Z wudaća: štwórtk, 13 decembera 2018

Nowa CD Serbskeho rozhłosa

Budyšin. „Hej, Łužica“ rěka nowa CD z popularnymi serbskimi pěsnjemi. Projekt je Serbski rozhłós MDR z podpěru Załožby za serbski lud zwoprawdźił a dźensa­ wudał. Słyšeć móžeće tam mjez druhim Theju Čórlichec, Gabriela Mommera a Danielu Hazec. Cejdejka je w Serbskej kulturnej informaciji a w Smolerjec kniharni na předań. Spočatk noweho lěta ma tohorunja w syći přistupna być.

Podpěra tež łužiskim ratarjam

Drježdźany. Zarunansku přiražku 15,7 milionow eurow płaća tele dny něhdźe 2 900 ratarskim zawodam we wróćostajenych kónčinach Sakskeje, mjez druhim w Hornjołužiskej krajinje hole a hatow. Pjenjezy su z europskeho ratarskeho fondsa k wuwiću wjesneho ruma, zhromadneho nadawka „polěpšenje agrarneje struktury a škita přibrjohow“ a z dawkow, kaž přisłušne ministerstwo zdźěla.

Kosmetika z kawiara

Najwšelakoriše wosuški su w adwenće mjez ludźimi wosebje prašane, a wone tež rjemjeslniske pjekarnje stajnje znowa wuža­duja. Wotrowski pjekarski mišter Roman Bulank dawa tule spřihotowane rózynkowe wosuški do pjecy. Hačrunjež so sezona woblubowaneho­ pječwa za pjekarjow pomału nachila, njeje sej Roman Bulank wěsty, hač budu to poslednje lětuše wosuški z jeho­ pjekarnje. Ručež su na předań, su mjenujcy bórze po tym tež hižo zaso wupředate. Foto: SN/Maćij Bulank

Wuslědki eksterneje ewaluacije serbskich poskitkow primarneho schodźenka w Braniborskej, kotrež bě tamniše ministerstwo za kubłanje, młodźinu a sport do nadawka dało, su nětko zjawnje přistupne. Jednaćelski direktor Instituta za sorabistiku na Lipšćanskej uniwersiće prof. Edward Wornar bě je spočatk měsaca w Choćebuskim měšćanskim domje předstajił.

Orientuja so na wuspěšnym festiwalu „Łužica“ před lětomaj

Budyšin (SN/bn). Mjezynarodny folklorny festiwal „Łužica“ słuša mjeztym k připóznatym a region daloko přesahowacym wjerškam tudyšeho kulturneho žiwj­enja. Na njedawnym 47. kongresu Mjezynarodneje rady za organizowanje folklornych festiwalow a ludowe wuměłstwo (CIOFF) w indoneskim měsće Tenggarong běchu jemu status oficialneho CIOFF-festiwala spožčili, z čimž wobkrućeja, zo wuhotowarjo najwyše kwalitne wuměnjenja spjelnjeja. Mjez druhim wuznamjenichu festiwal za šěrjenje mjezsobneho dorozumjenja a wobchowanje kulturneho namrěwstwa.

Towaršnosć Hospodarski region Łužica je dospołna. Tež Budyski wokrjes je jej přistupił, zo by region nastupajo strukturnu změnu po dobje wudobywanja brunicy za jedyn postronk ćahnył.

Budyšin (SN/at). Wokrjes Budyšin towaršnosći Hospodarski region Łužica přistupi. To je wokrjesny sejmik minjenu póndźelu wobzamknył. We wubědźo­wanju mjez brunicowymi rewěrami w Němskej wo srědki za strukturnu změnu dyrbja so regionalni akterojo zjed­noćić, kaž podšmórny to krajny rada Michael­ Harig (CDU), zahajacy diskusiju wo wažnym dypku dnjoweho porjada. Jako­ potom sedmy towaršnik płaći Bu­dyski wokrjes runja dotalnym – su to wokrjesy Zhorjelc, Hornje Błóta-Łužica, Sprjewja-Nysa, Łobjo-Halštrow, Dubja-Błóta kaž tež město Choćebuz – 5 000 eurow stajneho kapitala a wot 2019 lětny popłatk 50 000 eurow.

Rakečanska Serbska bjesada je wčera wječor na zarjadowanje „žiwy adwent“ do farskeje bróžnje přeprosyła. Nimo wosadnych běchu mjez wobdźělnikami tež někotři čłonojo Domowinskeje skupiny Komorow/Rakecy/Trupin a dalši zajimcy. Po tym zo je dr. Günter Holder (nalěwo) wšitkich postrowił, spěwachu woni zhromadnje dohodowne kěrluše. Andreja Langerowa to na gitarje přewodźeše. Horce wino a čaj so k poprjančkam derje hodźeštej. Wjeselo wobradźi runje tak hódančko, kotrež mějachu wuhódać. Prawa wotmołwa rěkaše „božodźěsćowy štom“. Dźensa wječor budźe w Bukecach serbski „žiwy adwent“ tamnišeje Bjesady. Foto: Feliks Haza

Zhorjelc (SN/at). Społnomócnjeni za serbske naležnosće wokrjesow Budyšin, Zhorjelc, Sprjewja-Nysa, Hornje Błóta-Łužica a Dubja-Błóta kaž tež bjezwokrjesneho města Choćebuza su so wčera w Zhorjelcu zetkali. Kaž zhonichu Serbske Nowiny z kruha wobdźělnikow, su tam wuslědki a wuskutki nowelěrowaneho braniborskeho serbskeho zakonja rozjimali. Zastupjerce Budyskeho a Zhorjelskeho wokrjesa stej wobkrućiłoj, zo je trjeba po 20 lětach tež sakski serbski zakoń aktualnemu standardej europskeje mjeńšinoweje politiki přiměrić. Z Budyskeho wida wobžaruje tudyša społnomócnjena Regina Krawcowa, zo njeje žanoho­ zhromadneho dźěła z Radu za serbske naležnosće Sakskeje. Porno tomu tónle mosćik w Braniborskej dosć derje funguje. Wobdźělnicy rozjimachu dale wobchadźenje ze Serbskim sejmom a wuprajichu so za to, styki k njemu nawjazać. Třeće temowe ćežišćo bě strukturna změna. Tu běchu sej społnomócnjeni přezjedni nadhódnotu Serbstwa za tónle proces připóznać, w kotrymž njejsu industrijne dźěłowe městna je­nički aspekt.

Drježdźany (dpa/SN). Sakska chce přichodnej lěće 178 milionow eurow za škit před wulkej wodu a za wotstronjenje škodow wudać. Nimo toho přewostaji nimale 173 milionow eurow za wudźeržowanje wobstejacych škitnych objektow. To je krajny sejm wčera wječor wobzamknył. Dźensa schwalichu dalše jednotliwe etaty, mjez druhim tón za hospodarstwo a dźěło kaž tež za wědomosć a kulturu. Sakska planuje za přichodnej lěće wudawki 41,2 miliardow eurow.

Informować, ale njewabić

Berlin (dpa/SN). W zwjazkowym sejmje su dźensa wo zakazu wabjenja za wotehnaće dźěsća debatowali. Při tym dźěše tež wo wčerawše dojednanje zwjazkoweho knježerstwa, po kotrymž měł so wotpowědny paragraf zakonika wudospołnić. Tam chcedźa wuformulować, kak móhli lěkarjo a chorownje wo tym informować, zo wotehnaća přewjeduja, njeměli pak za tajke wabić. W rjadach wulkeje koalicije CDU a SPD su měnjenja wo tym jara rozdźělne.

Jednanja zaso přetorhnjene

Při zražce spěšnika z lokomotiwu na kromje turkowskeje stolicy Ankary je dźensa rano znajmjeńša dźewjeć ludźi ži­wjenje přisadźiło. Po prěnich informacijach bě lokomotiwa na kolijach spěšnika za kontrolnu jězbu po puću, jako ćah ze spěšnosću 90 km/h do njeje zrazy. Wagony wuskočichu z kolijow a prasnychu do železneho mosta za pěškow, kotryž so na to zwjeze. Foto: dpa/abacapress

Chětro hłupje je so paduch w Kölnje zadźeržał, jako spyta swoju rubiznu runje tomu předać, kotrehož bě runje wobkradnył. Tak je wobsedźerjej frizerskeho salona štyri truhanske aparaty poskićił. Tón pak nastroje spózna: Jenož hodźiny do toho bě je paduch w hinašim salonje spakosćił, kotryž pak samsnemu mějićelej słuša. 51lětny wołaše policiju, a ta paducha hnydom sobu wza.

Sprawna žona je młodemu nanej z Afghanistana dočasnu hodownu překwapjenku wobradźiła. 26lětny bě móšeń z wjace hač 2 000 eurami zhubił, jako w badensko-württembergskim Waldkirchenje z kolesom jědźeše. Pjenjezy bě sej přez lěta nalutował, zo móhł po wosom lětach doma swójbu z dwěmaj dźěsćomaj wopytać. Z kartku chorobneho zawěsćenja w móšni móžachu jeho identifikować a jemu pjenjezy přepodać.