MENS lěto 2018 wuhódnoćiła
Wien. Organizacija Młodźiny europskich narodnych mjeńšin (MENS) je na poslednim zetkanju lěta 2018 minjeny kónc tydźenja we Wienje swoje aktiwity wuhódnoćiła. Mjez druhim su čłonojo štyri seminary z dohromady wjace hač 200 wobdźělnikami wuhotowali. Nimo toho planowachu klětuše zarjadowanja, kotrež zjimaja pod hesłom „MYnority – My say“, MENS online zdźěla.
Zajim za serbšćinu na Taiwanje
Taipeh. Na statnej uniwersiće taiwanskeje stolicy Taipeh wotměje so přichodny kónc tydźenja mjezynarodna konferenca wo wozrodźenju rěčow narodnych mjeńšin. Łužicu zastupuje předsydka Serbskeho šulskeho towarstwa Ludmila Budarjowa. Na Taiwanje prócuja so wo to, wožiwić a rozšěrić tamnišej mjeńšinowej rěči hakka a mandarin.
Nacistisku fabriku wotkryli
Kulowske towarstwo Bratrowstwo wotmě minjeny pjatk swoju hłownu a wólbnu zhromadźiznu w Salowje. Za předsydku wuzwolichu znowa Sonju Hrjehorjowu. Janek Wowčer je so z načolnicu najwjetšeho serbskeho towarstwa Kulowskeho regiona rozmołwjał.
Čłonojo Bratrowstwa su Was třeći króć za předsydku wuzwolili. Kak to wosobinsce hódnoćiće?
S. Hrjehorjowa: To je mi pohon, dale za towarstwo skutkować. Zdobom je to dopokaz, zo su čłonojo z mojim dźěłom spokojom. Sym dźakowna za dowěru. Chwalu sej zhromadnosć cyłeho předsydstwa a dźělenje nadawkow, štož sym w rozprawje wuzběhnyła. Lětsa su mje čłonojo předsydstwa za čas dlěšeje chorosće derje zastupowali.
Što běchu wjerški w běhu lěta?
S. Hrjehorjowa: Na kóždy pad běštej to lětny a patronatny swjedźeń Bratrowstwa, kotryž zwjazamy stajnje ze swjedźenjom za cyłu serbsku wosadu. Dalšej wjerškaj běštej swójbnej pućowani. Z Achimom Mičom pobychmy nazymu w Sakskej Šwicy, a nalěto wulećachmy sej z kolesom. Za njón smy cil krótkodobnje změnili a so zhromadnje jako Bratrowstwo na beneficny koncert do Łazka podali.
Budyšin (SN/bn). „Ja – město – ty“ bě hesło prěnjeho sympozija Budyskeho socio-dźiwadłoweho Thespis-centruma. Minjeny kónc tydźenja je so dohromady 50 wobdźělnikow z cyłeje Němskeje – wjacori z nich z migraciskim pozadkom – kaž tež z bliskeho wukraja wot 16 do 70 lět z perspektiwami na a za sprjewine město kaž tež z prašenjom zaběrało, kak hodźeli so wobydlerjo aktiwnje do wuměłskich procesow zapřijeć.
Pjatk intendant Němsko-Serbskeho ludoweho dźiwadła Lutz Hillmann zarjadowanje zahaji. Na to přednošowaštej čłonka krajneje dźěłoweje towaršnosće politisko-kulturne kubłanje (LAG pokuBi) Ely Almeida a Liviana Bath ze Žitawskeje wile Hillera wo „móžnosćach wobdźělenja woprawdźitych a potencielnych recipientow na kreatiwnych projektach“. Wječor wuklinča ze swětowu hudźbu pěstowacej skupinu Musighistan.
Wjace hač jednu miliardu eurow wopřijima dwójny etat Budyskeho wokrjesa za lěće 2019 a 2020. Wokrjesny sejmik je jón wčera jednohłósnje wobzamknył. Hačrunjež socialne wudawki woteběraja, wostanu wone najwjetša pozicija.
Budyšin (SN/at). Schwalenje etata je tež za Budyski wokrjesny sejmik wjeršk, a k jeho wobzamknjenju su so krajny rada kaž tež frakciscy předsydźa słowa jimali. Wuslědkowy budget wučinja klětu kaž tež lěto pozdźišo 510 milionow eurow, rjekny Budyski krajny rada. 30 procentow z toho, něhdźe 150 milionow eurow, je za jobcenter, zo móže wokrjes nadawki opciskeje komuny w swójskej zamołwitosći za dołhodobnje bjezdźěłnych a přijimarjow zakładneho zawěsćenja spjelnić. Před pjeć lětami bě podźěl za jobcenter hišće 45 procentow. To mjenowaše krajny rada někotre nahladne strukturne daty. Wokrjesny wotedawk, kotryž płaća města a gmejny, wostanje dale 32 procentow, njedóńdźe-li k budgetnym rizikam. „Wón słuša sobu k najmjeńšim popłatkam přirunujo z cyłej Sakskej. Z widom na wočakowane wuwiće kóštow njeje to samozrozumliwosć“, Harig podšmórny.
Budyšin (SN/bn). Wosebitaj hosćej staj wopytowarjow adwentneho koncerta Serbskeho ludoweho ansambla „Zymski čas“ najbóle zahoriłoj. Elisabeth Wirthec a Adrian Simon běštaj so na lětušim wubědźowanju SLA „Młoda serbska hudźba“ wobdźěliłoj a w swojej starobnej klasy wuběrnej wukonaj pokazałoj. 16lětnej huslerce připózna jury spěchowanske myto, jědnaćelětny pianist docpě z maksimalnje móžnymi 25 dypkami najwjace cyłeho wurisanja. Elisabeth přeswědči, přewodźana wot Giny Hentsch na křidle, publikum na jara derje wobsadźenej žurli ansambla z dynamiskej interpretaciju „Serbskeje reje“ Bjarnata Krawca. Adrian překwapi wobkuzłanych připosłucharjow solistisce z wirtuoznym přednoškom twórby Fryderyka Chopina „Fantaisie-Impromptu cis-moll, op. post. 66“.
Drježdźany (dpa/SN). Sakski krajny sejm je dźensa swój posledni wuradźowanski tydźeń lěta 2018 zahajił. W srjedźišću steji debata wo dwójnym etaće 2019 a 2020. Sakska planuje z cyłkownje 41 miliardami eurow telko kaž hišće ženje wudać. Dźensa wobjednachu tohorunja namjet frakcijow CDU a SPD, zo ma knježerstwo ze Zwjazkom a Braniborskej jednanja wo nowym financowanskim zrěčenju za Załožbu za serbski lud zahajić.
Do hód znowa chaos hrozy
Barcelona (dpa/SN). Krótko do hód hrozy so rozestajenje mjez centralnym knježerstwom Španiskeje a separatistami w Katalonskej znowa powjetšić. W Madridźe starosća so připowědźe radikalnych podpěrarjow njewotwisnosće dla, katalansku stolicu Barcelonu 21. decembra do chaosa ćěrić a zlemić chcyć, kaž španiska telewizija dźensa rozprawja. Tón dźeń chce premier Pedro Sánchez tam posedźenje ministerskeje rady wotměć. Njeje jasne, hač zetka so tež z regionalnym prezidentom Quimom Torru.
Snadne rozdźěle
Samotwarjeneje atrapy błyskača dla dyrbi so muž w Kölnje před sudnistwom zamołwić. Muž bě so lěta dołho z městom wadźił, žadajo sej kontrole wukazaneje spěšnosće 30 km/h před swojim domom. Dokelž město njereagowaše, sej muž atrapu błyskača natwari a staji ju na zahrodu před domom, zo by šoferow nuzował tam pomału jězdźić. Statne rěčnistwo jemu nětko wumjetuje, zo je sej hamtske prawa přiswojił.
Jeno ze zastupnym lisćikom móža ludźo lětsa patoržicu požadane Bože słužby ewangelskeje wosady w Essenje wopytać. Hłowna přičina su wěstotne předpisy, po kotrychž njesmě nichtó w cyrkwi stać, zamołwići zdźěleja. Nastork, zawjesć darmotne lisćiki, běchu loni „njerjane diskusije“, jako dyrbjachu wopytowarjow při durjach přepjelnjeneje cyrkwje wotpokazać.
Praha (dpa/SN). Bě to snědań, kotraž je do stawiznow zašła: Před 30 lětami je so bywši francoski statny prezident François Mitterrand w Praze z čěskimi aktiwistami za zachowanje čłowjeskich prawow, kaž běštaj to Václav Havel a Jiří Dienstbier, zetkał. Lěto do demokratiskeho přewróta 1989 bě oficialne přeprošenje do francoskeho wulkopósłanstwa wažny signal podpěry opoziciskeho hibanja w tehdyšej Čěskosłowakskej.
Składnostnje mjezynarodneho dnja čłowjeskich prawow 10. decembra je Čěska tradiciju nětko w hinašej formje wožiwiła. Kraj witaše wčera aktiwistow za čłowjeske a wobydlerske prawa w swojim wulkopósłanstwje w Moskwje, kaž wonkowne ministerstwo w Praze na naprašowanje powěsćernje dpa wobkrući. Dalše kraje kaž Vietnam, Armenska a Kuba maja přichodne dny slědować.
Na legendarne zetkanje 9. decembra 1988 dopomina mjeztym pomnik na zahrodźe pod Praskim hrodom.