje tarifow koncentrować.

Budyšin (UM/SN). Trochu rezignacije bě z hłosa 2. přirjadnicy krajneho rady Birgit Weber wusłyšeć, jako rozprawješe wo­na­ póndźelu wokrjesnym radźićelam wo aktualnym stawje nastupajo wobchadne zwjazki. Po wjaclětnych prócowanjach, njespokojacy status quo rozwjazać, dyrbješe decernentka za wuwiće wokrjesa přiznać: „Njejsmy ani kročałki doprědka přišli a stejimy zaso na spočatku.“

wozjewjene w: Lokalka
Dwójce wob lěto přewjedźe Wojerowska Łužiska kupjel wulke wubědźowanje na swojim nowym suwadle. Prěnje tajke wotmě so w februaru. Zajutřišim, pjatk, steji dalše na programje. Wone započnje so připołdnju w dwanaćich. Štyri hodźiny pozdźišo chcedźa dobyćerjow mytować. Rozsudne je, štó so najspěšnišo po suwadle suwa. Za to maja tam měrjensku připrawu. Sobu­dźěłaćer kupjele Ricardo Dutschke suwadło, „zeleny monster“ mjenowane, hišće raz polěruje. Foto: Gernot Menzel

wozjewjene w: Lokalka
srjeda, 10 oktobera 2018 14:00

Šćežka po měsće a lětacy hosćenc

We wobłuku najwšelakorišich zarjadowanjow w zwisku ze 750. róčnicu Wojerec přewjedźechu tam nětko projekt, w kotrymž zaběrachu so studenća ze zwiskom mjez starym a nowym městom.

Wojerecy (AK/SN). Mosty twarić mjez starym a nowym městom rěkaše hesło lětnjeje šule, kotraž je angažowanych studentow architektury dwaj tydźenjej hromadźe wjedła. „Běchu to jara intensiwne dny“, zjima profesorka na Darmstadtskej uniwersiće dr. Nina Gribat na wotewrjenju wustajeńcy z wuslědkami zetkanja. Swoje doktorske dźěło bě wona hižo w lěće 2010 měšćanskemu přetwarej we Wojerecach wěnowała.

wozjewjene w: Lokalka

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND